ଭବାନୀପାଟଣା,୩।୭(ଡି.ଏନ୍.ଏ.): କଳାହାଣ୍ଡି ଜିଲା ଭବାନୀପାଟଣା ସଦର ବ୍ଲକ ବୋର୍ଡା ମିଲ୍କୀ ଅଞ୍ଚଳର ବିଭିନ୍ନ ସମସ୍ୟା ଓ ପ୍ରକଳ୍ପର କାର୍ଯ୍ୟକାରିତାକୁ ନେଇ ଭବାନୀପାଟଣା ବିଧାୟକ ତଥା ରାଜ୍ୟ ବିରୋଧୀ ଦଳ ନେତା ପ୍ରଦୀପ୍ତ କୁମାର ନାଏକ କେନ୍ଦ୍ର ପେଟ୍ରୋଲିୟମ ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ସାକ୍ଷାତ କରି ଦାବି ଜଣାଇଛନ୍ତି। ଅଞ୍ଚଳର ସେଁପୁରରୁ-ଟିଟିଲାଗଡ଼ ଜାତୀୟ ରାଜପଥ ନିର୍ମାଣ, ମାଦିଗୁଡ଼ା ଭାଦୁରପଦର ଘାଟ ତେଲ ନଦୀ ଉପରେ ସେତୁ ନିର୍ମାଣ, ମସିଗାଁଠାରେ ପ୍ରସ୍ତାବିତ ଉଦନ୍ତୀ ନଦୀରେ ବ୍ୟାରେଜ ନିର୍ମାଣ ନେଇ ସେ ତାଙ୍କ ଦାବି ଉପସ୍ଥାପନ କରିଥିଲେ। ଏହାଛଡା ବୋର୍ଡାରେ ନୂତନ ବ୍ଲକ କାର୍ଯ୍ୟାଳୟ ଓ ଅତିରିକ୍ତ ତହସିଲ କାର୍ଯ୍ୟାଳୟ ସ୍ଥାପନ, ପିଆଜ ଶୀତଳଭଣ୍ଡାର ନିର୍ମାଣ କରିବା ପାଇଁ ପ୍ରଧାନଙ୍କ ସହ ସଡ଼କ ପରିବହନ ମନ୍ତ୍ରୀ ନୀତିନ ଗଡକରୀ, ଜଳସମ୍ପଦ ମନ୍ତ୍ରୀ ଗଜେନ୍ଦ୍ର ସିଂ ଶେଖାୱତ୍, କେନ୍ଦ୍ର କୃଷିମନ୍ତ୍ରୀ ନରେନ୍ଦ୍ର ସିଂ ତୋମାର ଓ କେନ୍ଦ୍ର ରାଷ୍ଟ୍ର ଏମ୍ଏସ୍ଏମ୍ଇ ମନ୍ତ୍ରୀ ପ୍ରତାପ ଚନ୍ଦ୍ର ଷଡଙ୍ଗୀଙ୍କୁ ସାକ୍ଷାତ କରି ଜଣାଇଛନ୍ତି। ସାକ୍ଷାତ ସମୟରେ ବୋର୍ଡା ଜିଲା ପରିଷଦ ସଭ୍ୟ ପ୍ରତିନିଧି ବିଭୀଷଣ ସାହୁ ଉପସ୍ଥିତ ଥିଲେ।
