ବିଞ୍ଝାରପୁର,୧୬ା୧୨(ଡି.ଏନ.ଏ)- ବିଞ୍ଝାରପୁର ଥାନା ବରୀ ବ୍ଲକ ରତଳାଙ୍ଗ ଗ୍ରାପ ମଠସାହିରେ ଗତ ମଙ୍ଗଳବାର ରାତିରୁ ନିଖୋଜ ଥିବା କବିତା ବରାଳଙ୍କ ମୃତଦେହ ଶୁକ୍ରବାର ସ୍ଥାନୀୟ ପୋଖରୀରେ କ୍ଷତବିକ୍ଷତ ଅବସ୍ଥାରେ ମିଳିଥିଲା। ତାଙ୍କୁ ଶାଶୁଘର ଲୋକେ ଅଧିକ ଯୌତୁକ ଦାବିରେ ହତ୍ୟା କରିଥିବା ନେଇ କବିତାଙ୍କ ମା’ ଥାନାରେ ଅଭିଯୋଗ କରିଥିଲେ। ଅଭିଯୋଗକୁ ଭିତ୍ତି କରି ବିଞ୍ଝାରପୁର ପୋଲିସ କବିତାଙ୍କ ସ୍ବାମୀ ଲକ୍ଷ୍ମୀଧର ସାମଲ ଓ ଯାଆ ତପସ୍ବିନୀ ସାମଲଙ୍କୁ ଗିରଫ କରି ରବିବାର କୋର୍ଟଚାଲାଣ କରିଛି।
ପ୍ରକାଶ ଯେ, ଯାଜପୁର କ୍ଲକ ସିମିଳିଆ ପଞ୍ଚାୟତର ଚୈତନ୍ୟ ବରାଳଙ୍କ ଝିଅ କବିତା ବିଞ୍ଝାରପୁର ଥାନା ରତଳାଙ୍ଗ ମଠସାହି ଗ୍ରାମର ବାମଦେବ ସାମଲଙ୍କ ପୁଅ ଲକ୍ଷ୍ମୀଧର ସାମଲଙ୍କୁ ଗତ ୩ବର୍ଷ ତଳେ ବୈଦିକରୀତିରେ ବିବାହ କରିଥିଲେ। ବିବାହ ପରଠାରୁ ଶାଶୁଘର ପକ୍ଷରୁ ୧ଲକ୍ଷ ଟଙ୍କା ଅଧିକ ଯୌତୁକ ଦାବି କରାଯିବା ସହ କବିତାଙ୍କୁ ଶାରୀରିକ ଓ ମାନସିକ ନିର୍ଯାତନା ଦିଆଯାଉଥିଲା। ଏନେଇ ଗତ ୧୦ତାରିଖ ରାତିରେ କବିତା ନିଜ ମା’ ଜ୍ୟୋତ୍ସ୍ନାରାଣୀଙ୍କୁ ଫୋନ କରି ୧ଲକ୍ଷ ଟଙ୍କା ନ ଦେଲେ ଶାଶୁଘର ଲୋକେ ତାଙ୍କୁ ମାରିଦେବାକୁ ଧମକ ଦେଇଥିବା କହିଥିଲେ। ବୁଧବାର ସକାଳେ କବିତାଙ୍କ ବାପଘର ଲୋକେ ଝିଅ ଶାଶୁଘରେ ପହଞ୍ଚତ୍ ଥିଲେ। ସେଠାରେ ଝିଅକୁ ନ ପାଇ ପଚାରିବାରୁ ମଙ୍ଗଳବାର ରାତିରେ କବିତା କୁଆଡ଼େ ଚାଲିଯାଇଛନ୍ତି ବୋଲି ଶାଶୁଘର ଲୋକେ ସଫେଇ ଦେଇଥିଲେ। ଏହି ଘଣାରେ କବିତାଙ୍କ ମା’ ଜ୍ୟୋତ୍ସ୍ନାରାଣୀ ତାଙ୍କ ଝିଅକୁ ଶାଶୁଘର ଲୋକେ ଯୌତୁକ ଦାବିରେ ମାରିଦେଇ ନିଖୋଜ କରିଦେଇଥିବା ସନ୍ଦେହ କରି ବିଞ୍ଝାରପୁର ଥାନାରେ ଏକ ଲିଖିତ ଅଭିଯୋଗ କରିଥିଲେ। ଉକ୍ତ ଅଭିଯୋଗକୁ ଭିତ୍ତି କରି ପୋଲିସ ଏକ ମାମଲା(୩୫୯/୨୦୧୯) ରୁଜୁ କରି ତଦନ୍ତ ଚଳାଇଥିଲା। ଶୁକ୍ରବାର ସକାଳେ କବିତାଙ୍କ ମୃତଦେହ ପୋଖରୀରେ ଭାସୁଥିବା ସ୍ଥାନୀୟ ଲୋକେ ଦେଖିବାକୁ ପାଇଥିଲେ।