ଯୋଡ଼ା, ୯।୫ (ଡି.ଏନ.ଏ.): ସାରା ଦେଶରେ ଆଲୋଡ଼ନ ସୃଷ୍ଟି କରିଥିଲା ୨୦୦୯ ଖଣି ଦୁର୍ନୀତି। ଏହାକୁ ରୋକିବା ଲାଗି ଉଭୟ ରାଜ୍ୟ ଏବଂ କେନ୍ଦ୍ର ସରକାରଙ୍କ ପକ୍ଷରୁ ହୋଇଥିଲା ତଦନ୍ତ। ଖଣିଜ କାରବାରରେ ସ୍ବଚ୍ଛତା ଆଣିବା ଲାଗି ନୀତିରେ କରାଯାଇଥିଲା ପରିବର୍ତ୍ତନ। ହେଲେ ଏବେ ପୂର୍ବାପେକ୍ଷା ଖଣି ଦୁର୍ନୀତି କମିଛି ସତ, ହେଲେ ଖଣିଜ ସାମଗ୍ରୀର ଚୋରା ଚାଲାଣରେ ଲାଗିପାରୁନି ଅଙ୍କୁଶ। ଲାଭଖୋର ଖଣି ମାଫିଆମାନେ ପୂର୍ବରୁ ଟ୍ରକ୍ ଏବଂ ଅନ୍ୟ ଭାରିଯାନ ସହାୟତାରେ ମୂଲ୍ୟବାନ ଖଣିଜ ପଦାର୍ଥ ଚୋରାଚାଲାଣ କରୁଥିବାବେଳେ ଏବେ ଏହାର ମାଧ୍ୟମ ବଦଳିଛି। ପୂର୍ବରୁ ଟ୍ରକ୍ ଯୋଗେ ଖଣିଜ ଚାଲାଣ ହେଉଥିବାବେଳେ ଏବେ ମାଲ୍ବାହୀ ଟ୍ରେନ୍ରେ ହେଉଛି ସମାନ କାମ। କେନ୍ଦୁଝର ଜିଲା ଯୋଡ଼ା ଖଣିମଣ୍ଡଳ ଅନ୍ତର୍ଗତ ଜୁରୁଡ଼ିରୁ ଆସିଛି ଏଭଳି ଦୃଶ୍ୟ।
ଜୁରୁଡି ରେଳ ସାଇଡିଂରେ ଗଦା ହୋଇ ରହିଛି ବହୁ ହଜାର ମେଟ୍ରିକ୍ ଟନ୍ ଲୁହାପଥର। ଏହାର କେହି ଦାବିଦାର ନ ଥିବା ସ୍ପଷ୍ଟ କରିଛି ଖଣି ବିଭାଗ। ତେବେ ଏହାର ସୁରକ୍ଷା ଏବଂ ରକ୍ଷଣାବେକ୍ଷଣ ଦିଗରେ ପଦକ୍ଷେପ ନିଆଯାଉ ନ ଥିବାରୁ ଖଣି ମାଫିଆମାନଙ୍କ ନଜର ପଡ଼ିଛି ଏହି ଖଣିଜ ଉପରେ। ଇତିମଧ୍ୟରେ ଲୁହାପଥର ଷ୍ଟାକରୁ ମେଶିନ ସହାୟତାରେ ବିପୁଳ ପରିମାଣର ଲୁହାପଥର ଚୋରାଚାଲାଣ ହୋଇଯାଇଛି। ତେବେ ଏହାକୁ ଅନ୍ୟତ୍ର ଚୋରା ଚାଲାଣ କରାଯିବାକୁ ଯେଉଁ ଷଡ଼ଯନ୍ତ୍ର ଚାଲିଛି ତାହା ଯେତିକି ଚର୍ଚ୍ଚିତ, ସେତିକି ସମ୍ବେଦନଶୀଳ ମଧ୍ୟ। ମାଲବାହୀ ଟ୍ରେନ୍ ଓ୍ବାଗନ୍ରେ ନିର୍ଦ୍ଧାରିତ ପରିମାଣଠାରୁ ଲୁହାପଥର କମିଗଲେ, ଷ୍ଟାକ୍ୟାର୍ଡରେ ଗଚ୍ଛିତ ଲୁହାପଥର ମେଶିନରେ ନେଇ ଭର୍ତ୍ତି କରିଦିଆଯାଉଛି। ଏହାକୁ ରାଜ୍ୟ ବହାରକୁ ବିଭିନ୍ନ ଉପାୟରେ ଚାଲାଣ କରାଯାଉଛି। ଏଥିରେ ରେଳ ପରିବହନରେ ନିୟୋଜିତ କେତେଜଣ ଅସାଧୁ ଠିକାଦାରଙ୍କ ହାତ ରହିଛି। ସେମାନେ ଏହି ଲୁହାପଥରକୁ ବାହାର ରାଜ୍ୟର ବ୍ୟବସାୟୀଙ୍କୁ ବିକି ପର୍ଯ୍ୟପ୍ତ ଲାଭ କମାଉଥିବାବେଳେ ରାଜସ୍ବ ହରାଉଛନ୍ତି ସରକାର। ସେହିପରି ଖଣିରୁ ସିଧାସଳଖ ଟ୍ରକ୍ ଯୋଗେ ପରିବହନ ହେଉଥିବା ଲୁହାପଥରକୁ ରେଳ ସାଇଡିଂରେ ପକାଯାଉନାହିଁ। କେବଳ ପରିବହନ ଚାଲାଣକୁ ରିସିଭ୍ କରାଇ ଏହାକୁ ଅନ୍ୟତ୍ର ବହୁ ମୂଲ୍ୟରେ ବିକ୍ରି କରାଯାଉଛି। ଏଥିରେ ମଧ୍ୟ ସମ୍ପୃକ୍ତ ପରିବହନ ଠିକାଦାରଙ୍କ ହାତ ଥିବା ଅନୁମାନ କରାଯାଉଛି।
ଅନ୍ୟପକ୍ଷରେ ରେଳ ସାଇଡିଂରେ ରେଳ ବିଭାଗ ପକ୍ଷରୁ ଏକ ଡ୍ରେନ୍ ନିର୍ମାଣ କାର୍ଯ୍ୟ ଚାଲିଛି। ଜେସିବି ସହାୟତାରେ ଟ୍ରେଞ୍ଚ୍ ଖୋଳାଯାଉଛି। ଏହାର ସୁଯୋଗରେ ବହୁ ପରିମାଣର ଲୁହାପଥର ଟ୍ରାକ୍ଟର ଯୋଗେ ଅନ୍ୟତ୍ର ଚାଲାଣ ହେଉଛି। ଫଳରେ ୨୦୦୯-୧୦ରେ ଜୁରୁଡି ରେଳ ସାଇଡିଂରେ ଜବତ ହୋଇଥିବା ମୂଲ୍ୟବାନ ଲୁହାପଥର ପରିମାଣ କମିବାରେ ଲାଗିଛି। ଖଣି ବିଭାଗ ଦ୍ୱାରା ଆକଳନ କରାଗଲେ ମୋଟ୍ କେତେ ପରିମାଣର ଲୁହାପଥର ମହଜୁଦ୍ ଅଛି ଏବଂ କେତେ ଚୋରା ଚାଲାଣ ହୋଇଛି ତାହା ଜଣାପଡ଼ିବ। ଏ ସମ୍ପର୍କରେ ବିଭାଗୀୟ ଖଣି କର୍ତ୍ତୃପକ୍ଷଙ୍କୁ ପଚାରିବାରୁ ସୋମବାର ଏହାର ବିଧିବଦ୍ଧ ତଦନ୍ତ କରାଯିବ ବୋଲି କହିଛନ୍ତି। ସେହିପରି ଟ୍ରେନ୍ ନିର୍ମାଣ ବନାଞ୍ଚଳକୁ ପ୍ରଭାବିତ କରୁଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ଏ ସମ୍ପର୍କରେ କେନ୍ଦୁଝର ଡିଏଫଓ ଧନରାଜ ଏଚ୍ଡି କହିଛନ୍ତି, ଏ ନେଇ ତାଙ୍କ ପାଖରେ କୌଣସି ଖବର ନାହିଁ। ଖୁବଶୀଘ୍ର ଘଟଣାସ୍ଥଳକୁ ଯାଇ ଅନୁସନ୍ଧାନ କରିବେ।