ମୁମ୍ବାଇ: ନିଜର ନିଖୁଣ ଅଭିନୟକୁ ନେଇ ଦର୍ଶକଙ୍କ ହୃଦୟରେ ଏକ ସ୍ୱତନ୍ତ୍ର ସ୍ଥାନ ତିଆରି କରିଛନ୍ତି ଅଭିନେତା ଅନୁପମ ଖେର । ଏବେ ସେ ତାଙ୍କର କିଛି ଭଲ ପ୍ରୋଜେକ୍ଟକୁ ନେଇ ଅଛନ୍ତି ଚର୍ଚ୍ଚାରେ । ସୋସିଆଲ ମିଡିଆରେ ଆକ୍ଟିଭ ରହୁଥିବା ଏହି ଅଭିନେତା ଏବେ ଏକ ପୋଷ୍ଟ ଶେୟାର କରି ଆସିଛନ୍ତି ଚର୍ଚ୍ଚାକୁ । ଅନୁପମ ତାଙ୍କର ୫୨୮ତମ ଫିଲ୍ମର ଘୋଷଣା କରିଛନ୍ତି । ଆଉ ଏହା ହେଉଛି ଏକ ତେଲୁଗୁ ଫିଲ୍ମ, ଯେଉଁଥିରେ ସେ ଗୁରୁତ୍ୱପୂର୍ଣ୍ଣ ଭୂମିକାରେ ନଜର ଆସିବେ ।
‘ଦ କଶ୍ମୀର ଫାଇଲ୍ସ’ର ପ୍ରଯୋଜକ ଅଭିଷେକ ଅଗୟୱାଲଙ୍କ ବ୍ୟାନରରେ ନିର୍ମାଣ କରାଯାଉଥିବା ଏହି ଫିଲ୍ମର ଟାଇଟଲ ରହିଛି ‘ଟାଇଗର ନାଗେଶ୍ୱର ରାଓ’ । ସୂଚନାଯୋଗ୍ୟ, ଦୀର୍ଘ ୩୫ ବର୍ଷ ପରେ ଅନୁପମ ପୁଣିଥରେ ତେଲୁଗୁ ଫିଲ୍ମରେ କାମ କରିବାକୁ ଯାଉଛନ୍ତି । ମିଳିଥିବା ଖବର ଅନୁଯାୟୀ, ‘ଟାଇଗର ନାଗେଶ୍ୱର ରାଓ’ ଏକ ବାୟୋପିକ ଓ ଏହା ବି ପ୍ରଥମ ଥର ଦେଖିବାକୁ ମିଳିବ ଯେ ଅନୁପମ ଖେର ପ୍ରଥମ ଥର ସାଉଥ ସୁପରଷ୍ଟାର ରବି ତେଜାଙ୍କ ସହ ଏକାଠି ନଜର ଆସିବେ । ନିକଟରେ ମିଳିଥିବା ସୂଚନା ଅନୁଯାୟୀ, ଏହି ଫିଲ୍ମକୁ ୭୦ ଦଶକରେ ସେଟ୍ କରାଯାଇଥିଲା । ଏହି ଫିଲ୍ମରେ ଅନୁପମ ଓ ରବି ତେଜାଙ୍କ ବ୍ୟତୀତ ନୁପୁର ସେନନ ଓ ଗାୟତ୍ରୀ ଭରଦ୍ୱାଜ ମୁଖ୍ୟ ଭୂମିକାରେ ନଜର ଆସିବେ ।