ନୂଆଦିଲ୍ଲୀ,୧୦।୭: ସ୍ବାମୀଙ୍କୁ ଜେଲ୍ ପଠାଇବା ପାଇଁ ଜଣେ ସ୍ତ୍ରୀ ଫିଲ୍ମ ଷ୍ଟାଇଲ୍ରେ ମିଛ ଆତ୍ମହତ୍ୟା କରିଥିଲେ। ତେବେ ପରେ ପୋଲିସ ତାଙ୍କୁ ବେଙ୍ଗାଲୁର୍ରୁ ଜୀବିତ ଅବସ୍ଥାରେ ଗିରଫ କରିଛି। ଜୁଲାଇ ୫ରୁ ଦିଲ୍ଲୀର ଜଣେ ମହିଳା କୋମଲ ନିଖୋଜ ଥିବା ନେଇ ମାମଲା ଦାଏର ହୋଇଥିଲା। ପୋଲିସ ହିଡେନ୍ ନଦୀ ପୋଲ ଉପରୁ ତାଙ୍କ କାର୍କୁ ଜୁଲାଇ ୬ରେ ଜବତ କରିଥିଲା। କାର୍ରେ କୋମଲ ସ୍ବାମୀ ଏବଂ ଶାଶୁଘର ସଦସ୍ୟଙ୍କ ଯୋଗୁ ଆତ୍ମହତ୍ୟା କରୁଥିବା ନେଇ ଲେଖିଥିବା ଚିଠି ପୋଲିସକୁ କାର୍ରୁ ମିଳିଥିଲା। ପୋଲିସ ୩ ଦିନ ପର୍ଯ୍ୟନ୍ତ ନଦୀରେ ଖୋଜିବା ପରେ ମଧ୍ୟ ମୃତଦେହ ପାଇ ନ ଥିଲା। ଏନେଇ ପୋଲିସ ବ୍ୟାଙ୍କରେ କାମ କରୁଥିବା ତାଙ୍କ ସ୍ବାମୀ ଅଭିଷେକ ଚୌଧୁରୀ ଏବଂ ପରିବାରଙ୍କୁ ପଚରା ଉଚରା ଆରମ୍ଭ କରିଥିଲା। ମାତ୍ର କୋମଲ ଅନ୍ୟ କିଛି ଲୋକଙ୍କ ସହିତ ଯୋଗାଯୋଗରେ ଥିବା ପୋଲିସ ଜାଣିପାରିଥିଲା। ପରେ ଏକ ପୋଲିସ ଦଳ ବେଙ୍ଗାଲୁର୍ରେ ପହଞ୍ଚି ସେଠାରୁ କୋମଲଙ୍କୁ ଗିରଫ କରିଛନ୍ତି।
