ପର୍ଲା, ୭ା୧୨ (ଡି.ଏନ.ଏ.)-
ସରକାର ଗରଭ୍ବତୀ, ପ୍ରସୂତି ଆର ଛୁଆକର ଲାଗି ଅନେକ ଆଏଁଖ୍ ଦୁର୍ଶିଆ ପଦକ୍ଷେପ ନେଉଛନ୍। ଇଥିରଲାଗି ଗଁାଗଁାରେ ସରକାର ଅଙ୍ଗନଓ୍ବାଡି କେନ୍ଦ୍ର ଖୁଲିଛନ୍। ସେନ୍ତା ଗଁାରେ ଆଶା କରମୀ ଆର ପଁଚେତ୍ ସ୍ତରରେ ସୁଆସ୍ତିଅ କରମୀ କାଯ୍ କରୁଛନ୍। ହେଲେ ଅନେକ ଜାଗାରେ ସରକାରୀ ଅଧ୍କାରୀ କରମ୍ଚାରୀକଁର ଖାମ୍ଖିଆଲି ମନଭାବ ଲାଗି ଗରଭ୍ବତୀ, ପ୍ରସୂତି ମହିଲାମାନେ ସୁଆସ୍ତିଅ ସେବା ପାଏବାରୁ ବଁଚିତ୍ ହେଉଛନ୍। ଏନ୍ତା ଗୁଟେ ଉଦାହରନ୍ ଦେଖ୍ବାକେ ମିଲିଛେ ଧର୍ମଗଡ଼ ବ୍ଲକ ଛଞ୍ଚାଣବାହାଲି ପଁଚେତ୍ ପଲସପାଣି ଗଁାରେ।
ସୂଚନା ଅନ୍ସାରେ ପଲସପାଣି ଗଁାର ୩ ଝନ୍ ମହିଲା ସରିତା ଦୂରିଆ(୨୬), ଧରିତ୍ରୀ କୋଟା(୨୦), ବାସନ୍ତି ନାଏକ(୨୫) ଗରଭ୍ବତୀ ଥିଲାବେଲେ ସୁଆସ୍ତିଅ ସେବାରୁ ବଁଚିତ୍ ହେଇ ରହିଛନ୍। ଗଁାରେ କେହି ମହିଲା ଗରଭ୍ଧାରନ କଲେ ପାସର ଅଙ୍ଗନଓ୍ବାଡି କେନ୍ଦ୍ରରେ ତାକର ନଁା ଲେଖାଯିବାର ବେବସ୍ତା ରହିଛେ। ହେଲେ ଦୁଖର କଥା ସରିତା ଦୂରିଆ ଗରଭ୍ଧାରନ କରବାର ଆଏଜ୍କେ ୫ ମାସ ବିତିଯାଇଥିଲେ ବି ସବୁ ପରକାର ସୁବିଧାରୁ ବଁଚିତ୍ ହେଇ ରହିଛନ୍। ସେନ୍ତା ଗଁାର ଧରିତ୍ରୀ କୋଟା (୩ ମାସ) ଆର ବାସନ୍ତୀ ନାଏକ (୫ ମାସ) ଗରଭ୍ଧାରନ୍ କରବାର ବିତିଯାଇଥବଲେ ବି ସୁଆସ୍ତିଅ ସେବାରୁ ବଁଚିତ୍ ହେଇଥିବାର ଅଭିଯୋଗ କରିଛନ୍। ଥାନୀଅ ଅଙ୍ଗନଓ୍ବାଡି କରମୀ ଆର ଏଏନ୍ଏମକଁର ଖାମ୍ଖିଆଲି ମନଭାବ ଲାଗି ଇ ଗରଭ୍ବତୀ ମହିଲାମାନେ ସୁଆସ୍ତିଅ ସେବା ପାଏବାରୁ ବଁଚିତ୍ ହେଇଛନ୍ ବଲି ଗଁାର ଟଙ୍କଧର ଖମାରି, ଖଲେନ୍ଦ୍ର ପୋଟା, ସୁସାନ୍ତ ଦୂରିଆ, ଦିଲୀପ ଦୁରିଆ ପରମୁଖ ଅଭିଯୋଗ କରବାର ସଂଗେ ତାକର ବିରୋଧ୍ନେ କଡ଼ା ପଦକ୍ଷେପ ନେବାକେ ଦାବି କରିଛନ୍। ଇ ବାବ୍ଦେ ପର୍ଲା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରର ଚିକିଛା ଅଧ୍କାରୀ ସଞ୍ଜୀବ କୁମାର ନାଏକକୁଁ ପଚରାଲରୁ ଘଟନାର ତଦଁତ୍ କରି ଯେତେ ଜଲଦି ହେବା ସେବା ଯୁଗେଇ ଦିଆଯିବା ବଲି ସେ କହିଥିଲେ। ଅଙ୍ଗନଓ୍ବାଡି କରମୀକୁଁ ପଚରାଲରୁ ଗରଭ୍ଧାରନ ବାବ୍ଦେ ଆମ୍କୁ ସୂଚନା ଦେଲେ ସିନା ଆମେ ଜାନ୍ମୁ ଆର ତାର ବେବସ୍ତା କରମୁ ବଲି ସେ କହିଥିଲେ। ସେନ୍ତା ଏଏନ୍ଏମକୁଁ ପଚରାଲାରୁ ଫିମାସ ଅଦଲବଦଲରେ ବାରିକପଡ଼ା ଆର ପଲସପାଣିରେ ଟୀକାକରନ ହେଉଛେ। ସେଥିରଲାଗି ଠିକ୍ ସମିଆରେ ଟୀକାକରନ ନାଇଁ ହେଇପାରବାର ବଲି ସେ କହିଥିଲେ।