ଚମ୍ପୁଆ,୧୪।୧୦(ଡି.ଏନ.ଏ.)-ସରକାର ଅସହାୟଙ୍କ ପାଇଁ ବିଭିନ୍ନ ଯୋଜନା ପ୍ରଣୟନ କରିଥିଲେ ମଧ୍ୟ ଏହାର ସୁଫଳ ପ୍ରକୃତ ହିତାଧିକାରୀମାନଙ୍କ ପାଖରେ ପହଞ୍ଚି ପାରୁନାହିଁ। ଦିବ୍ୟାଙ୍ଗ ଅସହାୟମାନେ ଭତ୍ତା ପାଇଁ ବାରମ୍ବାର ପଞ୍ଚାୟତ କାର୍ଯ୍ୟାଳୟରେ ନେହୁରା ହେଉଥିଲେ ମଧ୍ୟ ଏଥିପ୍ରତି କେହି ଗୁରୁତ୍ୱ ଦେଉ ନ ଥିବା ଦୃଷ୍ଟିକୁ ଆସିଛି। ଶେଷରେ ଏକ ଅସହାୟ ଦମ୍ପତି ବିଭାଗୀୟ ଅଧିକାରୀଙ୍କୁ ଭେଟିବା ପାଇଁ ଟ୍ରାଇସାଇକେଲରେ ୧୮ କି.ମି. ଆସିଥିଲେ। ଦିବ୍ୟାଙ୍ଗ ସ୍ବାମୀ ଟ୍ରାଇସାଇକେଲରେ ବସିଥିବା ବେଳେ ସ୍ତ୍ରୀ ପଛରୁ ଠେଲୁଥିବା ଦେଖିବାକୁ ମିଳିଥିଲା।
ଏଭଳି ଘଟଣା ଦେଖିବାକୁ ମିଳିଛି କେନ୍ଦୁଝର ଜିଲା ଚମ୍ପୁଆ ବ୍ଲକ ବଡ଼ନଈ ଅଞ୍ଚଳରେ। ଦୁଲୁମ ଚାତମ୍ଭା ୮ ମାସ ପୂର୍ବେ ଏକ ଦୁର୍ଘଟଣାର ଶିକାର ହୋଇଥିଲେ। ତାଙ୍କ ଡାହାଣ ଗୋଡ଼ ଓ ବାମହାତ ଦୁଇଟି ଅଚଳ ହୋଇପଡ଼ିଥିଲା। ସେବେଠାରୁ ଦୁଲୁମ କୌଣସି କାମ କରିପାରୁନାହାନ୍ତି। ୭ ପିଲାଙ୍କୁ ମିଶାଇ ୯ ପ୍ରାଣୀ କୁଟୁମ୍ବ ଦୟନୀୟ ଅବସ୍ଥାରେ କାଳାତିପାତ କରୁଛନ୍ତି। ଖାଦ୍ୟ ସୁରକ୍ଷା ଯୋଜନାରେ ମିଳୁଥିବା ଚାଉଳ ଗଣ୍ଡାକ ତାଙ୍କ ପାଇଁ ଯଥେଷ୍ଟ ହେଉନି। ଫଳରେ ସେ ଭତ୍ତା ପାଇଁ ବାରମ୍ବାର ପଞ୍ଚାୟତ କାର୍ଯ୍ୟାଳୟରେ ଯାଇ ନିରାଶ ହୋଇଫେରୁଥିଲେ। ଶେଷରେ ଦୁଲୁମ ଓ ତାଙ୍କ ସ୍ତ୍ରୀ ଚମ୍ପୁଆ ବିଡିଓଙ୍କୁ ଦେଖାକରି ଗୁହାରି କରିବାକୁ ସ୍ଥିର କରିଥିଲେ। ସୋମବାର ସକାଳୁ ଗ୍ରାମର ଜଣେ ଦିବ୍ୟାଙ୍ଗଠାରୁ ଟ୍ରାଇସାଇକେଲ ମାଗି ଆଣି ସ୍ତ୍ରୀଙ୍କ ସହାୟତାରେ ସକାଳ ୫ଟାରୁ ଚମ୍ପୁଆରୁ ବାହାରିଥିଲେ। ୫ ଘଣ୍ଟା ପରେ ୧୮ କି.ମି. ଦୂର ଚମ୍ପୁଆରେ ପହଞ୍ଚତ୍ଥିଲେ। ଜଣେ ସହୃଦୟ ବ୍ୟକ୍ତି ତାଙ୍କୁ ଉପଖଣ୍ଡ ସାମାଜିକ ସୁରକ୍ଷା ଅଧିକାରୀ ପଦ୍ମନାଭ ବେହେରାଙ୍କ ପାଖରେ ପହଞ୍ଚାଇ ଦେଇଥିଲେ। ଅଧିକାରୀ ବେହେରା ତାଙ୍କ ସହିତ ଆଲୋଚନା କରି ଭତ୍ତା କରାଇଦେବେ ବୋଲି ପ୍ରତିଶ୍ରୁତି ଦେଇଥିଲେ। ଏହାପରେ ଦୁଲୁମଙ୍କୁ ବ୍ଲକ ତରଫରୁ ଦିବ୍ୟାଙ୍ଗଙ୍କ ପାଇଁ ଉଦ୍ଦିଷ୍ଟ ସାଇକେଲ ଦିଆଯିବା ସହ ଫେରିବା ଲାଗି ଗାଡ଼ି ବ୍ୟବସ୍ଥା କରାଯାଇଥିଲା। ଏ ସମ୍ପର୍କରେ ଅଧିକାରୀ ବେହେରା କହିଛନ୍ତି, ବ୍ଲକ ସାମାଜିକ ସୁରକ୍ଷା ଅଧିକାରୀଙ୍କ ମାଧ୍ୟମରେ ଅନ୍ଲାଇନ ଦ୍ୱାରା ଦରଖାସ୍ତ କରାଯାଇ ତାଙ୍କ ଭତ୍ତା ବ୍ୟବସ୍ଥା କରାଯିବ।