ବରଗଡ଼ ଅଫିସ୍/ସରଣ୍ଡା,୨।୬
ବରଗଡ଼ ଜିଲାରେ ରବିଋତୁ ଧାନ ସଂଗ୍ରହ ପ୍ରକ୍ରିୟା ଚାଲିଥିବାବେଳେ କେତେକ ମଣ୍ଡିରେ ଚାଷୀଙ୍କୁ ବହୁ ହଇରାଣ ହରକତ ହେବାକୁ ପଡ଼ୁଛି । ମଣ୍ଡିରେ ପଡ଼ି ରହିଥିବା ଧାନକୁ ଦୀର୍ଘଦିନ ଧରି ମିଲର୍ସ ଉଠାଉ ନଥିବା ଯୋଗୁ ଚାଷୀମାନେ ହଟହଟାର ସମ୍ମୁଖୀନ ହେଉଛନ୍ତି । ଅନ୍ୟପଟେ ବର୍ଷା ଆଶଙ୍କା ଦେଖାଯାଉ ଥିବା ଯୋଗୁ ତୁରନ୍ତ ଧାନ ଉଠା ନଗଲେ ତାହା କ୍ଷତିଗ୍ରସ୍ତ ହେବାର ଆଶଙ୍କା ଦେଖାଯାଇଛି । ତେବେ ଅତାବିରା ନିୟନ୍ତ୍ରୀତ ବଜାର କମିଟି (ଆରଏମସି) ଅଧୀନ ଗୌଡ଼ଟିକ୍ରା ମଣ୍ଡିରେ ଧାନ କିଣାବିକା ଏଭଳି ଅବ୍ୟବସ୍ଥିତ ହୋଇ ପଡ଼ିଥିବା ଯୋଗୁ ଅଞ୍ଚଳର ଚାଷୀମାନେ ସୋମବାର ଏହାର ପ୍ରତିବାଦ କରିଛନ୍ତି । ପୂର୍ବତନ ବିଧାୟକ ନିହାର ରଞ୍ଜନ ମହାନନ୍ଦଙ୍କ ନେତୃତ୍ୱରେ ଚାଷୀମାନେ ମଣ୍ଡିରେ ତାଲା ପକାଇ ଦେଇଛନ୍ତି । ଏହା ସହିତ ସେମାନେ ଧାରଣାରେ ବସିଛନ୍ତି । ଖବର ଲେଖାହେବା ସୁଦ୍ଧା (ରାତ୍ରି ସାଢ଼େ ୭ଟା) ପର୍ଯ୍ୟନ୍ତ ଆନ୍ଦୋଳନ ଜାରି ରହିଥିଲା।