ପଟ୍ଟାଙ୍ଗି, ୧୧।୩(ଡି.ଏନ୍.ଏ.): କୋରାପୁଟ ଜିଲା ପଟ୍ଟାଙ୍ଗି ଥାନା ଅନ୍ତର୍ଗତ ୨୬ ନମ୍ବର ଜାତୀୟ ରାଜପଥଠାରୁ ସମ୍ବାଇ ପଞ୍ଚାୟତ ଅଭିମୁଖେ ଯାଇଥିବା ପ୍ରଧାନମନ୍ତ୍ରୀ ସଡ଼କ ରାସ୍ତା ଉପରୁ ତିନୋଟି ଗାଡ଼ି ସହ ବିପୁଳ ପରିମାଣର ଗଞ୍ଜେଇ ଜବତ ହୋଇଛି। ଏହି କାରବାରରେ ସମ୍ପୃକ୍ତ ସମସ୍ତ ଅଭିଯୁକ୍ତ ଫେରାର ହୋଇଯାଇଛନ୍ତି।
ସୂଚନାନୁଯାୟୀ, ଗତ ୮ ତାରିଖ ବିଳମ୍ବିତ ରାତିରେ ଉପରୋକ୍ତ ରାସ୍ତାର ସିନ୍ଦେଇ ଡୁମୁରିଗୁଡା ଗ୍ରାମ ଛକ ଉପରେ ୩ଟି ଗାଡି ବୋଲେରୋ (ନଂ.ଓଡି୧୦ଏନ୍୬୬୬୧), କାର (ନଂ.ଓଡି୦୨ଏଡି୩୭୦୫) ଏବଂ ଟ୍ରକ୍ (ଆର୍ଜେ ୦୨ ଜିଏ୬୨୬୨) ଛିଡ଼ା ହୋଇଥିଲା। ପରେ ପୋଲିସର ଏକ ଟିମ୍ ଘଟଣାସ୍ଥଳରେ ପହଞ୍ଚି ତିନୋଟି ଗାଡ଼ିକୁ ଜବତ କରିଥିଲା। ମାତ୍ର ସମସ୍ତ ଅଭିଯୁକ୍ତ ଫେରାର ହୋଇଯାଇଥିଲେ। ସମସ୍ତ ଗାଡ଼ିରୁ ୩୫୭ କିଲୋ ୪୨୫ ଗ୍ରାମ ଗଞ୍ଜେଇ ଜବତ ହୋଇଛି। ଏ ନେଇ ଥାନାରେ ନଂ.୨୬/୨୦ରେ ମାମଲା ରୁଜୁ ହୋଇଛି। ଏସ୍ଆଇ ଗୋଲକ କୁମାର ପଟ୍ଟନାୟକ ଘଟଣାର ତଦନ୍ତ କରୁଥିବା ଜଣାପଡ଼ିଛି।
