ଡର୍ବାନ,୧୫।୨- ସ୍ଥାନୀୟ କିଙ୍ଗ୍ସମେଡ ଷ୍ଟାଡିୟମରେ ଅନୁଷ୍ଠିତ ହାଇ ସ୍କୋରିଂ ଦ୍ୱିତୀୟ ଟି୨୦ ମ୍ୟାଚ୍ରେ ଇଂଲଣ୍ଡ ୨ ରନ୍ରେ ଦକ୍ଷିଣ ଆଫ୍ରିକାକୁ ହରାଇ ଦେଇଛି। ଫଳରେ ୩ ମ୍ୟାଚ୍ ବିଶିଷ୍ଟ ସିରିଜ୍ ୧-୧ର ବରାବର ସ୍ଥିତିରେ ପହଞ୍ଚତ୍ଛି। ବିଜୟୀ ଦଳ ପାଇଁ ଅଲରାଉଣ୍ଡର ପ୍ରଦର୍ଶନ କରିଥିବା ମୋଇନ ଅଲିଙ୍କୁ ମ୍ୟାନ୍ ଅଫ୍ ଦି ମ୍ୟାଚ୍ରେ ବିବେଚିତ କରାଯାଇଛି। ଆସନ୍ତା ରବିବାର ସେଞ୍ଚୁରିୟାନଠାରେ ସିରିଜ୍ର ତୃତୀୟ ତଥା ଅନ୍ତିମ ଟି୨୦ ମ୍ୟାଚ୍ ଖେଳାଯିବ।
ଆମନ୍ତ୍ରଣ ପାଇ ପ୍ରଥମେ ବ୍ୟାଟିଂ କରିଥିବା ଇଂଲଣ୍ଡ ବ୍ୟାଟ୍ସମ୍ୟାନଙ୍କ ମଳିତ ଉଦ୍ୟମ ଯୋଗୁ ଧାର୍ଯ୍ୟ ୨୦ ଓଭରରେ ୭ ଉଇକେଟ ହରାଇ ୨୦୪ ରନ୍ କରିଥିଲା। ଦଳ ପାଇଁ ବେନ ଷ୍ଟୋକ୍ସ ୪୭*, ଜାସନ ରୟ ୪୦, ମୋଏନ ଅଲି ୩୯, ଜନି ବେୟାରଷ୍ଟୋ ୩୫ ଓ ଅଧିନାୟକ ଇଆନ ମୋର୍ଗାନ ୨୭ ରନ୍ କରିଥିଲେ। ଘରୋଇ ଦଳ ପକ୍ଷରୁ ବୋଲିଂରେ ଲୁଙ୍ଗି ଏନ୍ଗିଡି ୩ ଓ ଆଣ୍ଡିଲେ ଫେଲୁକ୍ୱାୟୋ ୨ ଉଇକେଟ ହାତେଇଥିଲେ। ଜବାବରେ ଅଧିନାୟକ କୁଇଣ୍ଟନ ଡିକକ୍ଙ୍କ ବିସ୍ଫୋରକ ୬୫ ଓ ଅନ୍ୟ ବ୍ୟାଟ୍ସମ୍ୟାନଙ୍କ ଜବରଦସ୍ତ ଉଦ୍ୟମ ସତ୍ତ୍ୱେ ଦଳ ନିର୍ଦ୍ଧାରିତ ୨୦ ଓଭର ଖେଳି ୭ ଉଇକେଟ ହରାଇ ୨୦୨ ରନ୍ କରି ବିଜୟ ଲକ୍ଷ୍ୟଠାରୁ ୩ ରନ୍ ଦୂରରେ ରହିଯାଇଥିଲା। ଅଧିନାୟକ ଡିକକ୍ ୨୨ ବଲରେ ୨୯୫ ଷ୍ଟ୍ରାଇକ ରେଟ୍ରେ ୬୫ ରନ୍ କରିଥିଲେ। ତାଙ୍କ ଇନିଂସରେ ଥିଲା ୮ ଛକା ଓ ୨ ଚୌକା। ଏହା ବ୍ୟତୀତ ରାସି ଭାନଡର ଡୁସେନ ୪୩*, ତେମ୍ବା ବାଭୁମା ୩୧, ଡ୍ବେନ ପ୍ରିଟୋରିଅସ ୨୫ ଓ ଡେଭିଡ ମିଲର ୨୧ ରନ୍ କରିଥିଲେ। ଦଳକୁ ଜିତିବା ପାଇଁ ଅନ୍ତିମ ଓଭରରେ ଦରକାର ଥିଲା ୧୫ ରନ୍। ଟମ କୁରାନଙ୍କ ପ୍ରଥମ ବଲକୁ ମିସ କରିଥିଲେ ପ୍ରିଟୋରିଅସ। ଦ୍ୱିତୀୟ ବଲରେ ଛକା, ତୃତୀୟ ବଲରେ ଚୌକା ଓ ଚତୁର୍ଥ ବଲରେ ୨ ରନ୍ ଆଦାୟ କରିଥିଲେ ପ୍ରିଟୋରିଅସ। ଫଳରେ ଦଳକୁ ଅନ୍ତିମ ଦୁଇ ବଲରେ ଜିତିବା ଲାଗି ୩ ରନ୍ ଦରକାର ଥାଏ। ମାତ୍ର ଦୁଇ ବଲରେ ଦୁଇ ଉଇକେଟ ନେଇ ଦକ୍ଷିଣ ଆଫ୍ରିକା ହାତରୁ ମ୍ୟାଚ୍ ଛଡ଼ାଇ ଆଣିଥିଲେ କୁରାନ। ବିଜୟୀ ଦଳ ଲାଗି କୁରାନ, କ୍ରିସ ଜୋର୍ଡାନ ଓ ମାର୍କ ଉଡ ୨ଟି ଲେଖାଏ ଉଇକେଟ ଅକ୍ତିଆର କରିଥିବା ବେଳେ ମୋଏନ ଗୋଟିଏ ଉଇକେଟ ନେଇଥିଲେ।