ଅନୁଗୋଳ ଅଫିସ, ୨୫ା୧୦-ତାଳଚେରସ୍ଥିତ ଏମ୍ସିଏଲ୍ର ବଳରାମ ଖଣି ଗତ ୧୨ ତାରିଖ ଠାରୁ ବନ୍ଦ ରହିଛି। କେତେଜଣ ରାଜନୈତିକ ବ୍ୟକ୍ତିଙ୍କୁ ହାତ କରି ଡଅଁରା ଗ୍ରାମର କିଛି ଯୁବକ ଏକଚାଟିଆ ରାଜୁତି ଚଳାଇବାକୁ ଖଣି ବନ୍ଦ କରିଥିବା ସୋଲଡ଼ା ଗ୍ରାମ କମିଟି, ଶ୍ରୀ ପରମେଶ୍ୱର ଶ୍ରମିକ ସଂଘ ଓ କଳାପାଟ ଟ୍ରକ୍ ମାଲିକ ସଂଘ ପକ୍ଷରୁ ଗୁରୁବାର ଖବରଦାତା ସମ୍ମିଳନୀରେ ଅଭିଯୋଗ କରାଯାଇଛି। ଏଥିସହ ଖଣି ଚାଲୁ କରିବାକୁ ସୋଲଡ଼ା ସମେତ ସତ୍ୟବାଦୀପୁର, ନାଥଗଁାଓ, ତେଲିପୁର ଓ ଖୁରିଙ୍ଗାର ଗ୍ରାମବାସୀ ଦାବି କରିଛନ୍ତି। ଶୁକ୍ରବାର ସମାଧାନ ବାଟି ନ ଫିଟିଲେ ଶନିବାର ଠାରୁ ସୋଲଡ଼ା ଗ୍ରାମବାସୀ ଆନ୍ଦୋଳନକୁ ଓହ୍ଲାଇବେ ବୋଲି ଗ୍ରାମ ସଭାପତି ଫିରୋଜ କୁମାର ପ୍ରଧାନ ଚେତାବନୀ ଦେଇଛନ୍ତି।
ଗ୍ରାମ କମିଟି, ଶ୍ରମିକ ସଂଘ ଓ ଟ୍ରକ୍ ମାଲିକ ସଂଘ ପକ୍ଷରୁ ଅଭିଯୋଗ କରାଯାଇଛି ଯେ, ବଳରାମ ଖଣିରୁ ଟ୍ରକ୍ ଯୋଗେ କୋଇଲା ପରିବହନ ଓ ପାଲ ଭିଡ଼ି ସୋଲଡ଼ା ସମେତ ସତ୍ୟବାଦୀପୁର, ନାଥଗଁାଓ, ତେଲିପୁର ଓ ଖୁରିଙ୍ଗାର ଗ୍ରାମବାସୀ ପରିବାର ପ୍ରତିପୋଷଣ କରୁଛନ୍ତି। ଏହି ଖଣିରୁ ଦୈନିକ ୨୦ ହଜାର ଟନ୍ କୋଇଲା ଉତ୍ତୋଳନ ହେବା ସହ ପ୍ରାୟ ୨୫୦ଟି ଟ୍ରକ୍ରେ ପରିବହନ କରାଯାଇଥାଏ। ମାତ୍ର କୋଇଲା ଲୋଡିଂକୁ ନେଇ ଡଅଁରା ଗ୍ରାମର କେତେଜଣ ଟ୍ରକ୍ ମାଲିକ ଖଣି ବନ୍ଦ ଆନ୍ଦୋଳନ ଚଳାଇଛନ୍ତି। ଫଳରେ ସୋଲଡ଼ା ଗ୍ରାମବାସୀଙ୍କ ଜୀବନ ଜୀବିକା ପ୍ରଭାବିତ ହୋଇଛି। ସରକାରଙ୍କ ରାଜସ୍ବ ମଧ୍ୟ ହାନି ଘଟିଛି। କଳାପାଟ ଟ୍ରକ୍ ମାଲିକ ସଂଘ ଏ ନେଇ ଜିଲା ପ୍ରଶାସନଠାରୁ ଏମ୍ସିଏଲ୍ କର୍ତ୍ତୃପକ୍ଷଙ୍କୁ ବାରମ୍ବାର ଅବଗତ କରିଥିଲେ