ଜେନେଭା, ୮।୯ : ପ୍ରଥମ ଜାତିସଂଘ ଗ୍ଲୋବାଲ କଂଗ୍ରେସ ସେପ୍ଟେମ୍ବର ୮ ଏବଂ ୯ ରେ ଅନୁଷ୍ଠିତ ହେବ। ଏହି ଅବସରରେ ୨୬/୧୧ ମୁମ୍ବାଇ ଆକ୍ରମଣ ସମେତ ସାରା ବିଶ୍ୱରେ ହୋଇଥିବା ଆତଙ୍କବାଦୀ ଆକ୍ରମଣର ପୀଡ଼ିତଙ୍କ ପାଇଁ ୨ ଦିନିଆ ଶ୍ରଦ୍ଧାଞ୍ଜଳି ଅର୍ପଣ କରାଯିବ। ଜାତିସଂଘର ସେକ୍ରେଟେରୀ ଜେନେରାଲ ଆଣ୍ଟୋନିଓ ଗୁଟେରସ ନ୍ୟୁୟର୍କର ମୁଖ୍ୟାଳୟରେ କଂଗ୍ରେସର ଏହି ବୈଠକ ଡକାଇଛନ୍ତି।
ଏହି କଂଗ୍ରେସ ଆତଙ୍କବାଦୀଙ୍କ ଆକ୍ରମଣର ଶିକାର ହୋଇଥିବା ବ୍ୟକ୍ତିଙ୍କ ପାଇଁ ଅଭିଜ୍ଞତା, ଆହ୍ବାନ ଏବଂ ମରମ ବେଦନାକୁ ସିଧାସଳଖ ଆଦାନ ପ୍ରଦାନ ଲାଗି ଏକ ପ୍ଲାଟଫର୍ମ ପ୍ରଦାନ କରିବ। ମିଳିତ ଜାତିସଂଘରେ ଭାରତର ପ୍ରତିନିଧୀ ଟୁଇଟ କରି ଏହି ସୂଚନା ଦେଇଛନ୍ତି। ମିଳିତ ଜାତିସଂଘ ଅନୁଯାୟୀ, ଏହି କଂଗ୍ରେସ ସଦସ୍ୟ ରାଷ୍ଟ୍ର ତଥା ନାଗରିକ ସଂଗଠନ ଦ୍ୱାରା ନିଆଯାଇଥିବା ଉତ୍ତମ ପଦକ୍ଷେପ ବିଷୟରେ ଜାଣିବା ପାଇଁ ଏହା ଏକ ସୁଯୋଗ ହେବ। ଏହା ନିଶ୍ଚିତ କରିବ ଯେ ପୀଡିତଙ୍କ ସ୍ବରକୁ ଶୁଣାଯିବ ଏବଂ ନିଜ ଦେଶର ସୀମା ବାହାରେ ଏହି ମରମ ବେଦନା ବିଶ୍ୱସ୍ତରରେ ପହଞ୍ଚିବ। ବହୁ ସଂଖ୍ୟକ ଲୋକ ଏଥିରେ ଅଂଶଗ୍ରହଣ କରିବାର ସମ୍ଭାବନା ରହିଛି ବୋଲି କୁହାଯାଉଛି।
