ରାୟଗଡ଼ା,୨।୭ (ଆଶିଷ ରଞ୍ଜନ ପଣ୍ଡା)ରାୟଗଡ଼ା ଜିଲା ଗୁଣପୁରର ସ୍ବେଚ୍ଛାସେବୀ ଅନୁଷ୍ଠାନର ନିର୍ଦ୍ଦେଶକ ଗୌରୀ ମିଶ୍ର ହତ୍ୟା ମାମଲାର ପର୍ଦ୍ଦାଫାଶ କରିଛି ପୋଲିସ ା ଏହି ଘଟଣା ସହିତ ଜଡ଼ିତ ରାଜେଶଙ୍କ ହତ୍ୟା ଘଟଣା ଉପରୁ ମଧ୍ୟ ହଟିଛି ପରଦା ା ଉଭୟ ହତ୍ୟାକାଣ୍ଡର ସମସ୍ତ ତଥ୍ୟ ରାୟଗଡ଼ା ପୋଲିସ ଶନିବାର ଖବରଦାତା ସମ୍ମିଳନୀରେ ଉପସ୍ଥାପନ କରିଛି ା ଜମି ବିବାଦରୁ ଗୌରୀ ମିଶ୍ରଙ୍କୁ ହତ୍ୟା କରାଯାଇଥିବା ନେଇ ସୂଚନା ଦେଇଛନ୍ତି ଏସପି ବିବେକାନନ୍ଦ ଶର୍ମା ା ସୁପାରି କିଲର ଦ୍ୱାରା ଗୌରୀଙ୍କ ହତ୍ୟା କରାଯିବା ପରେ ସୁପାରି ଟଙ୍କା ବିବାଦରୁ ରାଜେଶଙ୍କୁ ହତ୍ୟା କରାଯାଇଥିବା ଏସପି ଶର୍ମା କହିଛନ୍ତି। ଡବଲ ମର୍ଡର ଘଟଣାରେ ସମ୍ପୃକ୍ତ ୯ଜଣ ଅଭିଯୁକ୍ତଙ୍କ ମଧ୍ୟରୁ ୭ଜଣଙ୍କୁ ପୋଲିସ ଗିରଫ କରିଥିବାବେଳେ ଆଉ ୨ଜଣ ଫେରାର ଅଛନ୍ତି। ଖୁବ୍ଶୀଘ୍ର ଫେରାର ଅଭିଯୁକ୍ତ ଗଞ୍ଜାମ ଜିଲା ଛତ୍ରପୁରର କାହ୍ନା ପ୍ରଧାନ ଓ ଗଜପତି ଜିଲା ଆର.ଉଦୟଗିରିର ମୁନା ପ୍ରଧାନଙ୍କୁ ଗିରଫ କରାଯିବ ବୋଲି ଏସ୍ପି ସୂଚନା ଦେଇିଛନ୍ତି। ହତ୍ୟା ଘଟଣାରେ ବ୍ୟବହୃତ ୨ଟି ମାଉଜରକୁ ପୋଲିସ ଜବତ କରିଛି ା ସେହିଭଳି ଗୋଟିଏ ବାଇକ ମଧ୍ୟ ଜବତ ହୋଇଛି।
୨ ହତ୍ୟା ଘଟଣାର ମୁଖ୍ୟ ଅଭିଯୁକ୍ତ ଆର୍. କ୍ରିଷ୍ଣା, ଏ. ଗୋବିନ୍ଦା, ଡି. ଭେଙ୍କଟ ରାଓ, ବି. ଆକାଶ କୁମାର, ଗୋବିନ୍ଦା, ବିନୋଦ ବାଉରି, କେ. ଅରୁଣ କୁମାର ଓରଫ ଚାଣ୍ଟି ଓ ମୁନା ପିଡ଼ିକାଙ୍କୁ ପୋଲସ ଗିରଫ କରିଛି। ତେବେ ଗୌରୀଙ୍କୁ ଗୁଳିକରି ହତ୍ୟା କରିଥିବା ଗୁଣପୁରର ସୁପାରି କିଲର ଭି.