ଆମେରିକା: ବିବାହ ଏକ ପବିତ୍ର ବନ୍ଧନ। କୁହାଯାଏ, ଏହା ସ୍ବର୍ଗରେ ସ୍ଥିର ହୋଇଥାଏ। କିନ୍ତୁ ବିବାହ ପରେ ଯଦି ଜଣାପଡ଼େ ସେ ଆପଣଙ୍କ ରକ୍ତ ସମ୍ପର୍କୀୟ। ସେତେବେଳେ ପାଦତଳୁ ମାଟି ଖସିଗଲା ପରି ଲାଗେ। ଠିକ୍ ଏମିତି ଏକ ଘଟଣା ଘଟିଛି ଆମେରିକାର ଓ୍ବାଶିଂଟନ୍ରେ। ଦୀର୍ଘ ୩୩ ବର୍ଷର ବିବାହ ପରେ ସ୍ତ୍ରୀ ସ୍ବାମୀ ଜାଣିବାକୁ ପାଇଛନ୍ତି, ସେମାନେ ଯାଆଁଳା ଭାଇଭଉଣୀ। ଏହି ଦୁଇଜଣ ଯେତେବେଳେ ବିବାହ କରିଥିଲେ ସେତେବେଳେ ଏକା ମସିହା, ଏକା ବାର ଏବଂ ଏକା ତାରିଖରେ ସେମାନଙ୍କ ଜନ୍ମ ଜାଣି ଖୁସି ହୋଇଥିଲେ। ଏହାକୁ ଭଗବାନଙ୍କ ସଂଯୋଗ ବୋଲି ଧରି ନେଇଥିଲେ। କିନ୍ତୁ ସତ କଥା ଏବେ ଏକ କ୍ଲିନିକ୍ରୁ ଜଣାପଡ଼ିଛି। କ୍ଲିନିକ୍ର ଡାକ୍ତର ଯେତେବେଳେ ଦୁଇଜଣଙ୍କ ଜନ୍ମ ପ୍ରମାଣପତ୍ର ଦେଖିଲେ ଦୁହିଁଙ୍କ ଭିତରେ ସମାନତା ଥିବା ଜାଣିପାରିଥିଲେ। ଦୁଇଜଣଙ୍କ ଜନ୍ମ ୧୯୮୪ ମସିହାରେ ହୋଇଥିଲା। ଏକା ତାରିଖ ଆଉ ଏକା ବାରରେ। ତେଣୁ ଡାକ୍ତର ଏହି କଥାର ସତ୍ୟତା ସେମାନଙ୍କୁ ଜଣାଇଥିଲେ। ଡାକ୍ତରଙ୍କ କଥା ତାଙ୍କୁ ଚକିତ କରିଦେଇଛି।
ଏହି ଯାଆଁଳା ଭାଇଭଉଣୀ ଯେତେବେଳେ ଛୋଟ ଥିଲେ ସେମାନଙ୍କ ମାତାପିତାଙ୍କର ଏକ ସଡ଼କ ଦୁର୍ଘଟଣାରେ ମୃତ୍ୟୁ ଘଟିଥିଲା। ଏହା ପରେ ପିଲା ଦୁହିଁଙ୍କୁ କେହି କୋଳେଇ ନେବାକୁ ଇଚ୍ଛା ପ୍ରକାଶ କଲେ ନାହିଁ। ଏହାର ସମାଧାନ ପାଇଁ ଦୁଇଜଣଙ୍କୁ ଅଲଗା ସ୍ଥାନକୁ ପଠାଇ ଦିଆଯାଇଥିଲା। ଭିନ୍ନ ଭିନ୍ନ ପରିବାରରେ ଦୁହେଁ ବଢ଼ିଲେ। ଫଳରେ ବିବାହ ସମୟରେ କେହି ବି ଜାଣି ନ ଥିଲେ ସେମାନେ ଭାଇଭଉଣୀ।