ବରଗଡ଼ ଅଫିସ୍,୨୫।୪: ବରଗଡ଼ ଜିଲା ପଦ୍ମପୁର ଉପଖଣ୍ଡ ବୁଡ଼େନ ଥାନାର ଲୁହାଖାନ ଗ୍ରାମରେ ଶନିବାର ପିସ୍ତଲ, ଛୁରୀ ଭଳି ମାରଣାସ୍ତ୍ର ଦେଖାଇ ଆତଙ୍କ ସୃଷ୍ଟି କରୁଥିବା ଅଭିଯୁକ୍ତମାନଙ୍କୁ ସ୍ଥାନୀୟ ସ୍ବୟଂ ସହାୟକ ଗୋଷ୍ଠୀ(ଏସ୍ଏଚ୍ଜି) ମହିଳାମାନେ କାବୁ କରିଛନ୍ତି। ପରେ ପୋଲିସ ଘଟଣାସ୍ଥଳରେ ପହଞ୍ଚି ସେମାନଙ୍କୁ ଗିରଫ କରିଛି। ଗିରଫ ଅଭିଯୁକ୍ତମାନେ ହେଲେ, ପଦ୍ମପୁରର ପିଣ୍ଟୁ ବେହେରା, ସୁଶୀଲ ରୋହିଦାସ ଏବଂ ଲୁହାଖାନ ଗ୍ରାମର ଶୋଭାକର ମାଝୀ । ସେମାନଙ୍କ ବିରୋଧରେ ବୁଡ଼େନ ଥାନାରେ ଏକ ମାମଲା(ନଂ.୫୬/୨୦) ରୁଜୁ ହୋଇଛି। ଅଭିଯୁକ୍ତମାନଙ୍କ ପାଖରୁ ଏକ ବାଇକ୍(ନଂ-ଓଡ଼ି୧୭ଏସ୍ ୭୦୯୪), ୩ଟି ମୋବାଇଲ ଏବଂ ବ୍ୟବହୃତ ଛୁରୀ, ପିସ୍ତଲ ଜବତ୍ କରାଯାଇଛି। ଅଭିଯୁକ୍ତମାନେ ଲୁହାଖାନ ଗ୍ରାମର ଦେବାର୍ଚ୍ଚନ ନାଗଙ୍କ ଘରକୁ ଯାଇ ତାଙ୍କୁ ମାରଣାସ୍ତ୍ର ଦେଖାଇ ଭୟଭୀତ କରିଥିଲେ। ଏହାପରେ ଦେବାର୍ଚ୍ଚନଙ୍କ ସ୍ତ୍ରୀ ଭାନୁମତୀ ସାହସର ସହିତ ଗ୍ରାମର ସ୍ବୟଂ ସହାୟକ ଗୋଷ୍ଠୀକୁ ଖବର ଦେଇଥିଲେ। ଏହାପରେ ଏସ୍ଏଚଜି ମହିଳାମାନେ ସେଠାରେ ପହଞ୍ଚି ଅଭିଯୁକ୍ତମାନଙ୍କୁ କାବୁ କରିଥିଲେ ।