ଜେନେଭା/ଓ୍ବାଶିଂଟନ/ମସ୍କୋ,୧୩।୧୦ : ଆମେରିକା ରାଷ୍ଟ୍ରପତି ଜୋ ବାଇଡେନ ମିଳିତ ଜାତିସଂଘ ସାଧାରଣ ସଭା (ୟୁଏନଜିଏ)ରେ ରୁଷିଆ ବିରୋଧରେ ପାରିତ ହୋଇଥିବା ନିନ୍ଦା ପ୍ରସ୍ତାବକୁ ପ୍ରଶଂସା କରିଛନ୍ତି। ପ୍ରସ୍ତାବରେ ୟୁକ୍ରେନର ଚାରୋଟି ଅଞ୍ଚଳକୁ ରୁଷିଆ ସହିତ ମିଶ୍ରଣକୁ ନିନ୍ଦା କରାଯାଇଛି। ବାଇଡେନ କହିଛନ୍ତି, ରୁଷିଆ ବିଶ୍ୱ ମାନଚିତ୍ରରୁ ଏକ ସାର୍ବଭୌମ ଦେଶକୁ ଲିଭାଇ ପାରିବ ନାହିଁ।
ଚାଲିଥିବା ଯୁଦ୍ଧ ମଧ୍ୟରେ ରୁଷିଆ ନିକଟରେ ହୋଇଥିବା ମନମତକ ସଂଗ୍ରହ ମାଧ୍ୟମରେ ୟୁକ୍ରେନ୍ର ଚାରିଟି ଅଞ୍ଚଳକୁ ନିଜ ଦେଶରେ ମିଶ୍ରଣ କରିଛି। ମିଳିତ ଜାତିସଂଘ ଏଥିପାଇଁ ରୁଷିଆକୁ ନିନ୍ଦା କରିଛି। ଭାରତ ସମେତ ୩୫ ଟି ଦେଶ ଏହି ପ୍ରସ୍ତାବକୁ ନେଇ ଚିନ୍ତା ବ୍ୟକ୍ତ କରିଛନ୍ତି। କିନ୍ତୁ ୧୨୩ ସଦସ୍ୟ ଦେଶ ଏହାକୁ ସମର୍ଥନ କରିଥିଲେ। ଏହି ପ୍ରସ୍ତାବ ବିରୋଧରେ ପାଞ୍ଚଟି ଦେଶ ଭୋଟ ଦେଇଛନ୍ତି। ରୁଷିଆ ସୁରକ୍ଷା ପରିଷଦରେ ସମାନ ପ୍ରସ୍ତାବକୁ ଭିଟୋ କରିବାର କିଛି ଦିନ ପରେ ଏହି ନିଷ୍ପତ୍ତି ନିଆଯାଇଛି। ଏହାକୁ ଭାରତ ଏଡାଇ ଯାଇଥିଲା। ବୁଧବାର ମିଳିତ ଜାତିସଂଘ ସାଧାରଣ ସଭା ରୁଷିଆ ବିରୋଧରେ ଏକ ପ୍ରସ୍ତାବ ପାରିତ କରିଥିବାବେଳେ ସୁରକ୍ଷା ପରିଷଦକୁ ପୂର୍ବରୁ ଆଣିଥିବା ସମାନ ପ୍ରସ୍ତାବ ରୁଷିଆର ଭିଟୋ ଅଧିକାର କାରଣରୁ ପାରିତ ହୋଇପାରି ନାହିଁ।
୧୯୩ ସଦସ୍ୟ ବିଶିଷ୍ଟ ଜାତିସଂଘ ସାଧାରଣ ସଭାରେ ରୁଷିଆ ବିରୋଧରେ ଏକ ପ୍ରସ୍ତାବ ପାରିତ ହେବା ପରେ ବାଇଡେନଙ୍କ ବିବୃତ୍ତି ଆସିଥିଲା। ହ୍ବାଇଟ ହାଉସ ଦ୍ୱାରା ଜାରି ଏକ ବିବୃତ୍ତିରେ ବାଇଡେନ ରୁଷିଆ ରାଷ୍ଟ୍ରପତି ଭ୍ଲାଡିମିର ପୁଟିନଙ୍କ ଉଦ୍ଦେଶ୍ୟରେ କହିଛନ୍ତି ଯେ ଆଜି ବିଶ୍ୱର ପ୍ରତ୍ୟେକ ଅଞ୍ଚଳର ବୃହତ୍ତମ ଏବଂ ଛୋଟ ଦେଶ, ବିଭିନ୍ନ ଚିନ୍ତାଧାରା ଏବଂ ସରକାର ଥିବା ଦେଶ ମିଳିତ ଜାତିସଂଘର ଚାର୍ଟରକୁ ରକ୍ଷା କରିବାକୁ ଏବଂ ୟୁକ୍ରେନ ଅଞ୍ଚଳକୁ ବଳପୂର୍ବକ ନେବା ବିରୋଧରେ ଭୋଟ ଦେଇଛନ୍ତି। ରୁଷିଆର ଏହି କାର୍ଯ୍ୟକୁ ନିନ୍ଦା କରାଯାଇଛି। ୧୪୩ ରାଷ୍ଟ୍ର ସ୍ବାଧୀନତା, ସାବଭୌମତ୍ୱ ଏବଂ ଆଞ୍ଚଳିକ ଅଖଣ୍ଡତା ପାଇଁ ଛିଡା ହୋଇଛନ୍ତି। ଆମେରିକା ରାଷ୍ଟ୍ରପତି କହିଛନ୍ତି ଯେ ରୁଷିଆ ଅନ୍ତର୍ଜାତୀୟ ଶାନ୍ତି ଏବଂ ନିରାପତ୍ତାର ମୂଳଦୁଆ ଭାଙ୍ଗିବାର ଉଦ୍ୟମ କରୁଛି।