ନୂଆଦିଲ୍ଲୀ,୨୯।୭: ଭାରତର ନୂତନ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ କଂଗ୍ରେସ ଏମ୍ପି ଅଧୀର ରଞ୍ଜନ ଚୌଧୁରୀ ‘ରାଷ୍ଟ୍ରପତ୍ନୀ’ କହି ସମ୍ବୋଧିତ କରିଥିଲେ। ଏହି ଆପତ୍ତିଜନକ ମନ୍ତବ୍ୟକୁ ନେଇ ଭାଜପା ସଡ଼କରୁ ନେଇ ସଂସଦ ପର୍ଯ୍ୟନ୍ତ ହଙ୍ଗାମା କରିଥିଲା। ବିବାଦ ତେଜୁଥିବା ବେଳେ ଶେଷରେ ନିଜର ମନ୍ତବ୍ୟକୁ ନେଇ କ୍ଷମା ପ୍ରାର୍ଥନା କରିଛନ୍ତି ଅଧୀର। ସେ ରାଷ୍ଟ୍ରପତିଙ୍କ ନିକଟକୁ ଚିଠି ଲେଖି କ୍ଷମା ମାଗିଛନ୍ତି।
ଅଧୀର ଚିଠିରେ କହିଛନ୍ତି, ମୁଁ ଆପଣଙ୍କ ପଦକୁ କହିବାକୁ ଯାଇ ଅନୁପଯୁକ୍ତ ଶବ୍ଦ ବ୍ୟବହାର କରିଥିଲି। ମୁଁ ଏଥିପାଇଁ ଦୁଃଖିତ। ଆପଣଙ୍କୁ ନିଶ୍ଚିତ କରୁଛି ଯେ ଏହା ଭୁଲବଶତଃ ମୋ’ ପାଟିରୁ ଖସି ଯାଇଥିଲା। ଯେଉଁଥିପାଇଁ ମୁଁ କ୍ଷମା ମାଗୁଛି। ଆଶା କରୁଛି ଆପଣ ମୋତେ କ୍ଷମା କରିଦେବେ।
ପ୍ରକାଶ ଯେ, ଗୁରୁବାର ଅଧୀରଙ୍କ ମନ୍ତବ୍ୟକୁ ନେଇ ଝଡ଼ ସୃଷ୍ଟି ହୋଇଥିଲା। ରାଷ୍ଟ୍ରପତି ଜଣେ ଆଦିବାସୀ ମହିଳା ହୋଇଥିବାରୁ କଂଗ୍ରେସ ତାଙ୍କ ପାଇଁ ଏଭଳି ଅପମାନଜନକ ଶବ୍ଦ ବ୍ୟବହାର କରିଥିବା ଅଭିଯୋଗ ଆଣି ଅଧୀର ଏବଂ କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀ କ୍ଷମା ମାଗନ୍ତୁ ବୋଲି ଶାସକ ଦଳ ଦାବି କରିଥିଲା।