ନୂଆଦିଲ୍ଲୀ,୧୮-୭: କୋଇଲା ଖନନ କ୍ଷେତ୍ରରେ କାର୍ଯ୍ୟରତ ବିଶ୍ୱର ସର୍ବବୃହତ କୋଇଲା କମ୍ପାନୀ କୋଲ୍ ଇଣ୍ଡିଆ ଲିମିଟେଡକୁ ଭାଙ୍ଗି ୫ କମ୍ପାନୀ ଭାବେ ଏହାକୁ ଷ୍ଟକ ଏକ୍ସଚେଞ୍ଜରେ ତାଲିକାଭୁକ୍ତ କରିବାକୁ ସରକାର ବିଚାର କରୁଛନ୍ତି। ଏହାଦ୍ୱାରା ସରକାର ଏଥିରୁ ଅଧିକ ପୁଞ୍ଜି ଆଦାୟ କରିପାରିବେ। ଅର୍ଥ ମନ୍ତ୍ରଣାଳୟ ଅଧୀନ ଡିପାର୍ଟମେଣ୍ଟ ଅଫ୍ ଇନ୍ଭେଷ୍ଟମେଣ୍ଟ ଆଣ୍ଡ ପବ୍ଲିକ୍ ଆସେଟ୍ ମ୍ୟାନେଜମେଣ୍ଟ ପକ୍ଷରୁ ଏ ସମ୍ପର୍କରେ ଏକ ପ୍ରସ୍ତାବ ଦିଆଯିବା ପରେ କୋଲ୍ ଇଣ୍ଡିଆ ଏବଂ କୋଇଲା ମନ୍ତ୍ରଣାଳୟ ଏନେଇ ବିଚାର ଆଲୋଚନା ଚଳାଇଛି। ତେବେ ସରକାର କେବେ ସୁଦ୍ଧା ଏହାକୁ ନେଇ ନିଷ୍ପତ୍ତି ନେବେ ତାହା ଜଣାପଡିନାହିଁ। କୋଲ୍ ଇଣ୍ଡିଆର ମୋଟ କୋଇଲା ଉତ୍ପାଦନ କରୁଥିବା ମହାନଦୀ କୋଲ୍ଫିଲ୍ଡସ, ସାଉଥ ଇଷ୍ଟର୍ନ କୋଲ୍ଫିଲ୍ଡସ, ନଦର୍ନ କୋଲ୍ଫିଲ୍ଡସ ଏବଂ ସେଣ୍ଟ୍ରାଲ କୋଲ୍ଫିଲ୍ଡସକୁ ତାଲିକାଭୁକ୍ତ କରାଯିବ। ଏଥିସହିତ ୫ମ ୟୁନିଟ ଭାବେ ସେଣ୍ଟ୍ରାଲ ମାଇନ୍ ପ୍ଲାନିଂ ଆଣ୍ଡ ଡିଜାଇନ ଇନ୍ଷ୍ଟିଚ୍ୟୁଟ୍କୁ ମଧ୍ୟ ତାଲିକାଭୁକ୍ତ ହୋଇପାରେ। ୨୦୧୭ରେ ନୀତି ଆୟୋଗ ମଧ୍ୟ କୋଲ୍ ଇଣ୍ଡିଆକୁ ଭାଙ୍ଗି ଦେବା ଲାଗି ସୁପାରିସ୍ କରିଥିଲେ। ଏହାଦ୍ୱାରା ପ୍ରତ୍ୟେକ ୟୁନିଟ୍ ପରସ୍ପର ସହ ପ୍ରତିଯୋଗିତାରେ ସାମିଲ ହୋଇପାରିବ ବୋଲି ସେତେବେଳେ ଯୁକ୍ତି ଦର୍ଶାଯାଇଥିଲା। ତତ୍କାଳୀନ କୋଇଲା ମନ୍ତ୍ରୀ ପୀୟୂଷ ଗୋୟଲ ଏହି ଆଇଡିଆକୁ ସେତେବେଳେ ଖାରଜ କରିଦେଇଥିଲେ। ଚଳିତ ଆର୍ଥିକ ବର୍ଷରେ ବିଭିନ୍ନ ରାଷ୍ଟ୍ରାୟତ୍ତ ସଂସ୍ଥାର ସମ୍ପତ୍ତି ବିକି ସରକାର ପ୍ରାୟ ୧.୦୫ ଲକ୍ଷ କୋଟି ଟଙ୍କା ଆଦାୟ କରିବାକୁ ବଜେଟରେ ଲକ୍ଷ୍ୟ ଧାର୍ଯ୍ୟ କରିଛନ୍ତି। କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରାମନ୍ ତାଙ୍କ ବଜେଟ ଭାଷଣରେ ଧାର୍ଯ୍ୟ ଲକ୍ଷ୍ୟ ସମ୍ପର୍କରେ ଉଲ୍ଲେଖ କରିଥିଲେ। ସୂଚନାଥାଉ କି, କୋଲ୍ ଇଣ୍ଡିଆ ଗତ କିଛି ବର୍ଷ ହେବ କୋଇଲା ଉତ୍ପାଦନ କ୍ଷେତ୍ରରେ ଲକ୍ଷ୍ୟ ଠାରୁ ପଛେଇ ଯାଇଛି। ୨୦୧୭-୧୮ରେ ଏହା ରେକର୍ଡ ୬୦୭ ମିଲିୟନ ମେଟ୍ରିକ ଟନ କୋଇଲା ଉତ୍ପାଦନ କରିଥିଲେ ସୁଦ୍ଧା ଏହା ଧାର୍ଯ୍ୟ ଲକ୍ଷ୍ୟ ଠାରୁ ୨୨% କମ୍ ଥିଲା।