ଲକ୍ଷ୍ନୌ,୧୨ା୧୦(ପି.ଟି.): ଆତଙ୍କବାଦୀଙ୍କୁ ପାଣ୍ଠି ଯୋଗାଣରେ ସମ୍ପୃକ୍ତି ଅଭିଯୋଗରେ ଉତ୍ତରପ୍ରଦେଶ ପୋଲିସ ୪ ଜଣଙ୍କୁ ଗିରଫ କରିଛି। ସେମାନେ ହେଲେ ଉମେଦ୍ ଅଲି, ସଞ୍ଜୟ ଅଗ୍ରଓ୍ବାଲ, ସମୀର ସଲ୍ମାନି ଓ ଐରାଜ୍ ଅଲି। ଗୁରୁବାର ରାତିରେ ଲକ୍ଷ୍ମୀପୁର ଜିଲା ନିଘାସନ ଅଞ୍ଚଳରୁ ସେମାନଙ୍କୁ ଗିରଫ କରାଯାଇଥିବା ଉତ୍ତରପ୍ରଦେଶ ପୋଲିସ ଡିଜି ଓ.ପି. ସିଂ କହିଛନ୍ତି। ଏମାନେ ନେପାଳରୁ ଟଙ୍କା ଆଣି ଆତଙ୍କବାଦୀ କାର୍ଯ୍ୟରେ ଲଗାଉଥିବା ଜଣାପଡ଼ିଛି। ସେମାନଙ୍କ ଠାରୁ ଭାରତୀୟ ଓ ନେପାଳୀ ମୁଦ୍ରା ସମେତ କେତେକ ମୋବାଇଲ ଫୋନ୍ ଜବତ ହୋଇଛି। ବିଦେଶରୁ ନେପାଳରେ ଥିବା ବ୍ୟାଙ୍କ ଆକାଉଣ୍ଟକୁ ଅର୍ଥ ଆସୁଥିଲା। ଆକାଉଣ୍ଟଧାରୀଙ୍କୁ ୫ ପ୍ରତିଶତ କମିଶନ ଦିଆଯାଉଥିଲା ବୋଲି ଅଭିଯୁକ୍ତମାନେ ସ୍ବୀକାର କରିଛନ୍ତି।