ପାଟନା,୨୭ା୮: ବିହାରର ମୁଙ୍ଗେର ଜିଲାରେ ଏକ ଅଜବ ଘଟଣା ସାମ୍ନାକୁ ଆସିଛି। ହାବେଳି ଖଡ଼ଗପୁରରସ୍ଥିତ ହ୍ରଦ ପରିଦର୍ଶନ କରିବାକୁ ଆସିଥିବା ପ୍ରେମୀଯୁଗଳଙ୍କୁ ଜବରଦସ୍ତ ବିବାହ କରାଯାଇଛି। ସେଠାରେ ଉପସ୍ଥିତ ଥିବା ଲୋକମାନେ ପ୍ରଥମେ ଯୁବକଙ୍କର ଆଙ୍ଗୁଠି କାଟି ଯୁବତୀଙ୍କ ମଥାରେ ସିନ୍ଦୂର ଭରିଥିଲେ। ଏହା ପରେ ଘଟଣାର ଏକ ଭିଡିଓ ଭାଇରାଲ ହୋଇଥିଲା। ପରିବାର ଲୋକେ ସୋସିଆଲ ମିଡିଆରୁ ଏ ସମ୍ପର୍କରେ ଜାଣି ଉଭୟଙ୍କୁ ରୀତିନୀତି ଏବଂ ଆଇନଗତ ଭାବରେ ବିବାହ କରାଇଛନ୍ତି।
ଭାଇରାଲ ଭିଡିଓରେ, ଅଜଣା ବ୍ୟକ୍ତିମାନେ ପ୍ରେମୀଯୁଗଳଙ୍କୁ ଜବରଦସ୍ତ ବିବାହ କରୁଥିବା ଦେଖିବାକୁ ମିଳିଛି। ଲୋକମାନେ ଖଡ଼ଗପୁର ହ୍ରଦ ପରିଦର୍ଶନ କରିବାକୁ ଆସିଥିବା ପ୍ରେମୀଯୁଗଳଙ୍କ ମଧ୍ୟରୁ ଯୁବକଙ୍କ ଆଙ୍ଗୁଠି କାଟି ଦେଇଥିଲେ, ପରେ ଯୁବତୀଙ୍କ ମୁଣ୍ଡରେ ରକ୍ତରେ ସିନ୍ଦୂର ଭରିଥିଲେ। ସେଠାରେ ଉପସ୍ଥିତ ଲୋକଙ୍କ ମଧ୍ୟରୁ କେହି ଉକ୍ତ ସମସ୍ତ ଘଟଣାର ଏକ ଭିଡିଓ ପ୍ରସ୍ତୁତ କରି ଏହାକୁ ସୋସିଆଲ ମିଡିଆରେ ଭାଇରାଲ କରିଦେଇଥିଲେ। ଭିଡିଓ ଦେଖି ଯୁବକଙ୍କ ପରିବାର ସଦସ୍ୟ ଅପବାଦକୁ ଡରି ଉଭୟଙ୍କୁ ବିବାହ କରିବାକୁ ନିଷ୍ପତ୍ତି ନେଇଥିଲେ।
ଭିଡିଓଟି ଖଡ଼ଗପୁର ଥାନା ଅନ୍ତର୍ଗତ ଏକ ଲେକ୍ ନିକଟରେ କରାଯାଇଛି ବୋଲି ଜଣାପଡ଼ିଛି। ପ୍ରେମୀଯୁଗଳ ଏହି ହ୍ରଦ ବୁଲିବାକୁ ଆସିଥିଲେ। ଉଭୟଙ୍କ ମଧ୍ୟରେ ୨ ମାସ ଧରି ପ୍ରେମ ସମ୍ପର୍କ ଚାଲିଥିଲା। ଯୁବକଙ୍କ ନାମ ମିଥଲେଶ ଗୁପ୍ତା। ସେ ବରୀପୁର ଥାନା ଅଧିନସ୍ଥ ବାହାଦୂରପୁର ନିବାସୀ ମହେଶ ପ୍ରସାଦ ଗୁପ୍ତାଙ୍କ ପୁଅ। ଏଥିସହ ଶ୍ୟାମପୁର ପୋଲିସ ଷ୍ଟେସନ ଅଧୀନରେ ଥିବା ବନାରସୀ ଭାସା ଗାଁର ବାସିନ୍ଦା ବୋଲି ଜଣାପଡିଛି। ଯୁବତୀ ଜଣକ ଖଡ଼ଗପୁରରେ ପାଠ ପଢୁଥିଲେ।