ଗଞ୍ଜାମ,୭।୭(ଡି.ଏନ.ଏ.)-ଗଞ୍ଜାମ ଥାନା ଗ୍ରାସୀମ ଇଣ୍ଡଷ୍ଟ୍ରିଜରେ କାର୍ଯ୍ୟରତ କର୍ମଚାରୀ ଅଧିକ ଯୌତୁକ ଦାବିକରି ନିଜ ସ୍ତ୍ରୀଙ୍କୁ ନିର୍ଯାତନା ଦେଉଥିବା ଅଭିଯୋଗରେ ଜେଲ ଯିବା ଘଟଣା ସ୍ଥାନୀୟ ଅଞ୍ଚଳରେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଥିବା ଜଣାପଡ଼ିଛି । ଗିରଫ ବ୍ୟକ୍ତି ହେଲେ ଶିବ ଶଙ୍କର ପାଢ଼ୀ (୩୪)। ଅଭିଯୋଗ ପରେ ଗଞ୍ଜାମ ନଂ. ୫୯/୧୯ରେ ମାମଲା ରୁଜୁ କରିବା ସହ ଅଭିଯୁକ୍ତ ସ୍ବାମୀଙ୍କୁ କୋର୍ଟଚାଲାଣ କରାଯାଇଥିବା ତଦନ୍ତକାରୀ ଅଫିସର ନାରାୟଣ କହଁର ଗଣମାଧ୍ୟମକୁ ସୂଚନା ଦେଇଛନ୍ତି । ପୋଲିସଠାରୁ ମିଳିଥିବା ସୂଚନାନୁଯାୟୀ, ବ୍ରହ୍ମପୁର ଖୋଡ଼ାସିଙ୍ଗ ଅଞ୍ଚଳର ଶିବ ଶଙ୍କର ଗତ ମେ ମାସରେ ବଡ଼ଖେମୁଣ୍ଡି ଗ୍ରାମ ଭାସ୍କର ପାଣିଗ୍ରାହୀଙ୍କ ଝିଅ ଶୁଭସ୍ମିତାଙ୍କୁ ବୈଦିକ ରୀତିରେ ବିବାହ କରିଥିଲେ। ଶୁଭସ୍ମିତା ବାଙ୍ଗାଲୋରର ଏକ ଘରୋଇ କମ୍ପାନୀରେ ଚାକିରି କରୁଥିବା ବେଳେ ଶିବ ଶଙ୍କର ମଧ୍ୟ ଗଞ୍ଜାମସ୍ଥିତ ଗ୍ରାସୀମ କମ୍ପାନୀରେ କାମ କରୁଛନ୍ତି । ବିବାହ ପରଠାରୁ ଶିବ ଶଙ୍କର ଅଧିକ ଯୌତୁକ ଦାବିରେ ସ୍ତ୍ରୀଙ୍କୁ ନିର୍ଯାତନା ଦେଉଥିବା ଶୁଭସ୍ମିତା ଏତଲାରେ ଦର୍ଶାଇଛନ୍ତି । ଏତଲା ପରେ ରାତିରେ ହିଁ ପୋଲିସ ଶିବ ଶଙ୍କର ରହୁଥିବା କ୍ବାର୍ଟର୍ସରୁ ଉଠାଇ ଆଣି ଥାନାରେ ପଚରାଉଚରା କରିବା ପରେ କୋର୍ଟଚାଲାଣ କରାଯାଇଥିବା ଗଞ୍ଜାମ ପୋଲିସ ପକ୍ଷରୁ ସୂଚନା ମିଳିଛି ।