ବାରିପଦା ଅଫିସ, ୨୩ା୪-କରୋନା ଭଳି ମହାମାରୀର ମୁକାବିଲା ଲାଗି ଡାକ୍ତର, ସ୍ବାସ୍ଥ୍ୟକର୍ମୀ ଓ ପୋଲିସ କର୍ମଚାରୀମାନେ ମୁଖ୍ୟ ଭୂମିକା ନିର୍ବାହ କରୁଛନ୍ତିି। ମୟୂରଭଞ୍ଜ ଜିଲାର ୩ପୋଲିସ କର୍ମଚାରୀ କର୍ତ୍ତବ୍ୟ ଆଗରେ ସବୁ ତୁଚ୍ଛ କରିଦେଇଥିବାରୁ ସେମାନେ ଏବେ ପ୍ରଶଂସିତ ହୋଇଛନ୍ତି। ଜଣେ ଏସ୍ଆଇ ୮ମାସର ଗର୍ଭବତୀ ହୋଇଥିବା ସତ୍ତ୍ୱେ କାର୍ଯ୍ୟ କରୁଛନ୍ତି। ସେହିଭଳି ଦୁଇ ଜଣ କନଷ୍ଟେବଳ କରୋନା ଡ୍ୟୁଟିରେ ଥିବା ଯୋଗୁ ସେମାନଙ୍କ ବାହାଘର ଘୁଞ୍ଚାଇ ଦେଇଛନ୍ତି। ମଙ୍ଗଳବାର ରାଜ୍ୟ ପୋଲିସ ମହାନିର୍ଦ୍ଦେଶକ(ଡିଜିପି) ଅଭୟ ମୟୂରଭଞ୍ଜ ଗସ୍ତରେ ଆସିଥିବା ବେଳେ କରୋନା ଯୋଦ୍ଧାମାନଙ୍କୁ ପ୍ରଶଂସା କରିବା ସହ ଟୁଇଟ୍ ମାଧ୍ୟମରେ ସେମାନଙ୍କୁ ସାଧୁବାଦ ଜଣାଇଛନ୍ତି। ୮ମାସର ଗର୍ଭବତୀ ଥିବା ମମତା ମିଶ୍ର ମୟୂରଭଞ୍ଜ ଜିଲା ବେତନଟୀ ଥାନାରେ ଏସ୍ଆଇ ଅଛନ୍ତି। ସେ କୁହନ୍ତି ଯେ, ବର୍ତ୍ତମାନ ସମୟରେ ପୋଲିସର ଭୂମିକା ଗୁରୁତ୍ୱପୂର୍ଣ୍ଣ। ତାଙ୍କୁୁ ଡିଜିପି ପ୍ରଂଶସା କରିଥିବାରୁ ସେ ଖୁସି ଅନୁଭବ କରୁଥିବା କହିଛନ୍ତି। ଏବେ ତାଙ୍କୁୁ ରାସ୍ତା ଓ ଚେକିଂ ପଏଣ୍ଟ ଦାୟିତ୍ୱରୁ ମୁକ୍ତ କରାଯାଇ ଥାନାରେ ଡ୍ୟୁଟି ଦିଆଯାଇଛି। ସେହିଭଳି କନଷ୍ଟେବଳ ଆଶିଷ କୁମାର ଦେଙ୍କ ଗତ ହୋଲି ଦିନ ନିର୍ବନ୍ଧ ହୋଇଥିବା ବେଳେ ମେ’ ୮ରେ ତାଙ୍କ ବାହାଘର ହୋଇଥାନ୍ତା। କିନ୍ତୁ କରୋନାକୁ ଦୃଷ୍ଟିରେ ରଖି ସେ ତାଙ୍କ ବାହାଘରକୁ ଘୁଞ୍ଚାଇ ଦେଇଛନ୍ତି। ବର୍ତ୍ତମାନ ପରିସ୍ଥିତିରେ ଲୋକଙ୍କ ସୁରକ୍ଷା ଆଗ ବୋଲି ଆଶିଷ କହିଛନ୍ତି। କରୋନା ମୁକାବିଲା ପାଇଁ ତାଙ୍କୁ ଯାହା ଦାୟିତ୍ୱ ଦିଆଯାଉଛି ତାହା ସେ ନିର୍ବାହ କରୁଛନ୍ତି। ଛୁଟି ନେଇ ବର୍ତ୍ତମାନ ବିବାହ କରିବା କଥା ସେ ଚିନ୍ତା କରିନାହାନ୍ତି ବୋଲି କହିଛନ୍ତି। ଆଶିଷ ଉପଜିଲାପାଳଙ୍କ ସ୍କ୍ବାଡ୍ରେ କାର୍ଯ୍ୟ କରୁଛନ୍ତି। ଆଉ ଜଣେ କନଷ୍ଟେବଳ (ଲାନ୍ସ ନାଏକ) ହେଉଛନ୍ତି ବିକାଶ କୁମାର ବାରିକ। ଗତ ୧୭ତାରିଖରେ ବିକାଶଙ୍କ ନିର୍ବନ୍ଧ ହୋଇଥିବା ବେଳେ ବାହାଘର ମେ ୮ତାରିଖରେ ସ୍ଥିର ହୋଇଥିଲା। ମାତ୍ର ସେ କର୍ତ୍ତବ୍ୟକୁ ଆଗ କରି ବାହାଘରକୁ ଘୁଞ୍ଚାଇ ଦେଇଛନ୍ତି। ସେ ବର୍ତ୍ତମାନ ଏସ୍ପିଙ୍କ ପାଟ୍ରୋଲିଂ ଟିମ୍ରେ କାର୍ଯ୍ୟ କରୁଛନ୍ତି।