ମହାକାଳପଡା,୧୮ା୧୦(ଡି.ଏନ.ଏ.):କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ବତୀଘର ପଞ୍ଚାୟତର କୋଚିଳାବେଲାରୀ ଗଁାର ସୂର୍ଯ୍ୟକାନ୍ତ ମାଇତିଙ୍କ ସ୍ତ୍ରୀ ଖୁକମଣି ବେରାଙ୍କ ପ୍ରସବ ବେଦନା ସୋମବାର ମଧ୍ୟାହ୍ନରେ ହୋଇଥିଲା। ତାଙ୍କୁ ପରିବାର ଲୋକେ ନିକଟ ବତୀଘର ସ୍ବାସ୍ଥ୍ୟକେନ୍ଦ୍ରକୁ ନେଇଥିଲେ। ସେଠାରେ ଡାକ୍ତର ନ ଥିବାରୁ କେନ୍ଦ୍ରାପଡ଼ା ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରିବାକୁ ପରିବାର ଲୋକଙ୍କୁ ସ୍ବାସ୍ଥ୍ୟକେନ୍ଦ୍ର କର୍ମଚାରୀ କହିଥିଲେ। ପରେ ପରିବାର ଲୋକେ ଖୁକମଣିଙ୍କୁ ଏକ ଅଟୋ ରିକ୍ସା ଯୋଗେ ଦୀର୍ଘ ୬ କିମି ଦୂର କଚ୍ଚାରାସ୍ତାରେ ନେଇ ଯାଉଥିଲେ। ଏହି ସମୟରେ ଖରିନାସୀ-ଟୁବି ଫେରିଘାଟ ପୂର୍ବରୁ ରାସ୍ତା ଉପରେ ଅଟୋ ମଧ୍ୟରେ ସେ ଏକ ଶିଶୁକନ୍ୟା ଜନ୍ମ କରିଥିଲେ। ଶିଶୁକନ୍ୟାକୁ ଜନ୍ମଦେବା ପରେ ମା’ ରାସ୍ତାକୁ ଖସିପଡ଼ି ଚେତାଶୂନ୍ୟ ହୋଇଯାଇଥିଲେ। ଶିଶୁକନ୍ୟାର ନାଭି ଲାଗି ରହିଥିଲା। ପରିବାର ଲୋକେ ଅଚେତ ଅବସ୍ଥାରେ ମା’ ଓ ଶିଶୁକନ୍ୟାଙ୍କୁ ପୁଣି ଅଟୋ ଯୋଗେ ବତୀଘର ସ୍ବାସ୍ଥ୍ୟକେନ୍ଦ୍ରକୁ ଧରି ଫେରିଥିଲେ। ଖବର ଲେଖାହେଲା ବେଳକୁ ମା’ ଓ ଶିଶୁ କନ୍ୟା ବତୀଘର ସ୍ବାସ୍ଥ୍ୟକେନ୍ଦ୍ରରେ ଚିକିତ୍ସିତ ହେଉଥିବା ସ୍ବାମୀ ସୂର୍ଯ୍ୟକାନ୍ତ କହିଛନ୍ତି।
ସୂଚନାଯୋଗ୍ୟ, ବତୀଘର ସ୍ବାସ୍ଥ୍ୟକେନ୍ଦ୍ରକୁ ପିପିପି (ପବ୍ଲିକ୍ ପ୍ରାଇଭେଟ୍ ପାର୍ଟନରଶିପ୍) ମୋଡ୍ରେ ଘରୋଇ ପରିଚାଳନାରେ ଚାଲିଛି। ଏହି ଅଞ୍ଚଳରେ ସ୍ବାସ୍ଥ୍ୟସେବା ଯୋଗାଇ ଦେବାକୁ ବୋଟ୍ ଆମ୍ବୁଲାନ୍ସ ସରକାର ଯୋଗାଇ ଦେଇଛନ୍ତି। ହେଲେ ଏଠାରେ ସ୍ବାସ୍ଥ୍ୟ ସଚେତନତା ଅଭାବ ପରିଲକ୍ଷିତ ହେଉଛି ବୋଲି ଅଭିଯୋଗ ଉଠୁଛି। ଏହି ପଞ୍ଚାୟତରେ ୧୨ ହଜାରରୁ ଅଧିକ ଲୋକ ବସବାସ କରୁଛନ୍ତି। ଏଠାରେ ଆଶା ଓ ଅଙ୍ଗନୱାଡି କର୍ମୀମାନେ ଗର୍ଭବତୀ ମା’, ପ୍ରସୂତି ଓ ନବଜାତ ଶିଶୁଙ୍କ ଯତ୍ନ ଉପରେ ସଚେତନ କରୁ ନ ଥିବା ଭଳି ଗୁରୁତର ଅଭିଯୋଗ ହେଉଛି। ସରକାରଙ୍କ ପକ୍ଷରୁ ପ୍ରତି ମାସରେ ଗର୍ଭବତୀ ମା’ମାନଙ୍କ ସ୍ବାସ୍ଥ୍ୟ ପରୀକ୍ଷା କରିବା, ଗର୍ଭସ୍ଥ ଶିଶୁମାନଙ୍କ ଉନ୍ନତ ସ୍ବାସ୍ଥ୍ୟ ପାଇଁ ଟିକାକରଣ, ମମତା ଯୋଜନା ଓ ପୁଷ୍ଟିକର ଖାଦ୍ୟସାମଗ୍ରୀ ଯୋଗାଇ ଦେଉଛନ୍ତି। ମାତ୍ର ତୃଣମୂଳସ୍ତରରେ ଏହାକୁ ତଦାରଖ କରିବାକୁ କୌଣସି ବିଭାଗୀୟ ଅଧିକାରୀ ନଦୀନାଳ ଘେରା ଉପାନ୍ତ ଅଞ୍ଚଳକୁ ଯାଉ ନ ଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି, ଯାହାର ସଦ୍ୟତମ ଉଦାହରଣ ୨ ମାସ ହେବ ଗର୍ଭବତୀ ଖୁକମଣିଙ୍କ କ୍ଷେତ୍ରରେ ଦେଖିବାକୁ ମିଳିଛି। ଏ ନେଇ କେନ୍ଦ୍ରାପଡ଼ା ଜିଲା ମୁଖ୍ୟ ଚିକିତ୍ସାଧିକାରିଣୀ ଡା. ଅନିତା ପଟ୍ଟନାୟକଙ୍କୁ ପଚାରିବାରେ ଏ ସମ୍ପର୍କରେ ତଦନ୍ତ କରାଯିବ ବୋଲି କହିଛନ୍ତି।