ଭାରତୀୟ କ୍ରିକେଟ ଦଳରେ ଏବେ ସଙ୍କଟମୋଚକ ସାଜିଛନ୍ତି ବ୍ୟାଟ୍ସମ୍ୟାନ୍ କେ.ଏଲ୍. ରାହୁଲ। ନ୍ୟୁଜିଲାଣ୍ଡ ବିପକ୍ଷ ଟି୨୦ ସିରିଜରେ ସେ ଦଳ ପାଇଁ କେବଳ ଓପନିଂ କରୁନାହାନ୍ତି, ଉଇକେଟ୍କିପିଂରେ ମଧ୍ୟ ଭଲ ପ୍ରଦର୍ଶନ କରୁଛନ୍ତି। ଋଷଭ ପନ୍ତଙ୍କ ସ୍ଥାନରେ ଉଇକେଟକିପିଂ କରୁଥିବା ରାହୁଲଙ୍କ ପ୍ରଦର୍ଶନ ଦେଖି ଆଗାମୀ ଦିନରେ ଦଳରେ ତାଙ୍କ ସ୍ଥାନ ପକ୍କା ବୋଲି କୁହାଯାଉଛି। କାରଣ ଋଷଭ ଭଲ ଉଇକେଟ୍ କିପିଂ କରୁଥିଲେ ମଧ୍ୟ ବ୍ୟାଟିଂ ସେତେଟା ଭଲ ପ୍ରଦର୍ଶନ କରିପାରିନାହାନ୍ତି। କିନ୍ତୁ ଦିନଥିଲା ରାହୁଲଙ୍କ କ୍ରିକେଟ କ୍ୟାରିୟର ଅନ୍ଧକାର ଭିତରକୁ ଚାଲିଯାଇଥିଲା। ସେ ପୁଣି କ୍ରିକେଟକୁ କେବେ ଫେରିବେ ତାହା ଚିନ୍ତା ମଧ୍ୟ କରି ନ ଥିଲେ। ଏକ ଟେଲିଭଜନ ଶୋ’ରେ ସାଥୀ ଖେଳାଳି ହାର୍ଦ୍ଦିକ ପାଣ୍ଡ୍ୟାଙ୍କ ସହ ଯୋଗ ଦେଇଥିଲେ ରାହୁଲ। ପାଣ୍ଡ୍ୟା ମହିଳାଙ୍କ ଉପରେ ଅଶାଳୀନ ମନ୍ତବ୍ୟ ଦେଇଥିବାବେଳେ ଏହାକୁ ସମର୍ଥନ କରିଥିଲେ ରାହୁଲ। ଯାହାକୁ ନେଇ ବେଶ୍ ଚର୍ଚ୍ଚା ହୋଇଥିଲା। ଏପରିକି ଶୋ’ ଉକ୍ତ ଏପସୋଡକୁ ପୁଣି ପ୍ରସାରଣ ନ କରିବା ପାଇଁ ନିର୍ଦ୍ଦେଶ ଦିଆଯାିଥିଲା। ଏହି ଘଟଣାପରେ କ୍ଷମା ମାଗିଥିଲେ ମଧ୍ୟ ଉଭୟଙ୍କୁ ଦୁଇଟି ମ୍ୟାଚ୍ରୁ ବାସନ୍ଦ କରିଥିଲା ବିସିସିଆଇ। ରାହୁଲ ଏହି ଘଟଣା ପରେ ଏତେ ଭାଙ୍ଗିପଡିଥିଲେ ଯେ, ଘରୁ ଦୁଇ ସପ୍ତାହ ପର୍ଯ୍ୟନ୍ତ ବାହାରି ନ ଥିଲେ। ଗୋଟିଏ ଘରେ ଶୋଇରହୁଥିଲେ। କେବଳ ରାହୁଲ ନୁହେଁ, ତାଙ୍କ ପରିବାର ଲୋକେ ମଧ୍ୟ ଏହି ଘଟଣାରେ ଭାଙ୍ଗିପଡିଥିଲେ।
