ହାଇଦ୍ରାବାଦ୍,୨୮।୯: କଂଗ୍ରେସ ଦଳର ଅଧ୍ୟକ୍ଷ ନିର୍ବାଚନ ଶେଷ ହେବା ମାତ୍ରେ ଦଳର ବରିଷ୍ଠ ନେତା ମନୀଷ ତିୱାରୀଙ୍କ ମନୋଭାବ ମଧ୍ୟ ବଦଳି ଯାଇଛି। ଶୁକ୍ରବାର ସେ ତେଲେଙ୍ଗାନାରେ ରାହୁଲ ଗାନ୍ଧୀଙ୍କ ‘ଭାରତ ଯୋଡୋ ଯାତ୍ରା’ରେ ଯୋଗ ଦେଇଥିଲେ। କଂଗ୍ରେସରେ ସାଂଗଠନିକ ନିର୍ବାଚନ ଦାବି କରୁଥିବା ନେତାଙ୍କ ତାଲିକାରେ ମନୀଷଙ୍କ ନାଁ ମଧ୍ୟ ସାମିଲ ଥିଲା। ସେ ମଧ୍ୟ କଂଗ୍ରେସର ଅସନ୍ତୁଷ୍ଟ ଜି-୨୩ରେ ଥିଲେ। ଏବେ ସେ ‘ଭାରତ ଯୋଡୋ ଯାତ୍ରା’ରେ ସାମିଲ ହେବା ପରେ ଦଳରେ ସବୁକିଛି ଠିକ୍ ଥିବା କୁହାଯାଉଛି।
ରାହୁଲ ଗାନ୍ଧୀଙ୍କ ନେତୃତ୍ୱରେ ଭାରତ ଯୋଡୋ ଯାତ୍ରା ଶୁକ୍ରବାର ତେଲେଙ୍ଗାନାର ନାରାୟଣପେଟ ଜିଲାର ୟେଲିଗନ୍ଦଲା ଠାରୁ ଆରମ୍ଭ ହୋଇଛି। ଆଜି ଏହି ଯାତ୍ରା ୨୩.୩ କିଲୋମିଟର ଦୂରତା ଅତିକ୍ରମ କରିବ ବୋଲି ଆଶା କରାଯାଉଛି।