କଟକ ଅଫିସ, ୧୪।୫: ଓଡ଼ିଶା ରାଜ୍ୟ ଆଇନସେବା ପ୍ରାଧିକରଣ (ଓଏସ୍ଏଲ୍ଏସ୍ଏ) ପକ୍ଷରୁ ରାଜ୍ୟର ପ୍ରତ୍ୟେକ ଜିଲା ଏବଂ ତାଲୁକ୍ସ୍ତରୀୟ ବିଚାର ବିଭାଗୀୟ କୋର୍ଟ ପରିସରରେ ଦ୍ୱିତୀୟ ରାଷ୍ଟ୍ରୀୟ ଲୋକ ଅଦାଲତ ଶନିବାର ଅନୁଷ୍ଠିତ ହୋଇଯାଇଛି। ହାଇକୋର୍ଟ ମୁଖ୍ୟ ବିଚାରପତି ତଥା ଓଏସ୍ଏଲ୍ଏସ୍ଏ ମୁଖ୍ୟ ପୃଷ୍ଠପୋଷକ ଏସ୍. ମୁରଲୀଧର ଏବଂ ଓଏସ୍ଏଲ୍ଏସ୍ଏ କାର୍ଯ୍ୟନିର୍ବାହୀ ଅଧ୍ୟକ୍ଷ ତଥା ବିଚାରପତି ଶୁଭାଶିଷ ତାଳପତ୍ରଙ୍କ ମାର୍ଗଦର୍ଶନରେ ଏହି ଲୋକ ଅଦାଲତ ଅନୁଷ୍ଠିତ ହୋଇଥିଲା। ଏହି ଲୋକ ଅଦାଲତରେ ମୋଟ ୧୫,୮୨୭ ମାମଲା ଫଇସଲା କରାଯାଇଥିଲା। ଏଥିରେ ଜିଲା ଏବଂ ତାଲୁକ୍ସ୍ତରୀୟ ବିଚାର ବିଭାଗୀୟ କୋର୍ଟ ସମେତ ଅନ୍ୟ ଟ୍ରିବ୍ୟୁନାଲ/କଞ୍ଜ୍ୟୁମର କୋର୍ଟର ବିଚାରାଧୀନ ୧୧,୮୬୫ ମାମଲା ରହିଥିଲା। ଏଥିସହ ୩,୯୬୨ ପ୍ରାକ୍ ମକଦ୍ଦମାସ୍ତରୀୟ ବିବାଦ ଥିଲା। ଏହାପରେ ପ୍ରାକ୍ ମକଦ୍ଦମାସ୍ତରୀୟ ବିବାଦ ଓ ବିଚାରାଧୀନ ମାମଲାର ଫଇସଲା ବାବଦରେ ୯୮ କୋଟି ୨୮ ଲକ୍ଷ ୧୮ହଜାର ୬୯୮ ଟଙ୍କା ଆଦାୟ କରାଯାଇଥିଲା। ବିଚାରାଧୀନ ମାମଲାଗୁଡ଼ିକ ମଧ୍ୟରେ ଫୌଜଦାରି ସାଲିସ୍ଯୋଗ୍ୟ ମାମଲା ୨୯୯, ଚେକ୍ ବାଉନ୍ସ ୧୦୨୭, ବ୍ୟାଙ୍କଋଣ ୬୨୦, ମୋଟର ଦୁର୍ଘଟଣାଜନିତ କ୍ଷତିପୂରଣ ୭୫୫, ବୈବାହିକ ବିବାଦ ୫୩୧, ଭୂମି ଅଧିଗ୍ରହଣ ୪୪, ବିଦ୍ୟୁତ୍ ଓ ଜଳ ସମ୍ବନ୍ଧୀୟ ୨୧, ଶ୍ରମ ବିବାଦ ୫୬, ଚାକିରି ସମ୍ବନ୍ଧୀୟ ୭, ଉପଭୋକ୍ତା ସମ୍ବନ୍ଧୀୟ ୧୪୩, ଡିଆର୍ଟି ମାମଲା ୧୫, ଷ୍ଟେଟ୍ ଏଜୁକେଶନାଲ ଟ୍ରିବ୍ୟୁନାଲ୍ ମାମଲା ୬, ଇଣ୍ଡଷ୍ଟ୍ରିଆଲ ଟ୍ରିବ୍ୟୁନାଲ ମାମଲା ୧, ଅନ୍ୟାନ୍ୟ ଦେୱାନି ମାମଲା ୧୫୫୫ ଓ ଅନ୍ୟାନ୍ୟ ଫୌଜଦାରି ମାମଲା ୬୭୮୫ ରହିଥିଲା। ସୂଚନାଯୋଗ୍ୟ, ଜାତୀୟ ଆଇନସେବା ପ୍ରାଧିକରଣ(ଏନ୍ଏଲ୍ଏସ୍ଏ)ର ପୂର୍ବ ନିର୍ଦ୍ଧାରିତ କାର୍ଯ୍ୟସୂଚୀ ଅନୁଯାୟୀ ଚଳିତ ବର୍ଷର ଦ୍ୱିତୀୟ ରାଷ୍ଟ୍ରୀୟ ଲୋକ ଅଦାଲତ ଶନିବାର ଅନୁଷ୍ଠିତ ହୋଇଥିଲା। ଏହି ଅଦାଲତରେ ବିଭିନ୍ନ ବିବାଦ କିମ୍ବା ମକଦ୍ଦମାର ସହଜ ଏବଂ ଆପୋଷ ସହମତିରେ ସମାଧାନ କରାଯାଇଥିଲା। ବିଚାରାଧୀନ ମକଦ୍ଦମା ସହ ପ୍ରାକ୍ ମକଦ୍ଦମାସ୍ତରୀୟ ମାମଲା ମଧ୍ୟ ସମାଧାନ ହୋଇଥିଲା।