ଘଣ୍ଟାପଡା, ୧୯।୭ (ଡି.ଏନ.ଏ): ଅନିୟମିତ ବର୍ଷା ଯୋଗୁ ଘଣ୍ଟାପଡା ଅଞ୍ଚଳରେ ଧାନଚାଷ ଉଜୁଡିବାକୁ ବସିଲାଣି । ଆଷାଢ଼ ମାସ ସରି ଶ୍ରାବଣ ହେଲା, ବର୍ଷାର ନାଁ ଗନ୍ଧ ନାହିଁ । ପ୍ରଥମ ଲଘୁଚାପ ବର୍ଷାରେ ବୁଣା ହୋଇଥିବା ଧାନ ଓ ତଳି ମରିବାକୁ ବସିଲାଣି । ଲୋକେ ଏବେ କେତେକ ସ୍ଥାନରେ ଇନ୍ଦ୍ରପୂଜା, ବେଙ୍ଗବେଙ୍ଗୁଲି ବିବାହ, ଯଜ୍ଞ, ନାମ ସଂକୀର୍ତ୍ତନ ଆରମ୍ଭ କଲେଣି । ତଥାପି ବର୍ଷା ହେଉନାହିଁ । ଘଣ୍ଟାପଡା ସ୍ଥିତ ତେଲ ନଦୀରେ ମଧ୍ୟ ପାଣି ନାହିଁ । ଏପରି ପରିସ୍ଥିତିରେ ଚାଷୀମାନେ ମେଗା ପଏଣ୍ଟ ଉପରେ ଭରସା କରିଛନ୍ତି । ମାତ୍ର ୨୦୧୮ରୁ ଏହି ମେଗା ପଏଣ୍ଟ ଉଦଘାଟନ ହୋଇଥିଲେ ସୁଦ୍ଧା କାର୍ଯ୍ୟ ସମ୍ପୂର୍ଣ୍ଣ ହୋଇନାହିଁ । ଫଳରେ ମେଗା ପଏଣ୍ଟ ଚାଷୀଙ୍କ ଆବଶ୍ୟକତା ପୂରଣ କରିବାରେ ଅସମର୍ଥ । ଏହାର ପ୍ରତିବାଦରେ ଶୁକ୍ରବାର ସକାଳ ସାଢେ ୮ଟାରେ ଚାଷୀମାନେ ଘଣ୍ଟାପଡା ସ୍ଥିତ ତମ୍ବାସିନା ପାର୍ବତୀ ଗିରି ମେଗା ପ୍ରକଳ୍ପ କାର୍ଯ୍ୟାଳୟରେ ତାଲା ପକାଇ ବିକ୍ଷୋଭ ପ୍ରଦର୍ଶନ କରିଛନ୍ତି । ଘଟଣାକୁ ୧୮ ଘଣ୍ଟା ବିତିଯାଇଥିଲେ ସୁଦ୍ଧା ମେଗା ପଏଣ୍ଟ ନିର୍ମାଣକାରୀ ଏଲଏଣ୍ଡଟି ସଂସ୍ଥାର କୌଣସି ଉଚ୍ଚ ପଦସ୍ଥ କର୍ମଚାରୀ କିମ୍ବା ସରକାରୀ ଅଧିକାରୀଙ୍କ ଦେଖାନାହିଁ । ଏପରିସ୍ଥଳେ ଲୋକମାନଙ୍କ ଅସନ୍ତୋଷ ବଢିବାରେ ଲାଗିଛି । ଆସନ୍ତା ଦିନେ ଦୁଇ ଦିନ ମଧ୍ୟରେ ପାଣଇ ନ ମିଳିଲେ ସମସ୍ତ ମେଶିନକୁ ଅଚଳ କରିବାକୁ ବାଧ୍ୟ ହେବୁ ବୋଲି ଚାଷୀମାନେ ଚେତାବନୀ ଦେଇଛନ୍ତି । ଏହି ବିକ୍ଷୋଭ କାର୍ଯ୍ୟକ୍ରମରେ ଘଣ୍ଟାପଡା, ପୋଡାପଦର, ଲଣ୍ଡାପଦର, କୁନାସିନା, ସୁର୍କାଭଟ୍ଟା, ନାରଣପାଲି, ତାଲବେଡା, କୋଡିବାହାଲ, ତେନ୍ତୁଳିଖୁଣ୍ଟି ଗ୍ରାମର ଶତାଧିକ ଚାଷୀ ସାମିଲ ହୋଇଥିଲେ ।