ଲୋଇସିଂହା,୨୨।୬(ଡି.ଏନ.ଏ): ବଲାଙ୍ଗୀର ଜିଲା ଲୋଇସିଂହା ବ୍ଲକ ବୁଢ଼ିଦର ପଁଚେତ୍ ଅଧୀନ ନେଗିପାଲି ଗଁାର ଲକ୍ଷ୍ମୀ ପାଇକ(୭୦)। ତାକର ଦୁଇ ଆଏଁଖ୍ ଠିକ୍ସେ ନାଇଁ ଦିଶବାର। ଇଆଡ଼େ ବଛ୍ରେ ତଲେ ଆପ୍ନେ ଆରପାରକେ ଚାଲିଯାଇଛନ୍। ବୁର୍ଧା ଝନକ ନିସନ୍ତାନି ହେଇଥିବାର ଲାଗି ତାକର ସମସିଆ ଦୁଇଗୁନା ହେଇଯାଇଛେ। ଉନିଆ ଲୁକ୍କର ସାହାଯ୍ରେ ତାକର ଦିନ୍ ବିତୁଛେ। ସେନ୍ତା ସରକାରୀ ଯୋଜନାରେ ୫ ଶହ ଟଁକା ଭତା ଆର ଚାଉଲ ୫ କେ.ଜି. ତାହାକୁ ଉପହାସ କଲା ଲେଖେଁ ହେଉଛେ ବଲି ଗଁାବାସୀ କହିଛନ୍।
ସୂଚନା ଅନ୍ସାରେ ବୁଢ଼ିପଦର ପଁଚେତ୍ ଅଧୀନ ନେଗିପାଲି ଗଁାର ହରିଜନ ପଡ଼ାର ସ୍ବର୍ଗତ ଟିକେଲାଲକଁର ବିଧବା ମାଏକିନା ହେଉଛନ୍ ଲକ୍ଷ୍ମୀ ପାଇକ। ତାକର ପିଲାଛୁଆ ନାଇଁ। ଜମିବାଡ଼ି ନାଇଁ କହେଲେ ଚଲେ। ଏନ୍ତାଥି ଟିକେଲାଲ ଗଁାଗଁା ବୁଲି ଚୂଡ଼ି ବିକୁଥିଲେ। ସେଥ୍ରୁ ଯାହା ରୁଜଗାର ହେଉଥିଲା ଦୁଇ ବୁଢ଼ାବୁଢ଼ି ଖୁସିରେ ଚଲିଯାଉଥିଲେ। ବଏସ୍ ଅଧ୍କାର ଲାଗି ଦୁଇ ବଛର ହେଲା ଲକ୍ଷ୍ମୀକଁର ଦୁଇ ଆଏଁଖ୍ ଠିକ୍ସେ ନାଇଁ ଦିଶବାର। ସେନ୍ତା ଟିକେଲାଲ ରୋଗ୍ରେ ପଡ଼ି ଚିକିସତ୍ିତ ହେଉଥିଲେ। ସେ ଜୀବନ୍ ଯାକ ପେଟକାଟି ଯାହା ଠୁଲେଇଥିଲେ ସବୁ ଚିକିସତ୍ାରେ ସାରି ସରବ୍ସୁଅଁାତ ହେଲେ ଆର ଶେଷେ ତାକର ଜୀବନ୍ ପଲେଇଗଲା ବଲି କହିଛନ୍ ଲକ୍ଷ୍ମୀ। ଏନ୍ତାଥି ତାକର ସମସିଆ ଦୁଇଗୁନା ବଢ଼ିଯାଇଛେ। ପିଲାଛୁଆ ନାଇଁ, ଦୁଇ ଆଏଁଖ୍କେ ନାଇଁ ଦିଶବାର। ଗଁାବାସୀକର କହେବାର ହିସାବେ ଲକ୍ଷ୍ମୀକୁଁ ପଡ଼ିଶା ପରିବାର ଦେଖାରେଖା କରୁଛନ୍। ହେଲେ ସେମାନକର ପରିବାରର ଥିତି ବି ଭଲ ନୁହେ। ପରିବାରର ମୁଖିଆ ପକ୍ଷାଘାତ ରୋଗ୍ରେ ପୀଡ଼ିତ। ଏନ୍ତା ପରିସ୍ଥିତିରେ ଲକ୍ଷ୍ମୀକଁର ସେବା ଯତନ ତାହାକୁ ଭିଡ଼ ହେଇଯାଉଛେ। ହେଲେ ଲକ୍ଷ୍ମୀର କେହି ନାଇଁ, ଲାଗେଲେସର ହିସାବେ ଦେଖାଶୁନା କରବାର ଆମର ଦାଇତିଅ ବଲି ସେମାନେ କହିଛନ୍। ଲକ୍ଷ୍ମୀ ସରକାରୀ ସାହାଯ୍ କହେଲେ ମାସିକ ୫ଶହ ଟଁକା ଭତା ଆର ୫ କେ.ଜି. ଚାଉଲ ପାଉଛନ୍। ବହୁତ୍ ବଛର ତଲେ ଆପ୍ନେର ନଁାରେ ଗୁଟେ ଇନ୍ଦିରା ଆବାସ ଘର ମିଲିଥିଲା, ହେଲେ ସେଟା ଆଏଜ୍ତକ ଦରଖଁଡ଼ିଆ ହେଇ ପଡ଼ିରହିଛେ। ସେତେବେଲେ କେତେ କିସ୍ତି ଟଁକା ନାଇଁ ମିଲବାର ଲାଗି ଘର ଦରଖଁଡ଼ିଆ ହେଇ ପଡ଼ିଛେ। ସେଥିରଲାଗି ଆଏଜ୍ ମୁଇଁ ଇ ଅବସ୍ତାରେ ଭଂଗା ଦଦ୍ରା ଘରେ ଜୀବନ୍କେ ପାଏନ୍ ଛଡ଼େଇ ରହୁଛେଁ ବଲି ଲକ୍ଷ୍ମୀ କହିଥିଲେ। ସରକାରୀ ଯୋଜନାରେ ପକାଘର ଖଁଡ଼େ ଆର ଅତି କମ୍ରେ ମାସିକ ୩୫ କେ.ଜି. ଚାଉଲ ମିଲ୍ଲେ ଜୀବନ୍ ଥିବାର ତକ୍ ସନ୍ମାନ ସହିତ ବଁଚ୍ମି ବଲି ସେ କହିଛନ୍। ହେଲେ ପରଶାସନ୍ର ଦୂରଦୁରୁଷ୍ଟି ଅଭାବୁ ଏନ୍ତା ନିସାହା, ନିସନ୍ତାନି ବୁଢ଼ାବୁଢ଼ିମାନେ ବଡ଼ା ଗୁଲଗୁଲା ହେଇ ଜୀବନ୍ ବିତଉଛନ୍। ଇଥିରଲାଗି ଗଁାବାସୀକର ଭିତରେ ବି ଅସନ୍ତୋଷ ପରକାଶ ପାଉଛେ। ଯେତେ ଜଲଦି ହେବା ବିଧବା ବୁର୍ଧା ଲକ୍ଷ୍ମୀକଁର ଉପରେ ଜିଲା ପରଶାସନ ଦୁରୁଷ୍ଟି ଦେଇ ପଦକ୍ଷେପ ନେବାକେ ଗଁାବାସୀ ଗଣମାଧ୍ୟମ ଜରିଆରେ ନିବେଦନ କରିଛନ୍।