ବର୍ଲିନ: ଜର୍ମାନୀର ରାଜକୀୟ ସଂଗ୍ରହାଳୟ ଗ୍ରୀନ୍ ବୋଲ୍ଟରେ ବଡ଼ ଧରଣର ଚୋରି ହୋଇଛି। ଦ୍ୱିତୀୟ ବିଶ୍ୱଯୁଦ୍ଧ ପରଠାରୁ ଏପରି ବଡ଼ ଧରଣର ଚୋରି ହୋଇ ନ ଥିବା କୁହାଯାଉଛି। ସଂଗ୍ରହାଳୟରୁ ଚୋରମାନେ ୮ ହଜାର କୋଟିର ଅଳଙ୍କାର ଏବଂ ବହୁମୂଲ୍ୟ ସାମଗ୍ରୀ ଲୁଟି ନେଇଛନ୍ତି। ୩ ସେଟ୍ ଅଳଙ୍କାର ଚୋରି ହୋଇଥିବା ପୋଲିସ ସୂଚନା ଦେଇଛି। ସେଥିମଧ୍ୟରେ ୧୮ ଶତାବ୍ଦୀର ସୈକ୍ସୋନି ରାଜବଂଶର ଶାସକ ଅଗଷ୍ଟସ୍ ଦି ଷ୍ଟ୍ରଙ୍ଗ୍ଙ୍କ ଆଭୁଷଣ ରହିଛି। ଲାଇନ୍ କଟିଥିବାବେଳେ ଚୋର ଝରକା ବାଟ ଦେଇ ସଂଗ୍ରହାଳୟରେ ପ୍ରବେଶ କରି ଏଭଳି କାଣ୍ଡ ଭିଆଇଥିବା କୁହାଯାଉଛି। ୨ ଜଣ ଲୋକ ଝରକା ଭାଙ୍ଗି ସଂଗ୍ରହାଳୟରେ ପ୍ରବେଶ କରୁଥିବା ସିସିଟିଭି କ୍ୟାମେରାରୁ ଜଣାପଡ଼ିଛି। ଡ୍ରେସ୍ଡେନ୍ ରାଜମହଲରେ ଥିବା ଏହି ସଂଗ୍ରହାଳୟରେ ସୁରକ୍ଷା ବ୍ୟବସ୍ଥା କଡ଼ାକଡ଼ି ଥିଲେ ମଧ୍ୟ ଚୋରି କିପରି ହେଲା, ସେ ନେଇ ତଦନ୍ତ ଜାରିରହିଛି। ଏଠାରେ ହାତୀଦାନ୍ତ ଖଚିତ ସାମଗ୍ରୀ, ହୀରା ଖଚିତ ସୁନା ଏବଂ ରୁପା ଅଳଙ୍କାର ଆଦି ଥିଲା।