କେନ୍ଦ୍ରାପଡା ଅଫିସ୍, ୨୯।୪-ଦେଶରେ ତାଲାବନ୍ଦକୁ ଇତିମଧ୍ୟରେ ମାସେ ବିତିଛି। ହେଲେ କରୋନା ସଂକ୍ରମିତଙ୍କ ସଂଖ୍ୟା ବଢୁଥିବାରୁ ତାଲାବନ୍ଦ ଅବଧି ମେ ୩ରେ ଶେଷ ହେବା ନେଇ ଆଶଙ୍କା ପ୍ରକାଶ ପାଇଛି। ସାରାଦେଶରେ ତାଲାବନ୍ଦ ଯୋଗୁ ଗାଡ଼ିମୋଟର ଚଳାଚଳ ବନ୍ଦ ରହିଥିବା ବେଳେ ଅନେକ ବ୍ୟବସାୟ ପ୍ରତିଷ୍ଠାନ ମଧ୍ୟ ବନ୍ଦ ରହିଛି। ହେଲେ ଏହି ସମୟରେ ଅନେକ ଲୋକ ଘରେ ବସିବା ଅପେକ୍ଷା ଜୀବିକା ବଦଳାଇ ପରିବାର ପ୍ରତିପୋଷଣ ପାଇଁ ନୂଆ ଜୀବିକାକୁ ଆପଣେଇ ନେଇଛନ୍ତି। କେନ୍ଦ୍ରାପଡ଼ା ଜିଲାରେ ଏଭଳି ଦୃଶ୍ୟ ଦେଖିବାକୁ ମିଳିଛି।
ବସ୍ ଚାଳକ ଶ୍ରୀଧର ବେହେରା ସହରର ଇଚ୍ଛାପୁରସ୍ଥିତ ରଥଦାଣ୍ଡରେ ପରିବା ବିକ୍ରି କରୁଛନ୍ତି। ସେହିପରି ଖଡିଅଙ୍ଗ ଛକଠାରେ ସେଲୁନ କରିଥିବା କୁଞ୍ଜବିହାରୀ ବାରିକ ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଯୋଜନାରେ କାମ କରୁଥିବା ଜଣାପଡ଼ିଛି। ସହରର ପୁରୁଣା ବସଷ୍ଟାଣ୍ଡସ୍ଥିତ ଚା’ ଦୋକାନୀ ଭୀମସେନ ବେହେରା ଫଳ ବ୍ୟବସାୟ ଆରମ୍ଭ କରିଛନ୍ତି। ଏ ସମ୍ପର୍କରେ ସହରର କମାରଖଣ୍ଡି ଗ୍ରାମର ଶ୍ରୀଧର ବେହେରା କୁହନ୍ତି ଯେ, ସେ ବସ୍ ଚାଳନା କରି ଦିନକୁ ୫୦୦ ଟଙ୍କା ରୋଜଗାର କରୁଥିଲେ। ଏଥିରେ ୪ ଜଣିଆ ପରିବାର ଚଳି ଯାଉଥିଲା। ତେବେ ତାଲାବନ୍ଦ ଫଳରେ ବସ ଚଳାଚଳ ବନ୍ଦ ରହିଛି। ପ୍ରଥମ ପର୍ଯ୍ୟାୟ ତାଲାବନ୍ଦ ସମୟରେ କୌଣସି ରୋଜଗାର ପାଇଁ ଚିନ୍ତା ନ କରି ସଞ୍ଚିତ ଅର୍ଥରେ ପରିବାର ଚଳି ଯାଉଥିଲା। କିନ୍ତୁ ଦ୍ୱିତୀୟ ପର୍ଯ୍ୟାୟ ଲକ୍ଡାଉନ୍ ଘୋଷଣା ହେବା ପରେ ଜୀବନ ପାଇଁ ଜୀବିକା ବଦଳାଇ ପରିବା ବ୍ୟବସାୟ ଆରମ୍ଭ କରିଛନ୍ତି ବୋଲି କହିଛନ୍ତି। ଦିନକୁ ମାତ୍ର ୫ ଘଣ୍ଟା ଦୋକାନ ଖୋଲୁଥିବାରୁ ଆୟ ଅଧିକ ହେଉନି। ତେବେ ଗୁଜୁରାଣ ମେଣ୍ଟିଯାଉଛି। ସେଲୁନ ମାଲିକ କୁଞ୍ଜବିହାରୀ କହିଛନ୍ତି, କରୋନା ସଂକ୍ରମଣ ଜୀବନ ଓ ଜୀବିକାକୁ ପ୍ରଭାବିତ କରିଛି। ଲକ୍ଡାଉନ୍ ଯୋଗୁ ସେଲୁନ୍ ସମ୍ପୂର୍ଣ୍ଣ ବନ୍ଦ ହୋଇଯିବା ଯୋଗୁ ଘର ଚଳାଇବା କଷ୍ଟକର ହୋଇପଡ଼ିଲା। ତେଣୁ ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମ ନିଯୁକ୍ତି ଯୋଜନାରେ ପ୍ରତିଦିନ କାମକୁ ଯାଉଛନ୍ତି ବୋଲି କୁଞ୍ଜବିହାରୀ କହିଛନ୍ତି। ସେହିପରି ପୁରୁଣା ବସଷ୍ଟାଣ୍ଡର ଚା’ ଦୋକାନୀ ଭୀମସେନ କହିଛନ୍ତି, ଖରାଦିନେ ସେ ଲସି ବ୍ୟବସାୟ କରିଥାନ୍ତି। ଏଥିରେ ଭଲ ଦି’ପଇସା ରୋଜଗାର ହୁଏ। ତେବେ ତାଲାବନ୍ଦ ଯୋଗୁ ଦୋକାନ ସମ୍ପୂର୍ଣ୍ଣ ବନ୍ଦ ରହିଥିବାରୁ ଫଳ ବ୍ୟବସାୟ ଆରମ୍ଭ କରିଛି। ଲକ୍ଡାଉନ୍ ଅବଧି ସରିଲେ ପୁଣି ଦୋକାନ ଖୋଲିବେ ବୋଲି ଭୀମସେନ କହିଛନ୍ତି।