ଭବାନୀପାଟଣା,୨୭।୨(ଡି.ଏନ୍.ଏ.): କଳାହାଣ୍ଡି ଜିଲା ଭବାନୀପାଟଣା ଆର୍ଟିଓରୁ ଜଣେ ଦଲାଲଙ୍କୁ ଗିରଫ କରାଯାଇଛି। ଦଲାଲ ଜଣକ ଡ୍ରାଇଭିଂ ଲାଇସେନ୍ସ (ଡିଏଲ୍) କରାଇବାକୁ ପ୍ରକୃତ ମୂଲ୍ୟଠାରୁ ୩ଗୁଣା ଅଧିକ ଫି’ ନେଉଥିବା ବେଳେ ତାଙ୍କୁ ବୁଧବାର ଗିରଫ କରାଯାଇଛି।
ସୂଚନାନୁଯାୟୀ, ଡିଏଲ ପାଇବା ପାଇଁ ମାତ୍ର ୬୦୦ରୁ ୭୦୦ ଟଙ୍କା ଫି’ ଦେବାକୁ ପଡ଼ିଥାଏ। ହେଲେ ମଳୟ ବେହେରା ନାମକ ଜଣେ ବ୍ୟକ୍ତି ଡିଏଲ କରାଇ ଦେବାକୁ କହି ଲୋକଙ୍କଠାରୁ ୨୭୦୦ ଟଙ୍କା ଦାବି କରିଥିଲେ। ନର୍ଲାର ଉଦ୍ଧବ ହରପାଲ ନାମକ ଜଣେ ବ୍ୟକ୍ତିଙ୍କୁ ସେ ଏତେ ଟଙ୍କା ଫି’ ମାଗିଥିଲେ। ଏ ବାବଦରେ ଉଦ୍ଧବଙ୍କଠାରୁ ମଳୟ ୧୭୦୦ ଟଙ୍କା ଅଗ୍ରୀମ ମଧ୍ୟ ନେଇଥିଲେ। ତେବେ ଏନେଇ ଉଦ୍ଧବ ଭବାନୀପାଟଣା ଥାନାରେ ଅଭିଯୋଗ କରିବା ପରେ ପୋଲିସ ମଳୟଙ୍କୁ ଗିରଫ କରିଛି। ପେସାରେ ମଳୟ ଜଣେ ଓକିଲ ବୋଲି ଜଣାପଡ଼ିଛି। ତାଙ୍କଠାରୁ ପୋଲିସ ୧୭୦୦ ଟଙ୍କା ଜବତ କରି ଉଦ୍ଧବଙ୍କୁ ଫେରାଇଛି। ଏନେଇ ଟାଉନ ଥାନା ପୋଲିସ ଏକ ମାମଲା ଦାୟର କରି ମଳୟଙ୍କୁ ଗିରଫ କରିଛି।
