ନୟାଗଡ଼ ଅଫିସ,୨୧ା୧୦: ୩ ବର୍ଷ ତଳେ ହତ୍ୟାକାଣ୍ଡ ଘଟାଇ ଫେରାର ଥିବା ଜଣେ ଯୁବକଙ୍କୁ ଟାଉନ ଥାନା ପୋଲିସ ଶନିବାର ଗିରଫ କରିଛି। ସେ ହେଲେ ଦୁର୍ଗାପ୍ରସାଦ ଗ୍ରାମର କିଶୋର ମାଝି ଓରଫ କୁମ୍ପା। ଘଟଣାରୁ ପ୍ରକାଶ ଯେ, ଘଡ଼ୁଆଳ ଗ୍ରାମର ସୁରେଶ ପଣ୍ଡା ଗ୍ରାମ ଶେଷମୁଣ୍ଡରେ ମାଙ୍କଡ଼ା ପଥର ବ୍ୟବସାୟ କରୁଥିଲେ। ସେଠାରୁ ଅଳ୍ପ ଦୂରରେ ପୂର୍ବରୁ ଉକ୍ତ ଗ୍ରାମର କୁମ୍ପା ମଧ୍ୟ ପଥର ବ୍ୟବସାୟ କରୁଥିଲେ। ସୁରେଶ ସେଠାରେ ପଥର ବେପାର କରିବାରୁ କୁମ୍ପାର ବ୍ୟବସାୟ ମାନ୍ଦା ପଡ଼ି ଯାଇଥିଲା। ଏହିଭଳି ସମୟରେ ତାଙ୍କସହ ମିଶି ବେପାର କରିବାକୁ କୁମ୍ପା ସୁରେଶଙ୍କୁ କହିଥିଲେ। ହେଲେ ସୁରେଶ ଏଥିରେ ରାଜିହୋଇ ନ ଥିଲେ। ଫଳରେ କୁମ୍ପା ସୁରେଶଙ୍କ ଉପରେ ରାଗ ରଖିଥିଲେ। ୪ ଡିସେମ୍ବର ୨୦୧୬ରେ ଦୁର୍ଗାପ୍ରସାଦର ଏକ ଢାବା ନିକଟରେ ଦୁଇଜଣଙ୍କ ମଧ୍ୟରେ ଗଣ୍ଡଗୋଳ ହୋଇଥିଲା। କୁମ୍ପା ସୁରେଶଙ୍କୁ ଗୋଇଠା ବିଧା ସହ ପଥର ମାଡ଼ କରିଥିଲେ। ଏଥିରେ ସୁରେଶ ଗୁରୁତର ହୋଇ ପଡ଼ିବାରୁ କୁମ୍ପା ସେଠାରୁ ପଳାଇଯାଇଥିଲେ। ପରେ ସ୍ଥାନୀୟ ଲୋକେ ସୁରେଶଙ୍କୁ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ। ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ। ସୁରେଶଙ୍କ ସ୍ତ୍ରୀ ଭାରତୀ ଏ ନେଇ ଟାଉନ ଥାନାରେ ଅଭିଯୋଗ କରିଥିଲେ। ପୋଲିସ ଏକ ମାମଲା (ନଂ.୨୧୦/୧୬) ରୁଜୁ କରି ତଦନ୍ତ ଚଳାଇଥିବା ବେଳେ କୁମ୍ପା ଫେରାର ହୋଇଯାଇଥିଲେ। ଶନିବାର ରାତିରେ ଦୁର୍ଗାପ୍ରସାଦସ୍ଥିତ ଏକ ଢାବାରେ କୁମ୍ପା ଖାଉଥିବାବେଳେ ଟାଉନ ପୋଲିସ ତାଙ୍କୁ ଗିରଫ କରିଥିଲା। କୁମ୍ପାଙ୍କୁ ଗିରଫ ପରେ କୋର୍ଟ ଚାଲାଣ କରାଯାଇଥିବା ଟାଉନ ଥାନା ଅଧିକାରୀ ଜୟଦୀପ ମହାନ୍ତି ପ୍ରକାଶ କରିଛନ୍ତି।
