ମୁମ୍ବାଇ,୨୬ା୬(ପି.ଟି.): ମୁମ୍ବାଇର ଜଣେ ଖବରଦାତା ବଲିଉଡ୍ ଅଭିନେତା ସଲମାନ୍ ଖାନଙ୍କ ବିରୋଧରେ ଫୌଜଦାରି ମାମଲା ରୁଜୁ କରିଛନ୍ତି।
ଜେକେ ନ୍ୟୁଜ୍ ଚ୍ୟାନେଲ୍ର ମହାରାଷ୍ଟ୍ର ମୁଖ୍ୟ ଅଶୋକ ଏସ୍. ପାଣ୍ଡେ ଅନ୍ଧେରୀର ଟେନ୍ଥ କୋର୍ଟରେ ଖାନ୍ ଏବଂ ତାଙ୍କର ଦୁଇ ସହଯୋଗୀଙ୍କ ବିରୋଧରେ ମାମଲା ରୁଜୁ କରିଥିବା ତାଙ୍କ ଓକିଲ ନୀରଜ ଗୁପ୍ତା କହିଛନ୍ତି। ଜୁଲାଇ ୧୨ରେ ଏହାର ଶୁଣାଣି ହେବ।
ଅଭିଯୋଗରେ ଦର୍ଶାଇଛନ୍ତି, ଏପ୍ରିଲ ୨୪ରେ ସେ କ୍ୟାମେରାମ୍ୟାନ୍ ସୟିଦ ଇରଫାନ୍ଙ୍କ ସହିତ କାର୍ରେ ଜୁହୁରୁ କାଣ୍ଡିଭାଲି ଯାଉଥିବାବେଳେ ସଲମାନ୍ ସାଇକେଲ୍ ଚଳାଇ ଯାଉଥିଲେ। ଦୁଇ ପାର୍ଶ୍ୱରେ ଥିଲେ ତାଙ୍କର ଦୁଇ ସହଯୋଗୀ। ତେବେ ସଲମାନ୍ଙ୍କର ଏହି ଦୃଶ୍ୟ ଶୁଟିଂ କରିବା ପାଇଁ ପାଣ୍ଡେ ଅନୁମତି ମାଗିବାରୁ ଦୁଇ ସହଯୋଗୀ ରାଜି ହୋଇଯାଇଥିଲେ। ସେ ଶୁଟିଂ ଆରମ୍ଭ କରିବା ମାତ୍ରେ ଉଭୟେ ପାଣ୍ଡେଙ୍କ ଉପରେ ଆକ୍ରମଣ କରିଥିଲେ। ଏପରି କି ସଲମାନ୍ ମଧ୍ୟ ପାଣ୍ଡେଙ୍କୁ ଆକ୍ରମଣ କରି ତାଙ୍କଠାରୁ ମୋବାଇଲ ଛଡାଇ ନେଇ ଭାଙ୍ଗିଦେବାକୁ ଉଦ୍ୟମ କରିଥିଲେ।