ନୂଆଦିଲ୍ଲୀ,୨-୧୦: ସରକାର ଚଳିତ ବର୍ଷ ବିଭିନ୍ନ ରାଷ୍ଟ୍ରାୟତ୍ତ ସଂସ୍ଥାଗୁଡିକରୁ ପୁଞ୍ଜି ପ୍ରତ୍ୟାହାର କରିବାକୁ ଯୋଜନା ରଖିଛନ୍ତି। ଚଳିତ ଆର୍ଥତ୍କବର୍ଷ ଏହି ଉଦ୍ୟୋଗଗୁଡିକର ଅଂଶଧନ ବିକ୍ରିରୁ ପ୍ରାୟ ୧.୦୫ ଲକ୍ଷ କୋଟି ଟଙ୍କା ସଂଗ୍ରହ କରିବାକୁ ପ୍ରସ୍ତାବ ରହିଛି। ଏହାକୁ ଧ୍ୟାନରେ ରଖି ସରକାର ନିଜର ମେଗା ଦିଓ୍ବାଲି ସେଲ ପ୍ରସ୍ତୁତିରେ ଅଛନ୍ତି। ଭାରତ ପେଟ୍ରୋଲିୟମ କର୍ପୋରେଶନ ଲିମିଟେଡ(ବିପିସିଏଲ୍) , ବିଇଏମ୍ଏଲ୍, କଣ୍ଟେନର କର୍ପୋରେଶନ ଅଫ୍ ଇଣ୍ଡିଆ (କନଙ୍କର),ଶିପିଂ କର୍ପୋରେଶନ ଅଫ୍ ଇଣ୍ଡିଆର ଭଳି କମ୍ପାନୀର ଷ୍ଟ୍ରାଟେଜିକ ସେଲ୍କୁ ସଚିବ ସ୍ତରୀୟ ଗ୍ରୁପ ମଞ୍ଜୁରୀ ପ୍ରଦାନ କରିଛି। ଏହାବାଦ ରାଷ୍ଟ୍ରାୟତ୍ତ ଏୟାର ଇଣ୍ଡିଆ ଲାଗି ଏକ୍ସପ୍ରେସନ ଅଫ୍ ଇଣ୍ଟରେଷ୍ଟ(ଇଓଆଇ) ପ୍ରସ୍ତୁତ ହେଉଛି। ସେହିଭଳି ଟିଏଚ୍ଡିସି ଇଣ୍ଡିଆ ଏବଂ ନେପ୍କୋ ଭଳି ୨ ଶକ୍ତି କମ୍ପାନୀର ଅଂଶଧନ ବିକ୍ରିକୁ ଅନୁମୋଦନ ମିଳିଛି। ଏହା ରାଷ୍ଟ୍ରାୟତ୍ତ ଏନ୍ଟିପିସି ଦ୍ୱାରା ଅଧିଗ୍ରହଣ ହୋଇପାରେ।
ଏୟାର ଇଣ୍ଡିଆ ଘରୋଇକରଣ ଲାଗି ସମସ୍ତ ଆନୁସଙ୍ଗିକ କାର୍ଯ୍ୟ ଶୀଘ୍ର ଶେଷ କରାଯିବ। ଏହା ପରେ ଇଓଆଇ ଜାରି କରାଯିବାକୁ ଲକ୍ଷ୍ୟ ରଖାଯାଇଛି। ଏହି ଉଦ୍ୟୋଗଗୁଡିକର ଅଂଶଧନ ବିକ୍ରି ପ୍ରକ୍ରିୟା କାର୍ଯ୍ୟକୁ ପ୍ରାଥମିକତା ଭିତ୍ତିରେ କରାଯାଉଥିବା ପ୍ରକ୍ରିୟା ସହ ଜଡ଼ିତ ସରକାରଙ୍କ ୨ ବରିଷ୍ଠ ଅଧିକାରୀ କହିଛନ୍ତି। ଆଗାମୀ ୧୫ ଦିନ ମଧ୍ୟରେ ଏୟାର ଇଣ୍ଡିଆର ଇଓଆଇ ତଥା ଅନ୍ୟାନ୍ୟ ଆନୁଷଙ୍ଗିକ ପ୍ରସଙ୍ଗକୁ ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହଙ୍କ ଅଧ୍ୟକ୍ଷତାରେ ଗଠିତ ସ୍ବତନ୍ତ୍ର ମେକାନିଜମ ମଞ୍ଜୁରୀ ପ୍ରଦାନ କରିବ ବୋଲି ଅଧିକାରୀ ପ୍ରକାଶ କରିଛନ୍ତି। ଏୟାର ଇଣ୍ଡିଆ ଉପରେ ୩୦,୦୦୦ କୋଟି ଟଙ୍କାର ଋଣ ଭାର ରହିଥିବା ବେଳେ ଏହା ସରକାରଙ୍କ ଦ୍ୱାରା ପରିଚାଳିତ ହେଉଛି। ଏହାକୁ କ୍ରୟ କରିବାକୁ ଚାହୁଁଥିବା ନିବେଶକଙ୍କ ଲାଗି ବିଭିନ୍ନ ପ୍ରସଙ୍ଗ ଉପରେ ସରକାର ସ୍ପଷ୍ଟ କରିବେ। ବିଇଏମ୍ଏଲ୍ ମଞ୍ଜୁରୀ ଚୂଡାନ୍ତ ସ୍ଥିତିରେ ରହିଛି। ଏହାବାଦ ନିବେଶ ଏବଂ ରାଷ୍ଟ୍ରାୟତ୍ତ ସମ୍ପତ୍ତି ପରିଚାଳନା ବିଭାଗ (ଦିପମ୍) ବିପିସିଏଲ୍, ଏସ୍ସିଆଇ ଏବଂ କନଙ୍କରର ଅଂଶଧନ ବିକ୍ରି ଲାଗି ସ୍ବତନ୍ତ୍ର ମେକାନିଜମ ସ୍ଥାପନ କରିବ।
