ଅନୁଗୋଳ ଅଫିସ, ୧୬।୧୨: ବିଦ୍ୟୁତ୍ ସଂସ୍ପର୍ଶରେ ଆସି ପୋଡ଼ି ଯାଇ ୬ ମାସ ହେଲା ଅସହାୟ ଅବସ୍ଥାରେ ମେଡିକାଲରେ ପଡିରହିଥିବା ଜଣେ ଅସହାୟଙ୍କ ପାଇଁ ଦେବଦୂତ ପାଲଟିଛନ୍ତି ଅନୁଗୋଳର ସାମାଜିକକର୍ମୀ ପ୍ରତାପ ମହାପାତ୍ର। ଯୁବକଙ୍କୁ ଗୁରୁତର ଅବସ୍ଥାରେ ଉଦ୍ଧାର କରିବାଠାରୁ ଆରମ୍ଭ କରି ସୁସ୍ଥ ହେବା ପର୍ଯ୍ୟନ୍ତ ସାହଯ୍ୟ ସହଯୋଗ ଏବଂ ପରେ ତାଙ୍କ ପରିବାର ସହ ଭେଟ କରାଇ ଏକ ଉଦାହରଣ ସୃଷ୍ଟି କରିଛନ୍ତି। ଏଥିପାଇଁ ତାଙ୍କୁ ବିଭିନ୍ନ ମହଲରୁ ପ୍ରଂଶସାର ସୁଅ ଛୁଟିଛି।
ଘଟଣା ମୁତାବକ, ତାଳଚେର ବସ୍ଷ୍ଟାଣ୍ଡ ସ୍ଥିତ ଏକ କବାଡ଼ିଆ ଦୋକାନରେ ଝାଡଖଣ୍ଡ ରାଜ୍ୟ ରାଞ୍ଚି ଅନ୍ତର୍ଗତ ରାମଗଡ ଅଞ୍ଚଳର ରାଜୁ ରାଜଓ୍ବାନ ଦୀର୍ଘ ଦିନ ହେଲା କାମ କରୁଥିଲେ। ପ୍ରାୟ ୬ ମାସ ପୂର୍ବେ ତାଳଚେର ଦେଇ ଯାଇଥିବା ରେଳଲାଇନ ନିକଟରେ ବିଦ୍ୟୁତ୍ ତାର ସଂସ୍ପର୍ଶରେ ଆସି ସେ ଗୁରୁତର ହୋଇଥିଲେ। ତାଙ୍କ ଶରୀରର ପ୍ରାୟ ୭୦ ପ୍ରତିଶତ ପୋଡି ଯାଇଥିଲା। ତାଙ୍କୁ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ସେହି ସମୟରେ ସାମାଜିକ କର୍ମୀ ପ୍ରତାପ ତାଙ୍କ ସହାୟତା କରିଥିଲେ। ଅବସ୍ଥା ସଙ୍କଟାପନ୍ନ ହେବାରୁ ଡାକ୍ତର ରାଜୁଙ୍କୁ କଟକ ସ୍ଥାନାନ୍ତର କରିଥିଲେ। ପରେ ସେ ଧୀରେ ଧୀରେ ସୁସ୍ଥ ହୋଇଥିଲେ ହେଁ ନିଜ ଘର ଠିକଣା କିମ୍ବା ପରିବାର ଲୋକଙ୍କୁ ଭୁଲିଯାଇଥିଲେ। ନିକଟରେ କେହି ନ ଥିବାରୁ ସାମାଜିକ କର୍ମୀ ପ୍ରତାପଙ୍କ ଅନୁରୋଧ କ୍ରମେ ରାଜୁଙ୍କୁ ଅନୁଗୋଳ ଡାକ୍ତରଖାନାରେ ରଖାଯାଇଥିଲା। ତେବେ ସମ୍ପୂର୍ଣ୍ଣ ସୁସ୍ଥ ହେବା ପରେ ରାଜୁ ଘର ଠିକଣା ମନେ ପକାଇଥିଲେ। ପରେ ପ୍ରତାପ ଓ ଅନ୍ୟଜଣେ ସାମାଜିକ କର୍ମୀ ମହେଶ ଭୋମରାଜ ରାଜୁଙ୍କୁ ନେଇ ରାଞ୍ଚି ଅଭିମୁଖେ ବାହାରିଥିଲେ। ସେଠାରେ ରାଜୁଙ୍କ ଭିଣୋଇ ତାଙ୍କୁ ଚିହ୍ନିବା ସହ ତାଙ୍କ ଜିମା ନେଇଥିଲେ। ଏହାକୁ ନେଇ ରାଜୁଙ୍କ ପରିବାର ସମେତ ସ୍ଥାନୀୟ ଲୋକେ ସାମାଜିକ କର୍ମୀଙ୍କୁ ସାଧୁବାଦ ଜଣାଇଛନ୍ତି।
