ଭୁବନ, ୩।୬(ଡି.ଏନ.ଏ.)-ଭୁବନ ରାଜସ୍ବ ବିଭାଗ ପକ୍ଷରୁ ନିଲାମ ଦିଆଯାଇଥିବା ବାଲି ଖାଦାନଗୁଡ଼ିକରୁ ବେଆଇନ ବାଲି ଚାଲାଣ ବଢ଼ିବାରେ ଲାଗିଛି। ସରକାରୀ ନୀତିନିୟମକୁ ବେଖାତିର କରି ହାଇଓ୍ବା, ଟ୍ରକ୍ରେ ମନଇଚ୍ଛା ବାଲି ଚାଲାଣ କରାଯାଉଛି। ବାଲିଘାଟରେ ମୂଲ୍ୟ ସମ୍ପର୍କିତ ଫଳକ ଲଗାଯାଇନାହିଁ କିମ୍ବା ବାଲି ଖାଦାନ ସୀମା ନିର୍ଦ୍ଧାରଣ ହୋଇନାହିଁ। ଏହାର ସୁଯୋଗ ନେଉଛନ୍ତି ନିଲାମଧାରୀ। ସେମାନେ ଆଇନ ଉଲ୍ଲଂଘନ କରି ବ୍ରାହ୍ମଣୀ ନଦୀ, ପାଣ୍ଡରା ନାଳ, ରାମିଆଳ ନଦୀରୁ ଚୋରାରେ ଦିନରାତି ବାଲି ଉଠାଉଛନ୍ତି।
ଅଧିକାଂଶ ଭାରିଯାନରେ ମାତ୍ରାଧିକ ବାଲି ବୋଝେଇ କରାଯାଉଛି। ପାଲ ମଧ୍ୟ ଘୋଡ଼ାଯାଉନାହିଁ। ଫଳରେ ସାମାନ୍ୟ ପବନରେ ବାଲି ଉଡ଼ି ରାସ୍ତାରେ ପଡୁଛି। ଏହା ପରିବେଶକୁ ପ୍ରଦୂଷିତ କରୁଛି। ସ୍ପଷ୍ଟ ଦିବାଲୋକରେ ଟ୍ରକ୍, ହାଇଓ୍ବା ଭଳି ଭାରିଯାନ ଚଳାଚଳ ଦୁର୍ଘଟଣା ବଢ଼ାଉଛି। ଦିନବେଳା ଉକ୍ତ ଗାଡ଼ି ଚଳାଚଳ ବନ୍ଦ କରିବା ନେଇ ପ୍ରଶାସନ ପକ୍ଷରୁ ପଦକ୍ଷେପ ନେବାକୁ ଅଞ୍ଚଳର ବୁଦ୍ଧିଜୀବୀ ଏବଂ ବ୍ୟବସାୟୀମାନେ ଦାବି କରିଛନ୍ତି।
ଏ ସଂକ୍ରାନ୍ତରେ ତହସିଲଦାର ଶକ୍ତିକାନ୍ତ ରାୟ କୁହନ୍ତି, ଜନସାଧାରଣଙ୍କ ଅଭିଯୋଗକୁ ଗୁରୁତ୍ୱ ଦିଆଯିବ। ବେଆଇନ ବାଲି ଖାଦାନଗୁଡ଼ିକୁ ଖୁବ୍ଶୀଘ୍ର ଚିହ୍ନଟ କରାଯିବ। ବାଲି ଚାଲାଣରେ ବ୍ୟବହୃତ ଯାନବାହନଗୁଡ଼ିକର ଟ୍ରଞ୍ଜିଟ୍ ପାସ୍ ଯାଞ୍ଚ ହେବ। ନିର୍ଦ୍ଧାରିତ ପରିମାଣଠାରୁ ଅଧିକ ବାଲି ପରିବହନ ଉପରେ କଟକଣା ଜାରି କରାଯିବ ବୋଲି ସେ ସୂଚନା ଦେଇଛନ୍ତି।