ବିପିସିଏଲରେ ଥିବା ସରକାରଙ୍କ ଅଂଶଧନର ବର୍ତ୍ତମାନ ମାର୍କେଟ ଭାଲ୍ୟୁ ପ୍ରାୟ ୫୫,୦୦୦ କୋଟି ଟଙ୍କା ହେବ। ଷ୍ଟ୍ରାଟେଜିକ ନିବେଶକଙ୍କ ଦ୍ୱାରା କଣ୍ଟ୍ରୋଲ ପ୍ରିମିୟମ ଲାଭ କଲେ ଏହାର ପ୍ରକୃତ ମୂଲ୍ୟ ଆହୁରି ବଢିଯିବ ବୋଲି ଆକଳନ କରାଯାଇଛି। ବର୍ତ୍ତମାନ ଉକ୍ତ କମ୍ପାନୀରେ ସରକାରଙ୍କ ୫୩.୩% ଅଂଶଧନ ରହିଛି। ଏହାର ଅଂଶଧନ ବିକ୍ରି ଦ୍ୱାରା ସରକାର ପ୍ରାୟ ୬୫ ହଜାର କୋଟି ଟଙ୍କା ପର୍ଯ୍ୟନ୍ତ ସଂଗ୍ରହ କରିବାକୁ ଚାହୁଁଥିବା ଅନ୍ୟ ଜଣେ ଅଧିକାରୀ କହିଛନ୍ତି। ଏଥିଲାଗି ସଂସଦର କୌଣସି ମଞ୍ଜୁରୀ ଲୋଡା ପଡିବ ନାହିଁ। ଏହି ପ୍ରସଙ୍ଗରେ ବିଚାର ବିମର୍ଷ କରିବା ପରେ ଏହା ଜଣାପଡିଛି ବୋଲି ସେ ପ୍ରକାଶ କରିଛନ୍ତି। ଏହାବାଦ ବିଇଏମ୍ଏଲ୍ରେ ସରକାରଙ୍କ ୫୪% ଅଂଶଧନ ଥିବା ବେଳେ ଏହାର ବଜାର ମୂଲ୍ୟ ୨,୧୦୦ କୋଟି ହେବ। ସେହିଭଳି କଙ୍କରରେ ୫୪.୮% (ମୂଲ୍ୟ- ୨୦,୦୦୦ କୋଟି), ଏସ୍ସିଆଇରେ ୭୩.୭୫%(ମୂଲ୍ୟ- ୧୩୦୦ କୋଟି) ରହିଛି। ଚଳିତ ଆର୍ଥତ୍କ ବର୍ଷର ଆଉ ୬ ମାସ ସମୟ ବାକି ଥିବା ବେଳେ ଷ୍ଟ୍ରାଟେଜିକ ସେଲ୍ ଏବଂ ପବ୍ଲିକ ଅଫର ଲାଗି ସରକାର ପ୍ରକ୍ରିୟା ତ୍ୱରାନ୍ବିତ କରିଛନ୍ତି। କର୍ପୋରେଟ ଟିକସ ହ୍ରାସ ହେବା ପରେ ରାଜସ୍ବ କ୍ଷତିକୁ ଭରଣା କରିବା ଲାଗି ସରକାର ପୁଞ୍ଜି ପ୍ରତ୍ୟାହାର ସହ ଅନ୍ୟ ଦିଗରୁ ଅର୍ଥ ଯୋଗାଡ କରୁଛନ୍ତି। ସୋମବାର ଆଇଆର୍ସିଟିସି ଲାଗି ଇନିସିଆଲ ପବ୍ଲିକ ଅଫର(ଆଇପିଓ) ଜାରି କରାଯାଇଛି। ସୂଚନା ଯୋଗ୍ୟ ସରକାର ୨୦୧୮-୧୯ ଆର୍ଥତ୍କ ବର୍ଷ ଲାଗି ୮୦,୦୦୦ କୋଟି ଟଙ୍କା ଏବଂ ୨୦୧୭-୧୮ ଲାଗି ୧ ଲକ୍ଷ କୋଟି ଟଙ୍କାର ପୁଞ୍ଜି ପ୍ରତ୍ୟାହାର ଲକ୍ଷ୍ୟ ଧାର୍ଯ୍ୟ କରିଥିଲେ। ଚଳିତ ବର୍ଷର ଧାର୍ଯ୍ୟ ଲକ୍ଷ ଏହାଠାରୁ ଅଧିକ ରହିଛି।