ଯାତ୍ରା ଜଗତର ଜଣେ ଲାସ୍ୟମୟୀ ଅଭିନେତ୍ରୀ ହେଉଛନ୍ତି ମାତନ। ରୂପ ଯେମିତି ଗୁଣ ବି ସେମିତି। ଡ୍ୟାନ୍ସରେ ଯେମିତି ଡାଏଲଗ୍ରେ ସେମିତି। ଚେହେରା ଯେମିତି ଅଭିନୟ ବି ସେମିତି। ଏବେ ଯାତ୍ରାଶ୍ରୀ ‘ବିଶ୍ୱ ଦରବାର’ କ୍ୟାମ୍ପରେ ଦେଖିବାକୁ ମିଳୁଛି ମାତନଙ୍କ ମନମତାଣିଆ ଡାଏଲଗ୍ ସାଙ୍ଗକୁ ମନଛୁଅଁା ଅଭିନୟ। ‘ତମ କଥା ଭାରି ମନେପଡୁଛି’, ‘ବରଷା ରାତିର ସାଥୀ’, ‘ଆକାଶ କଇଅଁା ଚିଲିକା ମାଛ’ ଆଦି ନାଟକରେ ସେ ଦମଦାର ରୋଲ୍ରେ ଆସୁଛନ୍ତି ମଞ୍ଚ ଉପରକୁ। ମାତନ ଅଭିନୟ କରିଥିବା ସଫଳ ନାଟକଗୁଡ଼ିକ ମଧ୍ୟରେ ରହିଛି ‘ପାପ ଭଲଲାଗେ ବାପଘରେ’, ‘ରୂପାଲୀ ଛକ ରେପ୍ କେସ୍’, ‘କଉଠୁ ଆସିଛୁ ତୁ’, ‘ପୁରୀରେ ପ୍ରେମିକା କଟକରେ ସ୍ତ୍ରୀ’, ‘ମୋ ପ୍ରେମିକା ନୀହାରିକା’ ‘ମାଟି ଅଗଣାର ବୋହୂ’, ‘ଏମିତି ନାରୀକୁ ଦୂରୁ ଜୁହାର’, ‘ମୋ ସ୍ତ୍ରୀର ଗପ ନ କହିଲେ ପାପ’, ‘ବାଇଶି ପାହାଚ’, ‘କଳଙ୍କିନୀ ଏବଂ ଆହୁରି ଅନେକ। ଉଭୟ ନେଗେଟିଭ୍ ତଥା ପଜିଟିଭ୍ ଭୂମିକାରେ ମାତନ ବେଶ ସଫଳ। ସେ ଚରିତ୍ର ଅପେକ୍ଷା ଭୂମିକାକୁ ବେଶି ଗୁରୁତ୍ୱ ଦେଇଥାନ୍ତି। ପରିବାରରେ କେହି ଚାହୁଁ ନ ଥିଲେ ମାତନ ଯାତ୍ରାକୁ ଆସନ୍ତୁ। ବାପା ତ ତାଙ୍କର ଯାତ୍ରାକୁ ଆସିବା ନେଇ ସମ୍ପୂର୍ଣ୍ଣ ବିରୋଧ କରୁଥିଲେ। ମାତ୍ର ମାତନ ଆସିଲେ ଯାତ୍ରାକୁ। ‘ଜନନୀ ଗଣନାଟ୍ୟ’ରେ ଯୋଗ ଦେଇ ଯାତ୍ରା ଜୀବନ ଆରମ୍ଭ କଲେ। ଅବଶ୍ୟ ‘ଜନନୀ ଗଣନାଟ୍ୟ’ରେ ସେ ଜଣେ ଡ୍ୟାନ୍ସର ଭାବରେ ଯୋଗଦେଇଥିଲେ। ଭାବିଥିଲେ, ଆଉ ଯାତ୍ରାକୁ ନେଇ ତାଙ୍କ ପରିବାର ପକ୍ଷରୁ ବିରୋଧ କରାଯିବନି। ହେଲେ ଦିନେ ବାପା ଆସି ପହଞ୍ଚତ୍ଲେ। କେହି କିଛି ବୁଝିବା ଆଗରୁ ତାଙ୍କୁ ଯାତ୍ରାରୁ ନେଇ ଘରକୁ ଚାଲିଗଲେ। ଏହାସତ୍ତ୍ୱେ ଯାତ୍ରାକୁ ଛାଡ଼ି ପାରି ନ ଥିଲେ ମାତନ। କିମ୍ବା ଯାତ୍ରାର ମାୟାରୁ ମୁକୁଳି ପାରି ନ ଥିଲେ। ଆସି ପହଞ୍ଚତ୍ଲେ ‘କୃଷ୍ଣ ସୁଦାମା’ ଗଣନାଟ୍ୟରେ। ‘କୃଷ୍ଣ ସୁଦାମା’ ପରେ ଆସିଲେ ‘ତ୍ରିନାଥ ଗଣନାଟ୍ୟ’କୁ। ବାସ୍, ଏହାପରେ ଆଉ କୌଣସି ଅନ୍ତରାୟ ରହିଲାନି। ସେ ଗୋଟିଏ ପରେ ଗୋଟିଏ ପାହାଚ ଚଢ଼ି ଚାଲିଲେ। ଯାତ୍ରା ଜଗତର ଆଗଧାଡ଼ିର ଅଭିନେତ୍ରୀମାନଙ୍କ ମଧ୍ୟରୁ ଏବେ ଜଣେ ହେଉଛନ୍ତି ମାତନ।