କଟକ ଅଫିସ, ୭ା୧୨-
ବରଗଡ଼ ଓ ଢେଙ୍କାନାଳରେ ଫୁଟ୍ବଲ ଆସୋସିଏଶନ ଅଫ୍ ଓଡ଼ିଶା(ଫାଓ) ଆନୁକୂଲ୍ୟରେ ଚାଲିଥିବା ୬୦ତମ ସିନିୟର ପୁରୁଷ ଆନ୍ତଃ ଜିଲା ଫୁଟ୍ବଲ ଚାମ୍ପିୟନଶିପ ସାହାଣୀ କପ୍-୨୦୧୯ରେ ଶୁକ୍ରବାର ରାଉରକେଲା, ଦେବଗଡ଼, ଭୁବନେଶ୍ୱର ଓ ବାଲେଶ୍ୱର ବିଜୟୀ ହୋଇଛନ୍ତି। ବରଗଡ଼ର ସୋହେଲାଠାରେ ଅନୁଷ୍ଠିତ ମ୍ୟାଚ୍ରେ ରାଉରକେଲା ପେନାଲ୍ଟି ଶୁଟଆଉଟ(୪-୩ ଗୋଲ) ଜରିଆରେ ପାରାଦୀପକୁ ପରାସ୍ତ କରିଥିଲା। ନିର୍ଦ୍ଧାରିତ ସମୟ ମଧ୍ୟରେ ଉଭୟ ଦଳ ୨ଟି ଲେଖାଏ ଗୋଲ ସ୍କୋର କରିଥିଲେ। ରାଉରକେଲା ପକ୍ଷରୁ ଅର୍ପଣ ଲାକ୍ରା, ସୁଶୀଲ ଟପ୍ପୋ, ପାରାଦୀପ ପକ୍ଷରୁ ପ୍ରିୟରଞ୍ଜନ ଦାସ, ରାଜେଶ କୁମାର ମୁର୍ମୁ ଗୋଟିଏ ଲେଖାଏ ଗୋଲ ସ୍କୋର କରିଥିଲେ। ବରଗଡ଼ର ଭେଡେନ ଗ୍ରାଉଣ୍ଡରେ ଦେବଗଡ଼ ୩-୧ ଗୋଲରେ ଖୋର୍ଦ୍ଧାକୁ ହରାଇଥିଲା। ଦେବଗଡ଼ ପକ୍ଷରୁ ମହେନ୍ଦ୍ର ଖାଲକୋ, ମୀନକେତନ ବେହେରା, ଲିଙ୍ଗରାଜ ଧାରୁଆ ଗୋଟିଏ ଲେଖାଏ ଗୋଲ ଦେଇଥିଲେ। ଖୋର୍ଦ୍ଧା ପକ୍ଷରୁ ବିପିନ ନାୟକ ଏକମାତ୍ର ଗୋଲ ସ୍କୋର କରିଥିଲେ। ବରଗଡ଼ର କଦଳିପାଲି ଗ୍ରାଉଣ୍ଡରେ ଅନୁଷ୍ଠିତ ମ୍ୟାଚ୍ରେ ଭୁବନେଶ୍ୱର ୩-୧ ଗୋଲରେ କନ୍ଧମାଳକୁ ପରାସ୍ତ କରିଥିଲା। ଭୁବନେଶ୍ୱର ପକ୍ଷରୁ ରାଜୀବ ଦାସ, ନରଣ ମୁର୍ମୁ, ରାଇସେନ ଟୁଡ଼ୁ ଓ କଳାହାଣ୍ଡି ପକ୍ଷରୁ ମନୋଜ କହଁର ଗୋଟିଏ ଲେଖାଏ ଗୋଲ ଦେଇଥିଲେ। ଢେଙ୍କାନାଳ ଗ୍ରାଉଣ୍ଡରେ କଟକ ଓ ବାଲେଶ୍ୱର ମଧ୍ୟରେ ଅନୁଷ୍ଠିତ ମ୍ୟାଚ୍ ନିର୍ଦ୍ଧାରିତ ସମୟ ସୁଦ୍ଧା ୧-୧ ଗୋଲରେ ଡ୍ର ରହିଥିଲା। କଟକ ପକ୍ଷରୁ ଏସ୍.ଏସ୍ ଆଲାମ ଓ ବାଲେଶ୍ୱର ପକ୍ଷରୁ ବିଜୟ ମୁର୍ମୁ ଗୋଟିଏ ଲେଖାଏ ଗୋଲ ଦେଇଥିଲେ। ପରେ ପେନାଲ୍ଟି ଶୁଟଆଉଟରେ ବାଲେଶ୍ୱର ୬-୫ ଗୋଲରେ କଟକକୁ ହରାଇଥିଲା।