ଭୁବନେଶ୍ୱର,୧୬।୪(ବ୍ୟୁରୋ)- ସମଗ୍ର ଦେଶରେ କରୋନା (କୋଭିଡ-୧୯) ସଂକ୍ରମଣକୁ ଦୃଷ୍ଟିରେ ରଖି ଏପ୍ରିଲ ୧୪ତାରିଖରୁ ଦ୍ୱିତୀୟ ପର୍ଯ୍ୟାୟ ଲକ୍ଡାଉନ୍ ଘୋଷଣା କରାଯାଇଛି। ଏହି ସମୟରେ ସରକାରୀ କାର୍ଯ୍ୟାଳୟଠାରୁ ଆରମ୍ଭ କରି ଘରୋଇ ସଂସ୍ଥା, ଯାନବାହନ ସମ୍ପୂର୍ଣ୍ଣ ଚଳାଚଳ ବନ୍ଦ ରହିଛି। ଫଳରେ ଲୋକମାନେ ନିଜ ଘରେ ରହିଛନ୍ତି। ସ୍ବାସ୍ଥ୍ୟ ଓ ମୋଟରଯାନ ବୀମା ଅବଧି ସରିଥିଲେ ମଧ୍ୟ ତାହାକୁ ନବୀକରଣ ନେଇ ସମସ୍ୟା ଦେଖାଦେଇଛି। ଏହି ଲକ୍ଡାଉନ୍ ସମୟରେ ଲୋକମାନେ ନିଜର ବୀମା ନବୀକରଣ କରିବା ସମ୍ଭବ ହେଉନାହିଁ । ଏହାକୁ ଦୃଷ୍ଟିରେ ରଖି ସ୍ବାସ୍ଥ୍ୟ ଓ ମୋଟରଯାନ(ତୃତୀୟ ପକ୍ଷ) ବୀମା ପଲିସିର ନବୀକରଣ ତାରିଖକୁ କେନ୍ଦ୍ର ସରକାର ଆସନ୍ତା ମେ ୧୫ତାରିଖ ଯାଏ ଘୁଞ୍ଚାଇ ନେଇଛନ୍ତି। ଏ ନେଇ କେନ୍ଦ୍ର ସରକାରଙ୍କ ଅର୍ଥ ମନ୍ତ୍ରଣାଳୟ ପକ୍ଷରୁ ଗୁରୁବାର ଏକ ବିଜ୍ଞପ୍ତି ପ୍ରକାଶ କରାଯାଇଛି ।
ଏଥିରେ କୁହାଯାଇଛି ଯେ, କୋଭିଡ-୧୯ ଲକଡାଉନ ଜାରି ରହିଥିବାରୁ ଏଭଳି କଠିନ ସମୟରେ ବୀମାକାରୀମାନେ ସେମାନଙ୍କର ବୀମାକୁ ନବୀକରଣ କରିବା ସମ୍ଭବ ହେଉନାହିଁ । ଯଦି କୌଣସି ବୀମାଧାରୀଙ୍କ ପଲିସି ୨୦୨୦ ମାର୍ଚ୍ଚ ୨୫ରୁ ମେ ୩ ତାରିଖ ମଧ୍ୟରେ ନବୀକରଣ ଅବଧି ଶେଷ ହୋଇଥିବ । ସେମାନେ ମେ ୧୫ତାରିଖ ମଧ୍ୟରେ ନିଜର ଦେୟ ଜମା କରିପାରିବେ । ଏହି ସମୟରେ ବୀମା ଅବଧି ଶେଷ ହୋଇଥିଲେ ମଧ୍ୟ ପୂର୍ବଭଳି ବୀମା ବଳବତ୍ତର ରହିବ । ଯଦି ଏହି ସମୟରେ କୌଣସି ବୀମାଧାରୀ ବୀମା ପାଇବା ପାଇଁ ଆବେଦନ କରିବେ ତେବେ ଏହାକୁ ବୈଧ ଧରାଯିବ। ସମ୍ପୃକ୍ତ ବ୍ୟକ୍ତି ମେ ୧୫ତାରିଖ ଯାଏ ନିଜର ବୀମାର ସମସ୍ତ ସୁବିଧା ପାଇବେ ବୋଲି ବିଜ୍ଞପ୍ତିରେ କୁହାଯାଇଛି ।