ନୂଆଗାଁ,୧୪ା୭ (ଡି.ଏନ.ଏ.): ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନାରେ ନୂଆଗାଁ ବ୍ଲକରେ ହେଉଥିବା ରାସ୍ତାକାର୍ଯ୍ୟ ନିମ୍ନମାନର ଯୋଗୁ ଜନ ଅସନ୍ତୋଷ ବଢିବାରେ ଲାଗିଛି। କୋରଡା ପଞ୍ଚାୟତ ରକ୍ତପଟାଠାରୁ ମୀନାଗାଡିଆ ଓ କାପ୍ତାପଲ୍ଲୀ ପଞ୍ଚାୟତର କଣବାଙ୍କଠାରୁ କାପ୍ତାପଲ୍ଲୀ ପର୍ଯ୍ୟନ୍ତ ରାସ୍ତାକାର୍ଯ୍ୟ ନିମ୍ନମାନର ହୋଇଥିବା ନେଇ କିଛିଦିନ ତଳେ ଅଭିଯୋଗ ହୋଇଥିଲା। ଏବେ ସଂପଡାଠାରେ ନିର୍ମାଣ ହେଉଥିବା ରାସ୍ତା କ୍ଷେତ୍ରରେ ମଧ୍ୟ ସମାନ ଅଭିଯୋଗ ହୋଇଛି। କାର୍ଯ୍ୟ ସରିବାର ଚାରିଦିନ ନ ଯାଉଣୁ ରାସ୍ତାରୁ ପିଚୁ ଉଠିଯାଇଥିବା ଦେଖାଯାଇଛି।
ନୟାଗଡ଼ ଜିଲା ନୂଆଗାଁ ବ୍ଲକ ମହୀପୁରଠାରୁ ପାରାଢିପି ପଞ୍ଚାୟତ ଦେଇ ସଂପଡା ଯାଏ ୯ କିଲୋମିଟର ରାସ୍ତା ନିର୍ମାଣ ପାଇଁ ପ୍ରଧାନମନ୍ତ୍ରୀ ଗ୍ରାମ ସଡକ ଯୋଜନାରେ ୩ କୋଟି ୯୧ ଲକ୍ଷ ୭୬ ହଜାର ଟଙ୍କା ବ୍ୟୟ ବରାଦ ହୋଇଛି। କାର୍ଯ୍ୟ କରିବା ପାଇଁ ଟେଣ୍ଡର ମାଧ୍ୟମରେ ଠିକାଦରଙ୍କୁ କାର୍ଯ୍ୟାଦେଶ ଦିଆଯିବା ସହ ଆର୍ଡି ବିଭାଗକୁ ତଦାରଖ ଦାୟିତ୍ୱ ଦିଆଯାଇଛି। କିନ୍ତୁ ଠିକାଦାର ନିମ୍ନମାନର କାର୍ଯ୍ୟ କରୁଥିବା ଅଭିଯୋଗ ହୋଇଛି। ଏପରି କି ଥୁଆବାରି ନିକଟରେ ଏକ ପୋଲ ନିର୍ମାଣ କରିବାର ୧୫ଦିନ ପରେ ପୋଲ ମଝିରୁ ଫାଟି ଆଁ କରିଥିବା ଦେଖିବାକୁ ମିଳିଥିଲା । ଏ ନେଇ ଅଭିଯୋଗ ହେବାରୁ ଠିକାଦାର ସେଥିରେ ପ୍ୟାଚ ପକାଇ ମାଟି ଘୋଡାଇ ଦେଇଥିଲେ। ସେହିପରି ପାରାଢିପ ନିକଟରେ ପିଚୁ ପକାଯାଉଥିବା ସମୟରେ ନିମ୍ନମାନର କାମକୁ ଗ୍ରାମବାସୀ ବିରୋଧ କରୁଥିବା ବେଳେ ବିଭାଗୀୟ ଅଧିକାରୀ କାମ ଠିକ୍ ଅଛି ବୋଲି କହିଥିଲେ। ଫଳସ୍ବରୂପ ୯ କିଲୋମିଟର ରାସ୍ତା ସମ୍ପୂର୍ଣ୍ଣ ନିମ୍ନମାନର ହୋଇଥିବା ଅଭିଯୋଗ ହେଉଛି। ରାସ୍ତାରେ ମେଟାଲ ଓ ଡଷ୍ଟ ମିଶାଇ ପକାଇବା ସହ କିଛିଦିନ ପରେ ଡଷ୍ଟ ସଫା କରି ସେଥିରେ ପ୍ରାଇମର ପକାଇବା ପରେ ପିଚୁ ମିଶ୍ରିତ ଚିପ୍ସ ଓ ପିଚୁ ମିଶ୍ରିତ ବଜୁରି ପକାଇବାର ନିୟମ ଥିବାବେଳେ ତାହା କରାଯାଇ ନାହିଁ । ଯାହା ଫଳରେ ପିଚୁ ଉଠିଯାଉଛି । ସ୍ଥାନୀୟ ଲୋକେ ବିରୋଧ କରୁଥିବାରୁ ଠିକାଦାର ରାତିଅଧିଆ କାର୍ଯ୍ୟ କରୁଥିବା ସଂପଡା ଗ୍ରାମବାସୀ କହିଛନ୍ତି। ଏହାସହ ସେମାନେ ଏହି କାର୍ଯ୍ୟର ଉଚ୍ଚସ୍ତରୀୟ ତଦନ୍ତ ଦାବି କରିଛନ୍ତି। ଏ ସମ୍ପର୍କରେ ଆର୍ଡି ଏସ୍ଡିଓ ନାରାୟଣ ମୁର୍ମୁଙ୍କୁ ପଚାରିବାରୁ ସେ କହିଥିଲେ, ନିମ୍ନମାନର ହୋଇଥିବା କାର୍ଯ୍ୟରେ ବିଲ୍ ଦିଆଯିବ ନାହିଁ ଏବଂ ପୁନର୍ବାର କାର୍ଯ୍ୟ କରିବା କଥା କହିଛନ୍ତି।