କେନ୍ଦ୍ରାପଡାଅଫିସ/ରାଜକନିକା,୨୨ା୬(ଡି.ଏନ୍.ଏ.): ସରକାରୀ କାର୍ଯ୍ୟାଳୟରେ କିଭଳି ମନମୁଖି କାର୍ଯ୍ୟ ଚାଲିଛି ତାର ଏକ ଉଦାହରଣ ଦେଖିବାକୁ ମିଳିଛି କେନ୍ଦ୍ରାପଡା ଜିଲା ଅନ୍ତର୍ଗତ ରାଜକନିକା ବ୍ଲକରେ । ଏହି ବ୍ଲକର ବିଡିଓ ତାଙ୍କ ଭାଇ ବାହାଘର ପାଇଁ ଛୁଟିରେ ରହିଥିତ୍ବା ବେଳେ ଉଭୟ ବ୍ଲକ ଓ ତହସିଲ କାର୍ଯ୍ୟାଳୟର ସମସ୍ତ କର୍ମଚାରୀ ମଧ୍ୟ ଛୁଟିନେଇ ବୁଲୁଛନ୍ତି। ଫଳରେ ୪ ଦିନ ହେବ ଉଭୟ କାର୍ଯ୍ୟାଳୟରେ ତାଲା ଝୁଲୁଛି । ଏନେଇ ଲୋକେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି।
ସୂଚନାଯୋଗ୍ୟ, ରାଜକନିକା ବିଡିଓ ଏବଂ କନିକା ତହସିଲଦାର ଭାବେ ଡି.ଏସ୍. ଶୁଭଦର୍ଶୀ ଜୋଷୀ କାର୍ଯ୍ୟ କରୁଛନ୍ତି। ୨ ଗୁରୁତ୍ୱପୂର୍ଣ୍ଣ ବିଭାଗର ଦାୟିତ୍ୱରେ ଥିଲେ ମଧ୍ୟ ଏବେ ସେ ଭାଇ ବାହାଘର ପାଇଁ ଗତ ୭ ଦିନ ହେବ ଛୁଟିରେ ରହିଛନ୍ତି। ଏହାର ସୁଯୋଗ ନେଇ ଉଭୟ କାର୍ଯ୍ୟାଳୟର କର୍ମଚାରୀମାନେ ମଧ୍ୟ ଛୁଟିନେଇ ବାହାରେ ବୁଲୁଛନ୍ତି। ତହସିଲ କାର୍ଯ୍ୟାଳୟର ଗୋଟିଏ କୋଠରିରେ ଅତିରିକ୍ତ ତହସିଲଦାର ବସି ଅଫିସକୁ ଜଗି ରହିଛନ୍ତି। ଏସମ୍ପର୍କରେ ତାଙ୍କୁ ପଚରାଯାଇଥିଲେ ମଧ୍ୟ କୌଣସି ସନ୍ତୋଷଜନକ ଉତ୍ତର ମିଳିପାରି ନ ଥିଲା। ସବୁ କର୍ମଚାରୀ ଛୁଟି ଦରଖାସ୍ତ ଦେଇ ଛୁଟି ନେଇଛନ୍ତି ବୋଲି ସେ କହିଥିବା ବେଳେ ଏକାବେଳେ ସବୁ କର୍ମଚାରୀଙ୍କୁ କିପରି ଛୁଟି ଦିଆଗଲା ପ୍ରଶ୍ନର ସେ ଠିକ୍ ଉତ୍ତର ଦେଇପାରି ନଥିଲେ। ସେହିପରି ବ୍ଲକ କାର୍ଯ୍ୟାଳୟରେ ଜଳ ଓ ପରିମଳ ବିଭାଗ କକ୍ଷ ଓ ଡବ୍ଲ୍ୟୁଇଓ କକ୍ଷ ବ୍ୟତୀତ ଅନ୍ୟ ସବୁଠି ତାଲା ଝୁଲୁଥିବା ଦେଖିବାକୁ ମିଳିଛି।
ଏସମ୍ପର୍କରେ କେନ୍ଦ୍ରାପଡା ଜିଲାପାଳ ପ୍ରେମଚାନ୍ଦ ଚୌଧୁରୀ କହିଛନ୍ତି, ଘଟଣା ସମ୍ପର୍କରେ ସୂଚନା ମିଳିଛି। ଅନୁଧ୍ୟାନ କରାଯାଇ ଆଗାମୀ କାର୍ଯ୍ୟାନୁଷ୍ଠାନ ନିଆଯିବ। ତୁରନ୍ତ ଜିଲା ପ୍ରଶାସନ ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନେବାକୁ ସାଧାରଣରେ ଦାବି ହୋଇଛି।