ରାଜେଶ ଓରଫ ରାଜାଙ୍କୁ ପ୍ରମାଣ ନଷ୍ଟ ପାଇଁ ମୁଖ୍ୟ ଅଭିଯୁକ୍ତ କ୍ରିଷ୍ଣାଙ୍କ ସମେତ ଅନ୍ୟ ଅଭିଯୁକ୍ତମାନେ ଗତ ଜୁନ୍ ୧୯ ତାରିଖରେ ଆନ୍ଧ୍ରପ୍ରଦେଶର ବିଶାଖାପାଟଣାସ୍ଥିତ ଆନନ୍ଦପୁରମ ନିକଟରେ ଥିବା ଏକ ଜଙ୍ଗଲରେ ହତ୍ୟାକରି ମାଟି ଖୋଳି ପୋତିଦେଇଥିବା ପୋଲିସ ସୂଚନା ଦେଇଛି।
ଘଟଣାରୁ ପ୍ରକାଶ ଯେ, ୨୦୦୯ରେ ୧୫ଲକ୍ଷ ଟଙ୍କାରେ ଗୁଣପୁର ସହରର ମୁଖ୍ୟ ସ୍ଥାନରେ ୨ ଏକର ୮୮.୫ ଡିସିମିଲ ଜମି କ୍ରୟକୁ ନେଇ ମୁଖ୍ୟ ଅଭିଯୁକ୍ତ କ୍ରିଷ୍ଣା ଏବଂ ଗୌରୀ ମିଶ୍ରଙ୍କ ମଧ୍ୟରେ ଆପୋସ ବୁଝାମଣା ହୋଇଥିଲା । ତେବେ ପରବର୍ତ୍ତୀ ସମୟରେ କ୍ରୟ ହୋଇଥିବା ଜମିକୁ ନେଇ ଉଭୟଙ୍କ ମଧ୍ୟରେ ବିବାଦ ଦେଖାଦେଇଥିଲା। ଗୌରୀଙ୍କ ଉପରେ ପ୍ରତିଶୋଧ ନେବା ପାଇଁ ତାଙ୍କୁ ଜୀବନରୁ ମାରିଦେବାକୁ ମୁଖ୍ୟ ଅଭିଯୁକ୍ତ କ୍ରିଷ୍ଣା ଯୋଜନାକରି ଗୁଣପୁରର ସୁପାରି କିଲର ରାଜାଙ୍କ ସହ ୩୦ ଲକ୍ଷ ଟଙ୍କାର ଡିଲ୍ କରିଥିଲେ। ଆଡଭାନ୍ସରେ ୧ ଲକ୍ଷ ଓ ହତ୍ୟା ପରେ ୧ ଲକ୍ଷ ୯୦ ହଜାର ଟଙ୍କା ରାଜାକୁ ଦେବା ପରେ ଆଉ ବାକି ଟଙ୍କା କ୍ରିଷ୍ଣା ଦେଇ ନ ଥିଲେ । ଏହାକୁ ନେଇ ଗୌରୀ ହତ୍ୟା ଘଟଣା ସମ୍ପର୍କରେ ଖୁଲାସା କରିଦେବା ନେଇ କ୍ରିଷ୍ଣାଙ୍କୁ ରାଜା ଧମକ ଦେଇଥିଲେ। ପୁଣି ରାଜାଙ୍କୁ ରାସ୍ତାରୁ ହଟାଇବାକୁ ଯୋଜନାକରି ଗତ ଜୁନ୍ ୧୯ରେ କ୍ରିଷ୍ଣା ଓ ଅନ୍ୟ ଅଭିଯୁକ୍ତମାନେ ରାଜାଙ୍କୁ ହତ୍ୟା କରିଥିଲେ ବୋଲି ପୋଲସ ସୂଚନା ଦେଇଛି। ଜିଲା ପୋଲିସ କାର୍ଯ୍ୟାଳୟ ଠାରେ ଏକ ଖବରଦାତା ସମ୍ମିଳନୀରେ ଏସପି ଶର୍ମାଙ୍କ ସମେତ ଅତିରିକ୍ତ ଏସପି ବିଷ୍ଣୁ ପାତ୍ର ସମସ୍ତ ସୂଚନା ଦେଇଥିଲେ।