ମାଲକାନଗିରି,୬ା୧୨ (ଦୁର୍ଯ୍ୟୋଧନ ପାତ୍ର):ଛତିଶଗଡ଼ ନାରାୟଣପୁର ଜିଲା ଭୈରମଗଡ଼ ଥାନା ଅଞ୍ଚଳରେ ୨ ଜଣ ପୂର୍ବତନ ସରପଞ୍ଚଙ୍କୁ ମାଓବାଦୀମାନେ ପ୍ରଜାକୋର୍ଟରେ ଗୁରୁବାର ଗଳାକାଟି ହତ୍ୟା କରିଛନ୍ତି। ସେମାନେ ହେଲେ ବୈରମଗଡ଼ ଥାନା ଅଞ୍ଚଳର ପୂର୍ବତନ ସରପଞ୍ଚ ସୁକରାମ ଅବଲମ ଓ ସୁକୁଲୁ ବର୍ସେ। ସେମାନଙ୍କୁ ମାଓବାଦୀମାନେ ଦୁଇଦିନ ପୂର୍ବରୁ ଅପହରଣ କରିନେଇଥିଲେ। ମାଓବାଦୀମାନେ ଉଭୟଙ୍କ ମୃତଦେହକୁ ଆଣି ଗଁା ଦାଣ୍ଡରେ ପକାଇଦେବା ସହ ଏକ ଚିଠି ଛାଡ଼ିଯାଇଛନ୍ତି। ସୁକରାମ ଏବଂ ସୁକୁଲୁ ପୋଲିସ ସୂଚନାଦାତା ଭାବେ କାର୍ଯ୍ୟ କରିବା ଏବଂ ଛତିଶଗଡ଼ ଭାଜପା ସରକାରଙ୍କ ସହ ସେମାନଙ୍କ ସମ୍ପର୍କ ରହିଥିବା ଜାଣି ସେମାନଙ୍କୁ ମାଓବାଦୀମାନେ ବହୁବାର ତାଗିଦ କରିଥିଲେ। ଏହାସତ୍ତ୍ୱେ ସେମାନେ କିଛି ନ ଶୁଣି ପୋଲିସକୁ ସୂଚନା ଦେବା କାର୍ଯ୍ୟକରି ଆସୁଥିଲେ। ତେଣୁ ସେମାନଙ୍କୁ ପ୍ରଜାକୋର୍ଟରେ ମୃତ୍ୟୁଦଣ୍ଡ ଦିଆଯାଇଥିବା ଚିଠିରେ ଉଲ୍ଲେଖ ରହିଛି। ନାରାୟଣପୁର ପୋଲିସ ତଦନ୍ତ କରିଛି। ଉକ୍ତ ଅଞ୍ଚଳରେ କୋମ୍ବିଂ ଅପରେଶନକୁ ଜୋର୍ଦାର କରାଯାଇଥିତ୍ବା ନାରାୟଣପୁର ଏସ୍ପି ଚନ୍ଦ୍ରକାନ୍ତ ସୂଚନା ଦେଇଛନ୍ତି।
