କଲମପୁର, ୧୮।୧ (ଡି.ଏନ୍.ଏ)-
କଳାହାଣ୍ଡି ଜିଲା କଲମପୁର ବ୍ଲକ ପଣ୍ଡିଗଁା ପଁଚେତ୍ ଅଧୀନ ପାତ୍ରବସା ଗାଁର ବାସନ୍ତି ପୁଝାରୀ(୬୫)। ଅନେକ ଦିନ୍ ହେଲା ଆପ୍ନେ ଆର ଗୁଟେବଲି ପୁଓକେ ହରେଇ ସେ ଭାଂଗି ପଡ଼ିଛନ୍। ଏନ୍ତା ପରିସ୍ଥିତିରେ ସେ ଅନେକ ସରକାରୀ ଯୋଜନାରୁ ବଁଚିତ୍ ହେଇ ବଡ଼ାଗୁଲ୍ଗୁଲା ହେଇ ଜୀବନ୍ ବିତଉଥିବାର କହିଛନ୍।
ସୂଚନା ଅନ୍ସାରେ ପାତ୍ରବସା ଗଁାର ନିସାହା ବୁରୁଧ୍ ବିଧବା ବାସନ୍ତି ପୂଝାରୀ। ବଛର କେତେଟା ତଲେ ଗୁଟେବଲି ପୁଓ ଜୟପାଟଣା ବ୍ଲକ ତାଲପଦର ପାସର କେନାଲ କାମରେ ନିୟୋଜିତ ଥିଲାବେଲେ କେହେନ୍ସି କାରନ୍ରୁ ତାକର ମୁର୍ତୁ ହେଇଥିଲା। ଇତାର ମାସକେତେ ଉତାରୁ ଆପ୍ନେ କୁମ ପୂଝାରୀ ବିଲେଇ ଚବାରେ ଖଁଡ଼ିଆଖବରା ହେଇ କଲମପୁର ଡାକ୍ତରଖାନାରେ ଚିକିଛାଧୀନ ଅବସ୍ତାରେ ଆରପାରକେ ଚାଲିଯାଇଥିଲେ। ପୁଓ ଆର ଆପ୍ନେର ମୁର୍ତୁରେ ବାସନ୍ତି ପୂରାପୂରି ଭାଂଗି ପଡ଼ିଛନ୍। ସେଦିନ୍ଠାନୁ ସେ ନିଜର ପୁରନା ଦଦ୍ରା ମାଏଟ୍ କୁରିଆରେ ନିସାହା ଜୀବନ୍ ବିତଉଛନ୍। ଇଆଡ଼େ ସରକାରୀ ସାହାଯ୍ କହେଲେ ପଁଚେତ୍ରୁ ମାସିକ ମିଲୁଥିବାର ଚାଉଲ ଦୁରା ଆର ଭତା ନ ସାହାଭରସା। ଇଆଡ଼େ ଅଭାବ ଅନାଟନାରୁ ପୁରନା ଦଦ୍ରା ମାଏଟ୍ କୁରିଆର ମରାମତି ବି କରି ନାଇଁପାରବାର। ଏନ୍ତାଥି ସେ ସରକାରୀ ଯୋଜନାରେ ଘରଖଁଡ଼େ ପାଏବାର ଲାଗି ପଁଚେତ୍ରୁ ବ୍ଲକ ତକ୍ ଭିନେ ଭିନେ ଅଧ୍କାରୀକୁଁ ଗୁହାରି କରି ନିରାଶ ହେଇଥିବାର କହିଛନ୍। ସେନ୍ତା ପୁଓ ଆର ଆପ୍ନେକେ ହରାବାର ଅନେକ୍ ଦିନ ବିତିଯାଇଥିଲେ ବି ବାସନ୍ତି ଆଏଜ୍ତକ ହରିଶ୍ଚନ୍ଦ୍ର, ପରିବାର ମଙ୍ଗଳ ଯୋଜନାର ସାହାଯ୍ ପାଏବାରୁ ବଁଚିତ୍ ହେଇ ରହିଛନ୍। ମୋର ଭାଏଗ୍ରେ ଖାଲି ଭତା ଆର ଚାଉଲ ଦୁରା ଅଛେ। ପକାଘର ଆର ଉନିଆ ସରକାରୀ ସାହାଯ୍ ମୁଇଁ ମଲା ଉତାରୁ ମିଲବା ବଲି କଁଦ୍କଁଦ୍ନିଅଁା ହେଇ ସେ କହିଥିଲେ। ଥାନୀଅ ପରଶାସନ ଇ ଦିଗେ ଦୁରୁଷ୍ଟି ଦେଇ ବାସନ୍ତିକୁଁ ଆବାସ ଯୋଜନାରେ ଘରଖଁଡ଼େ ଆର ପରିବାର ମଙ୍ଗଳ ଯୋଜନାର ସାହାଯ୍ ଯୁଗେଇ ଦେବାକେ ଗଁାବାସୀ ଦାବି କରିଛନ୍। ଇ ବାବ୍ଦେ କଲମପୁର ବିଡିଓ ହେମସାଗର ଭୋଇକୁଁ ପଚ୍ରାଲାରୁ ଘଟନାର ତଦଁତ୍ କରି ଯେତେ ଜଲଦି ହେବା ତାହାକୁ ନିୟମ ହିସାବେ ସବୁପରକାର ସରକାରୀ ସାହାଯ୍ ଯୁଗେଇ ଦିଆଯିବା ବଲି ସେ କହିଥିଲେ।