ପରଜଙ୍ଗ, ୨୧।୧୦(ଡି.ଏନ.ଏ.) ପରଜଙ୍ଗ ବ୍ଲକ ପାଟରପଦା ପଞ୍ଚାୟତରେ ପ୍ରଧାନମନ୍ତ୍ରୀ ଆବାସ ଯୋଜନାରେ ଅର୍ଥ କାରବାର ହେଉଥିବା ଅଭିଯୋଗ ହୋଇଛି। ଟଙ୍କା ନ ଦେଲେ କାର୍ଯ୍ୟାଦେଶ ଦିଆଯାଉନାହିଁ। ଏ ନେଇ ସରପଞ୍ଚଙ୍କ ବିରୋଧରେ ବିଡିଓଙ୍କୁ ଫେରାଦ ହୋଇଛନ୍ତି ହିତାଧିକାରୀ। ଅଭିଯୋଗକାରୀ ସୋସିଆଲ ମିଡିଆରେ ମଧ୍ୟ ଏ ନେଇ ସ୍ବର ଉଠାଇଛନ୍ତି। ଅନ୍ୟପଟେ ଏପରି ଅଭିଯୋଗ ରାଜନୈତିକ ଅଭିସନ୍ଧିମୂଳକ ବୋଲି ସରପଞ୍ଚ ସ୍ପଷ୍ଟୀକରଣ ରଖିଛନ୍ତି, ଯାହାକୁ ନେଇ ଏବେ ଆରମ୍ଭ ହୋଇଛି ରାଜନୀତି।
ଅଭିଯୋଗ ଅନୁଯାୟୀ, ରବି ବେହେରାଙ୍କ ସ୍ତ୍ରୀ ଲବଙ୍ଗଙ୍କ ନାମରେ ପ୍ରଧାନମନ୍ତ୍ରୀ ଆବାସ ଯୋଜନା କାର୍ଯ୍ୟାଦେଶ ମଞ୍ଜୁର ହୋଇଛି। ଏଥିଲାଗି ସରପଞ୍ଚ ୭ ହଜାର ଟଙ୍କା ନେଇଥିଲେ। ଏବେ ପୁଣି ଅଧିକ ଟଙ୍କା ଦାବି କରୁଛନ୍ତି। ଦାବି ମୁତାବକ ଟଙ୍କା ନ ଦେଲେ ବିଲ୍ କରାଇ ଦେବେନାହିଁ ବୋଲି କହୁଛନ୍ତି। ଏ ନେଇ ସେ ପଞ୍ଚାୟତିରାଜ ସଚିବ ଏବଂ ବିଡିଓଙ୍କ ନିକଟରେ ଲିଖିତ ଅଭିଯୋଗ କରିଛନ୍ତି। ସେହିପରି ସୁଶାନ୍ତ ବିଶ୍ୱାଳ ଏବଂ ଟିଟୁ ଦେହୁରୀଙ୍କ ସ୍ତ୍ରୀ ଅଞ୍ଜଳି ମଧ୍ୟ ସମାନ ଅଭିଯୋଗ ଆଣିଛନ୍ତି।
ଏ ନେଇ ସରପଞ୍ଚ ଦୁଃଶାସନ ବିଶ୍ୱାଳ ସ୍ପଷ୍ଟୀକରଣରେ କୁହନ୍ତି, ଟିଟୁଙ୍କ ସ୍ତ୍ରୀ ଏବଂ ବାପାଙ୍କ ନାମରେ ପୃଥକ୍ ଭାବେ ଦୁଇଟି ଆବାସ ଗୃହ ମଞ୍ଜୁର କରାଯାଇଛି। ପ୍ରଥମ କିସ୍ତି ବାବଦକୁ ଉଭୟେ ୨୦ ହଜାର ଲେଖାଏ ଟଙ୍କା ଉଠାଇଛନ୍ତି। ହେଲେ ଏଯାଏ ଘର କାମ ଆରମ୍ଭ କରିନାହାନ୍ତି। ଏହାର କାରଣ ପଚାରିବାରୁ ସେମାନେ ଏପରି ମିଥ୍ୟା ଅଭିଯୋଗ ଆଣିଛନ୍ତି। ଗତ ଅଗଷ୍ଟ ୩୦ରେ ପଞ୍ଚାୟତ କାର୍ଯ୍ୟାଳୟରେ ବ୍ଲକ ଅଧ୍ୟକ୍ଷ ଅକ୍ଷୟ ବେହେରା, ବିଡିଓ ବସନ୍ତ କୁମାର ମଲ୍ଲିକଙ୍କ ଉପସ୍ଥିତିରେ କାର୍ଯ୍ୟାଦେଶ ବଣ୍ଟା ଯାଇଥିଲା। ସରପଞ୍ଚ ନିର୍ବାଚନରେ ହାରିଯାଇଥିବା ଜଣେ ପ୍ରତିଦ୍ୱନ୍ଦ୍ୱୀଙ୍କ ପ୍ରରୋଚନାରେ ପଡ଼ି ହିତାଧିକାରୀମାନେ ଏପରି ଅଭିଯୋଗ ଆଣିଛନ୍ତି। ତାଙ୍କୁ ବଦନାମ କରିବାକୁ ଚେଷ୍ଟା କରାଯାଉଛି। ଏ ନେଇ ସେ ଆଇନର ଆଶ୍ରୟ ନେବେ ବୋଲି କହିଛନ୍ତି। ବିଡିଓ ନିଜ ମତାମତରେ କହିଛନ୍ତି, ଅଭିଯୋଗର ପ୍ରମାଣ ଦାଖଲ କରାଯାଇନାହିଁ। ତଦନ୍ତ ପରେ ପରବର୍ତ୍ତୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।