ନୂଆଦିଲ୍ଲୀ,୧୪ା୯(ପି.ଟି.): ଦିଲ୍ଲୀ ବିଶ୍ୱବିଦ୍ୟାଳୟ ଛାତ୍ର ସଂସଦ ନିର୍ବାଚନ ଫଳାଫଳ ଶୁକ୍ରବାର ପ୍ରକାଶ ପାଇଛି। ଆର୍ଏସ୍ଏସ୍ ସ୍ବୀକୃତିପ୍ରାପ୍ତ ଛାତ୍ର ସଂଗଠନ ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ (ଏବିଭିପି) ପ୍ରାର୍ଥୀ ସଭାପତି ସମେତ ୩ଟି ପଦବୀରେ ବିଜୟୀ ହୋଇଥିବାବେଳେ ସମ୍ପାଦକ ପଦବୀରେ କଂଗ୍ରେସ ସମର୍ଥତ୍ତ ଏନ୍ଏସ୍ୟୁଆଇ ପ୍ରାର୍ଥୀ ବିଜୟୀ ହୋଇଛନ୍ତି। ଭୋଟଗଣତି ହେଉଥିବା କିଙ୍ଗ୍ସଓ୍ବେ କ୍ୟାମ୍ପ ବାହାରେ ସମର୍ଥକମାନେ ଢ଼ୋଲ ବଜାଇ ନାଚି ବିଜୟ ଉତ୍ସବ ମନାଇଛନ୍ତି। ବିଶ୍ୱବିଦ୍ୟାଳୟର ଆର୍ଟ ଫାକଲ୍ଟିରୁ ବିଜୟୀ ପ୍ରାର୍ଥୀଙ୍କୁ ଶୋଭାଯାତ୍ରାରେ ନିଆଯାଇଥିଲା।
ଏବିଭିପିର ଅକ୍ଷିତ ଡାହିୟା ଛାତ୍ରସଂସଦ ସଭାପତି ନିର୍ବାଚିତ ହୋଇଛନ୍ତି। ସେ ଭାରତର ଜାତୀୟ ଛାତ୍ର ୟୁନିୟନ (ଏନ୍ଏସ୍ୟୁଆଇ) ପ୍ରାର୍ଥୀ ଚେତନା ତ୍ୟାଗୀଙ୍କୁ ୧୯ ହଜାରରୁ ଊର୍ଦ୍ଧ୍ୱ ଭୋଟ ବ୍ୟବଧାନରେ ହରାଇଛନ୍ତି। ଉପସଭାପତି ଓ ଯୁଗ୍ମ ସମ୍ପାଦକ ପଦବୀରେ ଏବିଭିପିର ପ୍ରଦୀପ ତନଓ୍ବାର ଓ ଶାବାଙ୍ଗୀ ଖରଓ୍ବାଲ ବିଜୟୀ ହୋଇଛନ୍ତି। ଏନ୍ଏସୟୁଆଇର ସମ୍ପାଦକ ପ୍ରାର୍ଥୀ ଆଶିଷ ଲାମ୍ବା ଏବିଭିପି ପ୍ରାର୍ଥୀ ଯୋଗୀ ରାଠିଙ୍କୁ ୨୦୫୩ ଭୋଟରେ ପରାଜିତ କରିଛନ୍ତି। ଗୁରୁବାର ହୋଇଥିବା ଛାତ୍ରସଂସଦ ନିର୍ବାଚନରେ ୩୯.୯୦ ପ୍ରତିଶତ ମତଦାନ ହୋଇଥିଲା, ଯାହା ଗତବର୍ଷ ତୁଳନାରେ ୪ ପ୍ରତିଶତ କମ୍ ଥିଲା। ଇଭିଏମ୍ରେ ଜାଲିଆତି ଅଭିଯୋଗ ହୋଇଥିଲା। ୧.୩ ଲକ୍ଷ ଭୋଟରଙ୍କ ପାଇଁ ୫୨ ଭୋଟଗ୍ରହଣ କେନ୍ଦ୍ର କରାଯାଇଥିଲା। ୪ ଛାତ୍ରୀଙ୍କ ସମେତ ୧୬ ଜଣ ନିର୍ବାଚନ ରଣାଙ୍ଗନରେ ଅବତୀର୍ଣ୍ଣ ହୋଇଥିଲେ।
