ବଙ୍ଗଳା ଫିଲ୍ମ ଅଭିନେତ୍ରୀ ରୂପା ଦତ୍ତଙ୍କୁ ଚୋରି ଅଭିଯୋଗରେ ପୋଲିସ ଗିରଫ କରିଛି। କୋଲକାତାର ଅନ୍ତର୍ଜାତୀୟ ପୁସ୍ତକ ମେଳାରେ ସେ ଚୋରି କରୁଥିବାବେଳେ ଧରାପଡିଥିଲେ। ବିଦ୍ଧନଗର ଉତ୍ତର ପୋଲିସ ଷ୍ଟେଶନ ସୂତ୍ରରୁ ପ୍ରକାଶ ଯେ, ମାର୍ଚ୍ଚ ୧୨ରେ ମେଳାରେ ଜଣେ ମହିଳା ଡଷ୍ଟବିନରେ ବ୍ୟାଗ ଫିଙ୍ଗିଥିବାର ଦେଖିବା ପରେ ପୋଲିସ ସନ୍ଦେହ କରି ତାଙ୍କୁ ଅଟକ ରଖିଥିଲା। ସନ୍ଦେହ ଆଧାରରେ ପୋଲିସ ତାଙ୍କ ବ୍ୟାଗ ଯାଞ୍ଚ କରିଥିଲା। ତାଙ୍କ ନିକଟରୁ ଅନେକ ଛୋଟ ବ୍ୟାଗ ମିଳିଥିଲା। ମହିଳାଙ୍କ ବ୍ୟାଗରୁ ପୋଲିସ ୭୫ ହଜାର ଟଙ୍କା ଜବତ କରିବା ସହ ତାଙ୍କୁ ଗିରଫ କରିଥିଲା। ସମ୍ପୃକ୍ତ ମହିଳା ଜଣଙ୍କ ରୂପା ଦତ୍ତ ବୋଲି ଜଣାପଡିଥିଲା। ପୋଲିସର ପଚରାଉଚରା ବେଳେ ତାଙ୍କ ପାଖକୁ ଟଙ୍କା କେଉଁଠୁ ଆସିଲା ଏବଂ ସେ କାହିଁକି ବ୍ୟାଗକୁ ଡଷ୍ଟବିନରେ ଫୋପାଡି ଦେଲେ ତାହା ସାମ୍ନାକୁ ଆସି ନାହିଁ। ଏଥିସହିତ ରୂପା ଦତ୍ତା ଚୋରି କରିଥିବା କଥାକୁ ସ୍ବୀକାର କରିଛନ୍ତି। ସେ ଭିଡ଼ର ସୁଯୋଗ ନେଇ ବଡ ଇଭେଣ୍ଟ ଏବଂ ମେଳାରେ ଯାଇ ଲୋକଙ୍କ ପର୍ସ ଚୋରି କରୁଥିଲେ। ଅନ୍ତର୍ଜାତୀୟ ମେଳାରେ ସେ ମଧ୍ୟ ସମାନ କାର୍ଯ୍ୟ କରିବାକୁ ଚେଷ୍ଟା କରୁଥିଲେ, କିନ୍ତୁ ପୋଲିସ ତାଙ୍କୁ ଧରିଥିଲା। ପୋଲିସ ରୂପାଙ୍କ ଠାରୁ ଏକ ଡାଏରୀ ମଧ୍ୟ ପାଇଛି।
ରୁପା ଦତ୍ତ ବଙ୍ଗାଳୀ ଫିଲ୍ମ ଇଣ୍ଡଷ୍ଟ୍ରିର ଜଣେ ଜଣାଶୁଣା ଅଭିନେତ୍ରୀ। ସେ ଅନେକ ସିରିଏଲ ଏବଂ ଟିଭି ଶୋ’ରେ ମଧ୍ୟ ଅଭିନୟ କରିଛନ୍ତି । ସେ ବଲିଉଡ ନିର୍ଦ୍ଦେଶକ ଅନୁରାଗ କଶ୍ୟପଙ୍କ ନାଁରେ ଯୌନ ଉତ୍ପୀଡ଼ନ ଅଭିଯୋଗ ଆଣିଥିଲେ।
