ଭୁବନେଶ୍ୱର, ୧୮।୧୨(କ୍ରୀଡ଼ା ପ୍ରତିନିଧି)-ଜାତୀୟ ସବ୍ଜୁନିୟର ବ୍ୟାଡ୍ମିଣ୍ଟନ ଚାମ୍ପିୟନଶିପ୍ର ୩୩ତମ ସଂସ୍କରଣ ମଙ୍ଗଳବାର ଇଷ୍ଟକୋଷ୍ଟ ରେଲଓ୍ବେ ଇନ୍ଡୋର ଷ୍ଟାଡିୟମରେ ଉଦ୍ଘାଟିତ ହୋଇଛି। ମୁଖ୍ୟ ଶାସନ ସଚିବ ଅସିତ ତ୍ରିପାଠୀ ମୁଖ୍ୟ ଅତିଥିଭାବେ ଯୋଗଦେଇ ପ୍ରତିଯୋଗିତାକୁ ଉଦ୍ଘାଟନ କରିଛନ୍ତି। ବ୍ୟାଡ୍ମିଣ୍ଟନ ଆସସୋସିଏଶନ ଅଫ୍ ଇଣ୍ଡିଆ(ବିଆଇଏ)ର ଉପାଧ୍ୟକ୍ଷ ଓ.ଡି. ଶର୍ମା, ଓଡ଼ିଶା ରାଜ୍ୟ ବ୍ୟାଡ୍ମିଣ୍ଟନ ଆସୋସିଏଶନର ସଭାପତି ରୋହିତ ପୁଜାରୀ, ଟୁର୍ନାମେଣ୍ଟ କନ୍ଭେନର ରାଜେଶ ପାଟିଲ, ଓଡ଼ିଶାର ଅନ୍ତର୍ଜାତୀୟ ବ୍ୟାଡ୍ମିଣ୍ଟନ ଖେଳାଳି ଋତୁପର୍ଣ୍ଣା ପଣ୍ଡା ପ୍ରମୁଖ ଏହି ଅବସରରେ ଉପସ୍ଥିତ ଥିଲେ। ସମ୍ପ୍ରତି ଗୋପୀଚାନ୍ଦ ଏକାଡେମୀରେ ପ୍ରଶିକ୍ଷଣ ନେଉଥିବା ଋତୁପର୍ଣ୍ଣା ନିଜର ଅଭିଜ୍ଞତା ବାଣ୍ଟିବା ସହ ଯୁବ ପୀଢ଼ିର ବ୍ୟାଡ୍ମିଣ୍ଟନ ପ୍ରତିଭାଙ୍କୁ ଉତ୍ସାହିତ କରିଥିଲେ।
ରାଜ୍ୟ ସରକାରଙ୍କ କ୍ରୀଡ଼ା ଓ ଯୁବସେବା ବିଭାଗ ସହଯୋଗରେ ହେଉଥିବା ୬ ଦିନ ବିଶିଷ୍ଟ ଏହି ପ୍ରତିଯୋଗିତାରେ ବିଭିନ୍ନ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରୁ ପାଖାପାଖି ୫୦୦ ପ୍ରତିଯୋଗୀ ଅଂଶଗ୍ରହଣ କରିଛନ୍ତି। ପ୍ରତିଯୋଗିତା ଉଭୟ ରେଲଓ୍ବେ ଇନ୍ଡୋର ଷ୍ଟାଡିୟମ ଏବଂ ସହିଦ ନଗରସ୍ଥିତ ଇନ୍ଡୋର ହଲ୍ରେ ଚାଲିଛି। ପ୍ରଥମ ଦିବସରେ ୧୫ ଓ ୧୭ ବର୍ଷରୁ କମ୍ ଡବଲ୍ସ ବିଭାଗରେ ମ୍ୟାଚମାନ ଆୟୋଜିତ ହୋଇଥିଲା। ପରେ ଉଭୟ ବାଳିକା ଓ ବାଳକ ବର୍ଗରେ ସିଙ୍ଗଲ୍ସ ଇଭେଣ୍ଟ ଖେଳାଯାଇଥିଲା। ପ୍ରଥମଥରପାଇଁ ଭୁବନେଶ୍ୱରରେ ଏକ ଜାତୀୟ ବ୍ୟାଡ୍ମିଣ୍ଟନ ପ୍ରତିଯୋଗିତା ଆୟୋଜନ ହେଉଥିବାରୁ ଦର୍ଶକଙ୍କ ମହଲରେ ମଧ୍ୟ ଉତ୍ସାହ ପରିଲକ୍ଷିତ ହୋଇଛି।