କଟକ ଅଫିସ, ୧୪।୧୧- ଜଗତ୍ପୁର ଥାନା ଅଞ୍ଚଳର ଜନୈକ ବ୍ୟକ୍ତିଙ୍କୁ ମାରଣାସ୍ତ୍ର ଦେଖାଇ ଧମକ ଦେବା ଓ ଦାଦାବଟି ମାଗିବା ଅଭିଯୋଗରେ ପୋଲିସ ଏକ ଗ୍ୟାଙ୍ଗର ୬ ଜଣଙ୍କୁ ବୁଧବାର ଗିରଫ କରି କୋର୍ଟଚାଲାଣ କରିଛି। ସେମାନେ ହେଲେ ଜଗତ୍ପୁର ଥାନା ଅନ୍ତର୍ଗତ ଖରଡାସାହିର ଅଶୋକ କୁମାର ବେହେରା, ଶ୍ରୀଧର ବେହେରା, ଲକ୍ଷ୍ମଣପୁରର ମନୋଜ କୁମାର ସ୍ବାଇଁ, ତେଲିସାହିର କଳ୍ପତରୁ ସାହୁ, ରାଜାବଗିଚା ବଢେଇସାହିର ଦିବ୍ୟଜିତ୍ ବାରିକ ଓ ଅମିତାଭ ସ୍ବାଇଁ। ପୋଲିସ ସେମାନଙ୍କ ନିକଟରୁ ଗୋଟିଏ ପିସ୍ତଲ, ୪ଟି ମାଗାଜିନ୍, ୪ଟି ଗୁଳି, ଗୋଟିଏ ଭୁଜାଲି, ୨୪ହଜାର ଟଙ୍କା, ତିନୋଟି କାର, ତିନୋଟି ବାଇକ, ଗୋଟେ ସ୍କୁଟି, ୪ଟି ମୋବାଇଲ ଫୋନ ଜବତ କରିଛି। ଏ ନେଇ ଥାନାରେ ଏକ ମାମଲା(ନଂ.୩୭୨/୧୯) ମାମଲା ରୁଜୁ ହୋଇଛି।
ପୋଲିସ ସୂଚନା ଅନୁଯାୟୀ, ଗତ ୧ ତାରିଖରେ ଜଗତ୍ପୁର ଥାନା ଅଧୀନ ଷ୍ଟେଶନ ବଜାରର ଶତ୍ରୁଘ୍ନ ସାହୁ ଓ ତାଙ୍କର ଜଣେ ବନ୍ଧୁ ଆଇବି ରୋଡ ନିକଟରେ ଥିବା ଆଦିତ୍ୟ ସେଲିବ୍ରେସନ ମଣ୍ଡପକୁ ଯାଇଥିଲେ। ସେଠାରେ ସେମାନେ ଉକ୍ତ ମଣ୍ଡପର ମାଲିକଙ୍କ ସହ କିଣା ଯାଇଥିବା ଏକ ଜମିର ଦଖଲ ନେବା ସଂକ୍ରାନ୍ତରେ କଥା ହେଉଥିଲେ। ଏହି ସମୟରେ ଅଭିଯୁକ୍ତମାନେ ସେଠାରେ ପହଞ୍ଚି ବନ୍ଧୁକ ଓ ମାରଣାସ୍ତ୍ର ଦେଖାଇ ଶତ୍ରୁଘ୍ନଙ୍କୁ ଦାଦାବଟି ମାଗିଥିଲେ। ସେମାନଙ୍କ ମଧ୍ୟରୁ ଅଶୋକ ଶତ୍ରୁଘ୍ନଙ୍କ ମୁଣ୍ଡରେ ବନ୍ଧୁକ ଲଗାଇ ତାଙ୍କ ପକେଟ୍ରୁ ୨ଲକ୍ଷ ଟଙ୍କା ଛଡାଇ ନେଇଥିଲେ। ଏହି ସମୟରେ ଅନ୍ୟ ଅଭିଯୁକ୍ତମାନେ ମାରଣାସ୍ତ୍ର ଦେଖାଇ ସ୍ଥାନୀୟ ଲୋକମାନଙ୍କୁ ଭୟଭୀତ କରିଥିଲେ ବୋଲି ଶତ୍ରୁଘ୍ନ ଜଗତ୍ପୁର ଥାନାରେ ଅଭିଯୋଗ କରିଥିଲେ। ଏହି ଅଭିଯୋଗକୁ ଭିତ୍ତିକରି ପୋଲିସ ବିଭିନ୍ନ ସ୍ଥାନରେ ଚଢ଼ାଉ କରି ଅଭିଯୁକ୍ତମାନଙ୍କୁ ଗିରଫ କରିଥିଲା। ଅଭିଯୁକ୍ତମାନଙ୍କ ନାମରେ ପୂର୍ବରୁ ବିଭିନ୍ନ ଥାନାରେ ଏକାଧିକ ମାମଲା ରହିଥିବା ନେଇ ଡିସିପି ଅଖିଳେଶ୍ୱର ସିଂ କହିଛନ୍ତି।