ନୂଆଦିଲ୍ଲୀ,୩୧।୫:ନରେନ୍ଦ୍ର ମୋଦିଙ୍କ ପୂର୍ବ ସରକାରରେ ମନ୍ତ୍ରୀ ଥିବା କେତେଜଣ ନେତା ଏଥର ମନ୍ତ୍ରିମଣ୍ଡଳରୁ ବାଦ୍ ପଡିଛନ୍ତି। ଏଥିସହିତ କେତେଜଣ ନୂଆ ମୁହଁକୁ ଦ୍ୱିତୀୟ ପାଳି ସରକାରରେ ସାମିଲ କରାଯାଇଛି। ବାଦ୍ ପଡିଥିବା ୧୦ ଜଣ ପୂର୍ବତନ ମନ୍ତ୍ରୀଙ୍କ ମଧ୍ୟରେ ଅଛନ୍ତି ଅରୁଣ ଜେଟ୍ଲୀ, ସୁଷମା ସ୍ବରାଜ, ସୁରେଶ ପ୍ରଭୁ, ରାଧାମୋହନ ସିଂ, ଜୁଏଲ ଓରାମ ମହେଶ ଶର୍ମା, ଜୟନ୍ତ ସିହ୍ନା, ମାନେକା ଗାନ୍ଧୀ, ଉମା ଭାରତୀ, ଅନୁପ୍ରିୟା ପଟେଲ ଏବଂ ରାଜ୍ୟବର୍ଦ୍ଧନ ସିଂ ରାଠୋର। ନୂଆ ମନ୍ତ୍ରୀମାନଙ୍କ ପାଇଁ ଉଦ୍ଦିଷ୍ଟ ମଞ୍ଚରେ ଏମାନେ ଉପସ୍ଥିତ ନ ଥିଲେ। ଅନ୍ୟପକ୍ଷରେ ପୂର୍ବତନ ବହିର୍ବ୍ୟାପାର ସଚିବ ଏସ୍. ଜୟଶଙ୍କର ନୂଆ ମନ୍ତ୍ରିମଣ୍ଡଳରେ ସ୍ଥାନ ପାଇଛନ୍ତି। ଏହା ବ୍ୟତୀତ ଭାଜପା ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହ ପ୍ରଥମ ଥର ଲାଗି କେନ୍ଦ୍ର ମନ୍ତ୍ରିମଣ୍ଡଳରେ ସାମିଲ ହୋଇଛନ୍ତି। ଅନ୍ୟମାନଙ୍କ ମଧ୍ୟରେ ଅର୍ଜୁନ ମୁଣ୍ଡା, ରତନଲାଲ କଟାରିଆ, ରମେଶ ପୋଖରିୟାଲ ନିଶଙ୍କ, ପ୍ରହଲ୍ଲାଦ ଜୋଷୀ, ଅଙ୍ଗଦି ସୁରେଶ ଚାନ୍ନବସପ୍ପା, ରାମେଶ୍ୱର ତେଲି, କୈଳାସ ଚୌଧରୀ, ଦେବୋଶ୍ରୀ ଚୌଧରୀ, ପ୍ରତାପ ଷଡଙ୍ଗୀ ପ୍ରମୁଖ କେତେଜଣ ନୂଆ ମୁହଁଙ୍କୁ ମନ୍ତ୍ରିମଣ୍ଡଳରେ ଦେଖିବାକୁ ମିଳିଛି।
୬୭ ବର୍ଷୀୟ ସୁଷମା ଦୀର୍ଘବର୍ଷ ଧରି ଦଳରେ ପ୍ରମୁଖ ଭୂମିକା ନିଭାଇବା ସହ ସରକାରରେ ଗୁରୁତ୍ୱପୂର୍ଣ୍ଣ ବହିର୍ବ୍ୟାପାର ମନ୍ତ୍ରଣାଳୟ ଦାୟିତ୍ୱରେ ଥିଲେ। ଏଥର ତାଙ୍କୁ ମନ୍ତ୍ରିମଣ୍ଡଳରେ ସାମିଲ କରାଯାଇନାହିଁ। କ’ଣ ପାଇଁ ତାଙ୍କୁ ମନ୍ତ୍ରିମଣ୍ଡଳରେ ସାମିଲ କରାଗଲା ନାହିଁ ତାହା ସ୍ପଷ୍ଟ ହୋଇ ନ ଥିବାବେଳେ ସ୍ବାସ୍ଥ୍ୟଗତ କାରଣରୁ ତାଙ୍କୁ ବାଦ୍ ଦିଆଯାଇଥାଇପାରେ ବୋଲି କୁହାଯାଉଛି। ସ୍ବାସ୍ଥ୍ୟଗତ କାରଣରୁ ସେ ଏଥର ନିର୍ବାଚନ ଲଢ଼ି ନ ଥିଲେ କି ପ୍ରଚାରରେ ମଧ୍ୟ ସାମିଲ ହୋଇ ନ ଥିଲେ। ୨୦୦୪-୨୦୧୪ ଭାଜପା ବିରୋଧୀ ଦଳରେ ଥିଲାବେଳେ ସୁଷମା ଲୋକସଭାରେ ବିରୋଧି ଦଳ ନେତ୍ରୀ ଥିଲେ। ସେହିପରି ସୁରେଶ ପ୍ରଭୁ ମଧ୍ୟ ପୂର୍ବ ସରକାରରେ ଗୁରୁତ୍ୱପୂର୍ଣ୍ଣ ରେଲଓ୍ବେ ଏବଂ ପରେ ବାଣିଜ୍ୟ, ଶିଳ୍ପ ଓ ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ଦାୟିତ୍ୱରେ ଥିଲେ। ସେହିପରି ପୂର୍ବ ସରକାରରେ ସ୍ବାସ୍ଥ୍ୟମନ୍ତ୍ରୀ ଥିବା ନଡ୍ଡା ଏଥର ମନ୍ତ୍ରିମଣ୍ଡଳରେ ସ୍ଥାନ ପାଇନାହାନ୍ତି। ପୂର୍ବତନ ଅଲିମ୍ପିଆନ ତଥା କ୍ରୀଡା, ସୂଚନା ଓ ପ୍ରସାରଣ ମନ୍ତ୍ରୀ ଥିବା ରାଠୋରଙ୍କୁ ମଧ୍ୟ ଏଥର ମନ୍ତ୍ରିମଣ୍ଡଳରେ ସ୍ଥାନ ମିଳିନାହିଁ। ପୂର୍ବତନ ପର୍ଯଟନ ଓ ସଂସ୍କୃତି ମନ୍ତ୍ରୀ ମହେଶ ଶର୍ମା, ଅର୍ଥ ରାଷ୍ଟ୍ରମନ୍ତ୍ରୀ ଜୟନ୍ତ ସିହ୍ନାଙ୍କୁ ନୂଆ ମନ୍ତ୍ରିମଣ୍ଡଳରେ ନିଆଯାଇନାହିଁ।