ଭୁବନେଶ୍ୱର,୨୦।୧୨(ବ୍ୟୁରୋ): ଜେଲରେ ଥିବା ଦୁର୍ଦ୍ଦାନ୍ତ ସାଗର ପରିଡାଙ୍କୁ କମିଶନରେଟ ପୋଲିସ ଏନ୍ଏସ୍ଏରେ ବୁକ୍ କରିଛି। ତାଙ୍କ ନାମରେ ୧୬ରୁ ଊର୍ଦ୍ଧ୍ୱ ମାମଲା ରହିଛି। ବିଶେଷକରି ବୋମା ମାଡ଼, ଦାଦାବଟି, ହତ୍ୟା ଉଦ୍ୟମ, ଡକାୟତି ଭଳି ୧୨ ସଙ୍ଗିନ ମାମଲାରେ ସେ ସମ୍ପୃକ୍ତ ଥିବା ପୋଲିସ କହିଛି। ସାଗର ଜେଲରୁ ବାହାରିବା ପରେ ପୁଣି ଅପରାଧ ଘଟାଉଥିବାରୁ ଏହା କମିଶନରେଟ ପୋଲିସର ଚିନ୍ତା ବଢ଼ାଇ ଦେଇଥିଲା। ସେ ରହୁଥିବା ଚନ୍ଦ୍ରଶେଖରପୁର ଅଞ୍ଚଳରେ ଆତଙ୍କ ଖେଳାଉଥିଲେ। ସାଧାରଣ ଲୋକଙ୍କ ଜୀବନ ପ୍ରତି ବିପଦ ଆଶଙ୍କା କରି କମିଶନରେଟ ପୋଲିସ ତାଙ୍କୁ ଗୁରୁବାର ଏନ୍ଏସ୍ଏରେ ବୁକ୍ କରିଥିବା କହିଛି।
ସୂଚନାଯୋଗ୍ୟ, ଗତ ୫ ଦିନ ତଳେ ସାଗର ଡମଣା ଛକରେ ଥିବା ଏକ ମଦ ଦୋକାନରେ ପଶି ମାରଣାସ୍ତ୍ର ଦେଖାଇ ଦାଦାବଟି ମାଗିଥିଲା। ଦୋକାନୀ ବଟି ଦେବାକୁ ମନା କରିବାରୁ ମଦ ବୋତଲ ଫିଙ୍ଗିବା ସହ ହତ୍ୟା ଧମକ ଦେଇଥିଲେ। ଏପରି କି ଦୋକାନ କ୍ୟାସ୍ କାଉଣ୍ଟର ଭିତରକୁ ପଶି ଲୁଟ୍ ଉଦ୍ୟମ କରିବା ସହ କର୍ମଚାରୀଙ୍କୁ ଆକ୍ରମଣ କରିଥିଲେ। ଚନ୍ଦ୍ରଶେଖରପୁର ପୋଲିସ ତାଙ୍କୁ ଗତ ସପ୍ତାହରେ ଗିରଫ କରି କୋର୍ଟଚାଲାଣ କରିଥିଲେ। ଦୁଇବର୍ଷ ମଧ୍ୟରେ ୭ଜଣଙ୍କୁ କମିଶନରେଟ ପୋଲିସ ଏନ୍ଏସ୍ଏରେ ବୁକ୍ କରିଥିବା ଜଣାପଡିଛି।